كاراتەشىلەر سەنىمدى اقتادى
ازيا ويىندارىندا ەلىمىزدىڭ كاراتەشىلەرى بيىك بەلەستى باعىندىردى. ءدۇبىرلى دوداعا كەلگەن 8 سپورتشىنىڭ بارلىعى دا جۇلدەلى ورىننان كورىندى. 3 التىن, 3 كۇمىس, 2 قولا مەدال جەڭىپ العان كاراتەشىلەر وزگەلەرگە ۇلگى بولارلىقتاي ناتيجە كورسەتتى.
ەل نامىسىن قورعاعان قايسار الپىسباي قۇرلىقتىق دودانىڭ جەڭىمپازى اتاندى. 60 كيلوعا دەيىنگى سالماقتا باق سىناعان سپورتشىمىز فينالدا ەكى دۇركىن ازيا چەمپيونى, كۋۆەيتتىك ابدۋللا شااباندى جەڭىپ, ازيادانىڭ التىنىنا يە بولدى. اسا تارتىستى وتكەن جەكپە-جەك 7:5 ەسەبىمەن اياقتالدى.
– نەگىزى ازيا ويىندارىنا دايىندالعانىمىزعا ءبىرشاما جىل بولدى. شۇكىر, ەڭبەك اقتالدى. فينالداعى قارسىلاسىممەن بۇعان دەيىن بىرنەشە رەت كەزدەسكەنمىن. سوڭعى كەزدەسۋىمىزدە دە جەڭگەن بولاتىنمىن. دايىندىق بارىسى جاقسى ءوتتى. قيىندىق بولعان جوق. بىزدە وسى ايدىڭ سوڭىندا تاعى ۇلكەن جارىس بار. الەم چەمپيوناتى وتەدى. ەندى سوعان دايىندىقتى باستايمىز, – دەدى چەمپيون.
كاراتەدەن ۇلتتىق قۇراما كوشباسشىسى سوفيا بەرۋلتسەۆا ازيا ويىندارىندا التىن جەڭىپ العان سپورتشىلاردىڭ قاتارىنا ەندى.
ايەلدەر اراسىندا +68 كيلو سالماقتا سىنعا تۇسكەن جەرلەسىمىز فينالدىق ايقاستا اريكا گۋرۋنگكە (نەپال) ەش مۇمكىندىك بەرمەي, التىن مەدالعا قول جەتكىزدى. سوفيا ءحىح جازعى ازيا ويىندارىن شيرەك فينالدان باستاپ جۋد ولدرۋستى (يوردانيا) سەنىمدى جەڭگەن ەدى. ارادا كوپ ۋاقىت وتپەي, ول جارتىلاي فينالدا فيليپپين سپورتشىسى يزابەل ارياننا بريتودان باسىم ءتۇستى.
جالپى, 22 جاستاعى سوفيا بەرۋلتسەۆا توكيو وليمپياداسى مەن 2021 جىلعى الەم چەمپيوناتىندا قولا جۇلدە جەڭىپ العاننان كەيىن جۇرت نازارىن وزىنە اۋدارا باستادى. سونىمەن قاتار جەرلەسىمىز سپورتتىڭ وسى تۇرىندەگى ەڭ بەدەلدى جارىستىڭ ءبىرى – پرەمەر-ليگادا 4 رەت التىننان القا تاعىپ, تاعى بىرنەشە مارتە جۇلدەگەرلەر قاتارىنان كورىنگەن. ازيانىڭ 2 دۇركىن چەمپيونى, بۇعان قوسا 3 رەت كۇمىس, 1 رەت قولا مەدال يەگەرى اتانعان. سونداي-اق س.بەرۋلتسەۆا – بىلتىر اقش-تىڭ بيرمينگەم قالاسىندا وتكەن XI دۇنيەجۇزىلىك ويىندارىندا قازاقستانعا جالعىز التىندى سىيلاعان سپورتشى.
كاراتەشى نۇرقانات اجىقانوۆتى توكيو وليمپياداسىنان بەرى جانكۇيەرلەرگە جاقسى تانىس. جاپون جەرىندە جولى بولمادى دەمەسەڭىز, جەرلەسىمىز ازيا, الەم چەمپيوناتتارىندا جۇلدە الىپ ءجۇر. سول سەبەپتى نۇرقاناتتىڭ الدىندا ازيا ويىندارىندا توپ جارۋ ماقساتى تۇردى جانە جەرلەسىمىز سەنىمدى اقتادى. كاراتەشىمىز ازيا ويىندارىنىڭ العاشقى اينالىمىندا ماحاممەد شەكحۋ الامدى (نەپال) 5:0 ەسەبىمەن ۇتسا, شيرەك فينالدا قىرعىز سپورتشىسى نازىم نۇرلانوۆتان 3:1 ەسەبىمەن باسىم ءتۇستى. ال جارتىلاي فينالدا نۇرقانات مالايزيا وكىلى راگونازان شارمەندراندى 4:3 ەسەبىمەن جەڭدى. ال فينالدا يوردانيالىق حاسان ماسارشەيحتى 8:0 ەسەبىمەن ويسىراتا ۇتتى.
رەكورد تىركەپ, چەمپيون اتاندى
ستەند اتۋدىڭ سكيد باعدارلاماسى بويىنشا قازاقستاننىڭ قىزدار قۇراماسى ەڭ كوپ ۇپاي جيناپ, سارى قۇرلىق ويىندارىنىڭ جەڭىمپازى اتاندى.
ستەند اتۋدىڭ سكيد باعدارلاماسى بويىنشا قۇرامىندا اسەم ورىنباي, زويا كراۆچەنكو جانە ولگا پانارينا ونەر كورسەتەتىن ءبىزدىڭ كوماندا جالپى 350 ۇپاي جيناپ, جارىس رەكوردىن جاڭارتتى.
ال جەكەلەي سايىستا اسەم ورىنباي قولا جۇلدەگە قول جەتكىزدى.
ستەند اتۋدىڭ سكيد باعدارلاماسىندا التىن يەلەنگەن ۇشەۋدىڭ ءبىرى – ولگا پانارينا. ول – 53 جاستا. ازيادانىڭ سۋ جاڭا چەمپيونى مەن رەكوردشىسىنىڭ وتباسىندا نەمەرەسى ءوسىپ كەلەدى. مەرگەندىك جاس تالعامايتىنىن پانارينا كەزەكتى مارتە دالەلدەدى.
– بىرىنشىدەن, كوپ جاتتىعامىن. ەكىنشىدەن, سپورتشىلار قارتايمايدى. نىسانا كوزدەۋ – بۇل مەنىڭ ومىرلىك ءىسىم. سول سەبەپتى بار كۇش-جىگەرىمدى جۇمسايمىن. كوماندالاستارىما دا العىس ايتقىم كەلەدى. مەنەن كەڭەس سۇراعاندارعا, ارقاشان كومەكتەسۋگە تىرىسامىن. ۇجىمىمىز وتە تاتۋ. مەنىڭشە, بۇل جەڭىس – وسى كوماندالىق رۋحتىڭ جەمىسى. بۇل مەدالىمدى اتا-اناما ارناعىم كەلەدى. ولار ارقاشان مەنىمەن بىرگە, – دەدى و.پانارينا.
ستەند اتۋدا (Skid-ءمىح) ەدۋارد ەششەنكو مەن اسەم ورىنباي ەل قورجىنىنا كەزەكتى التىن مەدال قوستى. اتالعان باسەكەدە العاشىندا 8 قۇراما باق سىنادى. جەرلەستەرىمىز ءبىرىنشى ورىنمەن ىرىكتەۋدەن سۇرىنبەي ءوتتى. ەكىنشى كەزەڭدە 6 قۇراما فينالدىق جولدامانى ساراپقا سالدى. بۇل سىندا وتانداستارىمىز ەكىنشى ورىنعا تۇراقتادى. ال شەشۋشى كەزەڭدە كۋۆەيت مەرگەندەرىمەن ءوزارا جەڭىمپازدى انىقتاۋعا كىرىستى. ەكى قۇراماعا دا التىن اۋاداي قاجەت ەدى. سەبەبى كۋۆەيتتىكتەردىڭ قورجىنىندا بۇعان دەيىن 1 التىن, 1 قولا مەدال بولسا, ال بىزدە 2 التىن, 3 كۇمىس, 13 قولا بار-تۇعىن. نامىسقا تىرىسقان جەرلەستەرىمىز باس-اياعى جارتى ساعاتتىڭ ىشىندە قارسىلاستارىنان 5 ۇپايعا اسىپ, ازيادا چەمپيونى اتاندى.
شىنى كەرەك, ستەند اتۋ ەلىمىزدە كەنجە دامىعان. قازاقتار ادەتتە بالاسىن فۋتبول, كۇرەس, بوكس سەكىلدى سپورت تۇرلەرىنە بەرەدى عوي. ال ازيادا سەكىلدى الامانداردا نىسانا كوزدەۋ سپورتىنان ءبىر ەمەس, بىرنەشە مەدال جەڭىپ الۋ مۇمكىندىگى بار. وسى ازيا ويىندارىندا 20 مەدال جيىنتىعى ساراپقا سالىندى. بۇل دەگەنىڭىز – جەڭىل اتلەتيكادان كەيىنگى ەڭ كوپ مەدال ۇلەستىرەتىن سپورت ءتۇرى. ونىڭ ۇستىنە, مۇندا جاسقا قارامايدى. ءبىزدىڭ ولگا پانارينا 53 جاسىندا ازيا ويىندارىنىڭ چەمپيونى اتانسا, كۇمىس جۇلدەگەر كۋۆەيتتىك سپورتشىنىڭ جاسى 60-تا. سوندىقتان دا وسى سپورت ءتۇرىن ەلىمىزدىڭ ءار قالاسىندا دامىتۋ كەرەك دەگەن وي كەلدى. ايتپەسە, قۇرامادا اسەم ورىنبايدان باسقا بىردە-ءبىر قازاق سپورتشىسى جوق.
جارىستىڭ سوڭعى كۇنگى ناتيجەسى
ازيا ويىندارىنىڭ سوڭعى ەكى كۇنىندە ەل قورجىنىنا 2 التىن, 7 كۇمىس, 10 قولا مەدال ءتۇستى. ال كوركەم گيمناستيكادان كوماندالىق سايىستا ەلجانا تانيەۆا, ەريكا جايلاۋوۆا مەن ميلانا پارفيلوۆا, كاراتەشىلەر ديدار ءامىرالى, ءمولدىر جاڭبىرباي, دانيار يۋلداشەۆ, سلالومدا ەسكەك ەسۋدەن اناستاسيا انانەۆا, ايەلدەر كۇرەسىنەن باق سىناعان ءجاميلا باقبەرگەنوۆا, دجيۋ-دجيتسۋ شەبەرى گالينا دۋۆانوۆا ازيا ويىندارىنىڭ كۇمىس جۇلدەگەرى اتاندى.
ازيا ويىندارىندا باق سىناعان شاحماتتان قازاقستان قىزدار قۇراماسى العا قىتاي مەن ءۇندىستاندى جىبەرىپ, ۇزدىك ۇشتىكتى تۇيىندەدى. ال ارتىستىك جۇزۋدەن ياسمين تۇياقوۆا مەن ارينا پۋشكينا, سۋ دوبىنان ەرلەر قۇراماسى, سلالومدا ەسكەك ەسۋدەن الەكساندر كۋليكوۆ, كاراتە باسەكەسىندە 61 كيلو سالماق دارەجەسىندە سىنعا تۇسكەن اسەل قاناي, دجيۋ-دجيتسۋدان ماريان ورداباەۆا, سلالومدا ەسكەك ەسۋدەن ەل نامىسىن قورعاعان 16 جاستاعى ەكاتەرينا تارانتسەۆا, شەبەر جۇزۋدەن ەل كومانداسى قولا جۇلدەگە قول جەتكىزدى.
مەرگەن قىز ءمۇلت كەتكەن جوق
ازيا ويىندارىندا تاپانشامەن 10 مەترگە جىلجىمالى نىسانانى كوزدەۋدە زۋحرا يرنازاروۆا قارسىلاستارىنىڭ مىقتىلىعىنا قاراماستان, جارىستى وتە سەنىمدى باستادى. ناتيجەسىندە, سولتۇستىككورەيالىق قوس سپورتشىدان وق بويى وزىپ, ازيا ويىندارىنىڭ التىنىن جەڭىپ الدى.
جارىستان كەيىن بەرگەن سۇحباتىندا زۋحرا توپ جارعانىنا وتە قۋانىشتى ەكەنىن جەتكىزدى.
– بارلىعى ويداعىداي بولعانىنا ريزامىن. ازيا ويىندارىنا العاش رەت قاتىسىپ وتىرمىز. سوندىقتان قوبالجىماي, دالدىكپەن نىسانانى كوزدەگەنىمىزدە, كوماندالىق سايىستا ءبىرىنشى ورىن الاتىن ەدىك. بۇل جارىس قوي, ءدال قازىر كىم مىقتى بولسا, سول جەڭىسكە جەتەدى. الدا ءالى تالاي جۇلدە الاتىنىما سەنىمدىمىن, – دەگەن زۋحرا ازيا ويىندارى الدىندا قۇراما قىز-جىگىتتەرى كۇنىنە ەكى رەتتەن دايىندىق جۇرگىزگەنىن, جەكە باپكەرىمەن جەڭىسكە جەتۋ ءۇشىن بارىن سالعانىن ايتتى.
– ءبىرىنشى كەزەڭدە ءتورتىنشى ورىن الدىم. ەكىنشى كەزەڭ الدىندا ءوزىمدى قايراپ, پسيحولوگيالىق تۇرعىدا دايىندالىپ شىقتىم. سوڭعى ءۇشىنشى كەزەڭدە جەڭىمپاز اتاناتىنىما سەنىمدى بولدىم. سىڭارىم فاتيما كىشكەنە اۋىرىڭقىراپ قالدى. ايتپەسە ونىڭ ناتيجەسى مەنەن دە اسىپ تۇسەر ەدى, – دەدى زۋحرا.
ەڭسەمىزدى كوتەرگەن ەسكەكشىلەر
ازيا ويىندارى باستالار الدىندا ەسكەك ەسۋشىلەردەن تولاعاي تابىس كۇتكەنىمىز راس. سەبەبى العاشقى دەلەگاتسيانى الماتىدان حانچجوۋعا شىعارىپ سالۋ كەزىندە ماماندار بوكس, دزيۋدو, كۇرەس, نىسانا كوزدەۋ, سونىمەن قاتار كانوەدە ەسكەك ەسۋدەن بىرنەشە التىن مەدال الۋدان ءۇمىتتى ەكەنىن ايتقان ەدى. مامانداردىڭ بولجامى ءدال كەلدى. ارينە, ەسكەك ەسۋشىلەر توپىرلاتىپ بىرنەشە التىن مەدال الماسا دا, كوڭىل كونشىتەرلىك ناتيجە كورسەتتى.
كانوەدە ەسكەك ەسۋدەن سەرگەي ەمەليانوۆ پەن تيمۋر حايداروۆ باستاعان ەسكەكشىلەردىڭ التىن الاتىنىنا بارلىعىمىز سەنىمدى بولدىق. سەنىم اقتالدى دا.
س.ەمەليانوۆ پەن ت.حايداروۆ باستاعان جۇپ 500 مەترلىك قاشىقتىقتا قارسىلاستارىنان اناعۇرلىم وزىپ, ازيا ويىندارىنىڭ التىن جۇلدەسىنە يە بولدى. سپورتشىلارىمىز جەڭىستەن كەيىن تىلشىلەرمەن تىلدەسىپ, الداعى جوسپارلارى تۋرالى ايتتى.
– بۇعان دەيىن ەكى ازيا ويىندارىندا كۇمىس جۇلدە الدىم. ءۇشىنشى ازيا ويىندارى مەن ءۇشىن ءساتتى باستالدى. العاشقى قاشىقتىقتا التىن الدىق. كوڭىل كۇي وتە كەرەمەت! مارەگە ءبىرىنشى بولىپ جەتۋ ەرەكشە سەزىم ەكەن. ەلىمىزگە التىن مەدال اكەلگەنىمىزگە قۋانىشتىمىز. ءبارى ويلاعانداي ءوتتى. ءبىز ءوز جۇمىسىمىزدى اتقاردىق. ناتيجەسىندە, قاشىقتىقتى سەنىمدى تۇردە يگەرىپ, ءبىرىنشى كەلدىك, – دەدى سەرگەي ەمەليانوۆ.
جەلدەن جۇيرىك ۆەلوشاباندوزدار
تاسجولداعى ۆەلوجارىستا سىنعا تۇسكەن ۇلتتىق قۇرامانىڭ كوشباسشىسى الەكسەي لۋتسەنكو ۇزدىك ناتيجە كورسەتىپ (48:05:75), ازيادانىڭ التىن مەدالىن ەنشىلەدى. وتانداسىمىز وسىلايشا ازيا ويىندارىنىڭ ءتورت دۇركىن جەڭىمپازى اتاندى.
ەۆگەني فەدوروۆ تا ۆەلوسپورتتان توپتىق جارىستا مارە سىزىعىن ءبىرىنشى بولىپ كەسىپ, ازيا ويىندارىنىڭ التىن جۇلدەسىنە يە بولدى. 207,7 شاقىرىمعا سوزىلعان توپتىق سايىستا ەكىنشى بولىپ مارە سىزىعىن تاعى ءبىر وتانداسىمىز الەكسەي لۋتسەنكو كەسىپ ءوتتى. ايتا كەتەيىك, بۇعان دەيىن ازيا ويىندارىنىڭ 4 دۇركىن چەمپيونى بولعان الەكسەي لۋتسەنكو مارەگە جاقىن قالعاندا ءوزىنىڭ ارىپتەسى ەۆگەني فەدوروۆكە جولىن بەرىپ, مارتتىك تانىتتى. ە.فەدوروۆ 2018 جىلى جاسوسپىرىمدەر اراسىندا وليمپيادا چەمپيونى, 2019 جىلى عانا ەرەسەكتەر قاتارىنا قوسىلدى. ول 23 جاسقا دەيىنگىلەر اراسىندا الەم چەمپيونى, 4 دۇركىن ازيا جەڭىمپازى.
باتىربەكوۆ ەر ەكەن
دجيۋ-دجيتسۋدان بىرنەشە ەلدە وتكەن حالىقارالىق تۋرنيردە توپ جارعان نۇرجان باتىربەكوۆ قۇراماعا تاعى ءبىر التىن مەدالدى الىپ بەردى. نۇرجان ازيا ويىندارىنداعى فينالدىق سايىستا ەكى دۇركىن ازيا چەمپيونىن جەڭىپ, جانكۇيەرلەردى ءبىر قۋانتىپ تاستادى. الەم چەمپيوناتىنىڭ قولا جۇلدەگەرى ن.باتىربەكوۆ (69 كگ) جارىس بارىسىندا وساما كانديلدى – 9:0, رامشەد ابدۋللاەۆتى – 7:0, سەونگحۋەون ءجۋدى 5:2 ەسەبىمەن جەڭدى. فينالدىق ايقاستا موحامەد السۋۆايديدەن 4:2 ەسەبىمەن ايلاسىن اسىردى.
ءتۇيىن. قاي سپورتشى بولسىن جارىسقا حالقىنىڭ ابىرويىن اسقاقتاتىپ, ەلىنىڭ ءانۇرانىن شىرقاتىپ, بايراعىن جەلبىرەتسەم دەپ باراتىنى بەلگىلى. ءبىزدىڭ دە سپورتشىلارىمىز حانچجوۋعا وسىنداي ماقساتپەن اتتانعان. الايدا بىرەۋىنىڭ بابى كەلمەسە, ەندى بىرىنە قازىلار قيانات جاساعانىن دا كوز كوردى. قالاي بولعاندا دا سپورتشىلارىمىز بار كۇش-جىگەرىن جۇمساعانى انىق. سول سەبەپتى ەلىمىزدىڭ ءانۇرانىن شىرقاتقاندارمەن بىرگە جەڭىس تۇعىرىنا كوتەرىلىپ, كوك تۋىمىزدى جەلبىرەتكەندەردىڭ بارلىعىن ماقتانىش ەتەمىز.
