ءىس-شارا بارىسىندا «توبىل» فۋتبول كلۋبىنىڭ مەديا-وفيتسەرى قاسقىرباي قويشىمانوۆ ەل گازەتىنىڭ ەڭ قارت وقىرمانى, 99 جاستاعى مايدانگەر-جۋرناليست قاسىمحان الدابەرگەنوۆكە «Egemen Qazaqstan»-نىڭ ءبىر جىلدىق جازىلىمىن تارتۋ ەتىپ, تۇبىرتەگىن قولىنا ۇستاتتى.
– بۇرىنعى «سوتسياليستىك قازاقستان», بۇگىنگى «ەگەمەندى» 77 جىل بويى ۇزبەي وقىپ كەلەمىن. ساليقالى, سالماقتى ەڭ ءبىر سۇيىكتى گازەتىم. وقىپ قانا قويماي, كەيبىر كوكەيكەستى ماسەلەلەر توڭىرەگىندەگى وي-پىكىرىمدى ءوزىم دە جازىپ تۇرامىن. ماسەلەن, وسىدان ءبىراز جىل بۇرىن «تەرمە دەگەن تەرميندى تەرىس بۇرىپ بارامىز» دەگەن كولەمدى ماقالام جاريالاندى. ول كەزدە ەل ىشىندە بىرەۋ ء«اۋ» دەسە, ء«وي, بۇل تەرمەشى عوي!» دەيتىن ءبىر ءۇردىس پايدا بولعان. سونىڭ ءجونىن ايتۋ ماقساتىندا جازىلعان دۇنيە ەدى, – دەيدى ارداگەر.
اكتسيانىڭ اشىلۋ راسىمىندە «قازپوشتا» اق قوستاناي وبلىستىق فيليالىنىڭ باسشىسى قايرات ساعاديەۆ گازەت-جۋرنالداردىڭ قوعامدىق وي-سانانى ىلگەرىلەتەتىن, كۇندەلىكتى ماڭىزدى اقپاراتتارمەن حاباردار ەتىپ وتىراتىن ايتۋلى قۇرال ەكەنىن اتاپ ءوتىپ, كوپشىلىكتى 2024 جىلعى جازىلىم ناۋقانىنىڭ باستالۋىمەن قۇتتىقتادى.
– بيىل «قازپوشتا» 30 جىلدىق بەلەسىن باعىندىرىپ وتىر. پوشتا قىزمەتكەرلەرىنىڭ جالاقىسىن ءوسىرۋ ماسەلەسى دە بىرتىندەپ ءوز شەشىمىن تاۋىپ كەلەدى. ءبىز قازىر مەرزىمدى ءباسپاسوزدىڭ تارالىمىن كەڭەيتۋ, گازەت-جۋرنالداردى كەشىكتىرمەي وقىرمانعا جەتكىزۋ باعىتىندا جۇمىس ىستەپ جاتىرمىز. بيىل وڭىردەگى ءىرى كاسىپورىنداردىڭ باسشىلارمەن كەزدەسىپ, جازىلىم اياسىن ۇلعايتۋ جونىندە ۇسىنىس ايتقان ەدىك, وكىنىشكە قاراي, كوبى قولداۋ بىلدىرە قويمادى. سونداي-اق شالعاي اۋىلدارعا گازەت جەتكىزۋ ماسەلەسى دە تولىق شەشىلە قويعان جوق. بۇعان شالعاي اۋىلعا قاتىنايتىن كولىكتىڭ, ادامنىڭ تاپشىلىعى قولبايلاۋ بولىپ تۇر. قىستا اۋا-رايىنىڭ قولايسىزدىعى كەدەرگى بولادى. بىراق بيىلدان باستاپ گازەت تاسىمالىن باقىلايتىن كرى جۇيەسى ەنگىزىلەدى. جاڭا جۇيە باسپاحانادان شىققان گازەتتىڭ وقىرمان قولىنا قاي ۋاقىتتا تيگەنىنە دەيىن ونلاين باقىلاپ وتىرۋعا مۇمكىندىك بەرەدى, – دەدى فيليال باسشىسى.
ءارى قاراي ءار مەرزىمدى باسىلىم وكىلدەرى وزدەرىنە ارنايى بولىنگەن جازىلىم ورنىنا جايعاسىپ, كەلىمدى-كەتىمدى تۇرعىندارعا گازەتتىڭ شىعۋ جيىلىگى, ايلىق, جارتىجىلدىق, جىلدىق باعاسى مەن وعان جازىلۋ جولدارى تۋرالى اقپارات بەردى. بىرقاتار ءباسپاسوز قۇرالدارى جازىلىم لوتورەيالارىن ويناتىپ, تۇراقتى وقىرماندارىنا شاعىن كادەسىيلار تارتۋ ەتتى.
قوستاناي وبلىسى
