اتالعان جوبانىڭ قۇرىلىسى «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسى اياسىندا قولعا الىنعان. جالپى, دوستىق جۇك تاسىمالى بەكەتىنەن مويىنتى ستانساسىنا دەيىنگى 836 شاقىرىمدىق ەكىنشى تەمىرجول جەلىسى وتاندىق ءونىمنىڭ ەكسپورتىن ۇلعايتۋعا جانە ەلدىڭ ترانزيتتىك الەۋەتىن ارتتىرۋعا تىكەلەي ىقپال ەتپەك. جوباعا تاپسىرىس بەرۋشى «سامۇرىق – قازىنا» ءال-اۋقات قورى بولسا, ونىڭ قۇرىلىس جۇمىسىن «Integra construction kz» جشس جۇزەگە اسىردى.
مامانداردىڭ ايتۋىنشا, قۇرىلىس بارىسىندا 5 ءىرى, 87 شاعىن جانە ورتا ماسشتابتاعى كوپىر, 288 سۋ جۇرگىزۋ قۇبىرى, 14 اۆتوجول وتكەلى, سونداي-اق ەنەرگەتيكا جانە بايلانىس نىسانىن سالۋ جوسپارلانعان. قۇرىلىس 2025 جىلدىڭ 4 توقسانىندا اياقتالادى. جوبا قولدانىسقا بەرىلگەندە وتاندىق تەمىرجول تاسىمالىنىڭ قۋاتىن ارتتىرۋمەن بىرگە «قازاقستان تەمىرجولى جۇك تاسىمالى» اق الماتى بولىمشەسىنىڭ دوستىق جۇك تاسىمالى ستانسانىڭ جۇمىسى دا قىزا تۇسەدى.
«دوستىق جۇك تاسىمال ستانساسى 1991 جىلى اشىلدى. بۇگىندە قىتاي مەن ەۋروپا اراسىنداعى كونتەينەرلىك اعىننىڭ 70 پايىزى دوستىق ستانساسى ارقىلى وتەدى. جۇكتىڭ كوپ بولىگىن «دوستىق ترانس تەرمينالى» كونتەينەرلىك الاڭى قابىلدايدى. قازاقستاننىڭ ترانزيتتىك الەۋەتىن ارتتىرۋ – ەلدىڭ ستراتەگيالىق مىندەتتەرىنىڭ ءبىرى جانە ءبىز ونى مۇمكىندىگىنشە ىسكە اسىرۋ ءۇشىن بار كۇشىمىزدى سالىپ جاتىرمىز. وتكەن جىلعى جۇك تاسىمالى وسىعان دەيىنگى رەكوردتىق دەڭگەيگە جەتىپ, 23 ميلليون 120 مىڭ توننا جۇك قابىلدانىپ, وڭدەلىپ, جونەلتىلدى. جۇكتىڭ نەگىزگى باعىتتارى: قىتاي – ەۋروپا – قىتاي, قىتاي – ورتالىق ازيا ەلدەرى, قىتاي – رەسەي ەلىن قامتيدى. جىل باسىندا بيىل 26 ميلليون 800 توننا جۇك تاسىمالدانادى دەپ جوسپارلانعان. قازىر 15 ميلليون تونناعا جۋىق جۇك تاسىمالداندى. مۇنىڭ ىشىندە قازاقستاننان قىتاي تاراپىنا 10 ميلليون 700 مىڭ توننا جۇك تاپسىرىلسا, قىتاي جاقتان 4 ميلليون 335 مىڭ توننا جۇك قابىلداندى. ال 8 ايداعى جۇك تاسىمالى وتكەن جىلدىڭ ۇقساس مەزگىلىمەن سالىستىرعاندا 119 پايىزعا ارتىق ورىندالدى. بۇگىن دە دوستىق ترانس تەرمينالى 13 كونتەينەرلىك پويىزدى قۇرۋعا جانە جونەلتۋگە قاۋقارلى. وندا 600-دەن استام ادام جۇمىس اتقارادى. وسى جىلدىڭ 4 توقسانىندا جۇك تاسىمالىنىڭ ترانزيتتىك الەۋەتىن ارتتىرۋ باعىتىندا ەۋروستاندارتقا ساي تەرمينال اشىلماق. ينفراقۇرىلىمىن دامىتۋ ماقساتىندا ۇلكەن ساياباق سالۋ جوسپاردا تۇر. سونداي-اق قازاقستان مەن قىتاي تاراپى جۇك وتكىزۋ بەكەتىنىڭ مۇمكىندىگىن كەڭەيتۋگە بايلانىستى جاڭا كەلىسىمدەر جۇرگىزىپ جاتىر. ول كەلىسىم جۇزەگە اسسا, جۇمىسىمىزعا سەرپىن بەرەرى انىق. ەندى دوستىق – مويىنتى تەمىرجول ۋچاسكەسىنىڭ ەكىنشى جولىنىڭ سالىنۋى تەمىرجولداعى جۇك تاسىمالىنىڭ جىلدام ءارى زاماناۋي ستاندارتقا ساي جۇمىس جۇرگىزۋىنە ىقپال ەتەدى», دەيدى دوستىق جۇك تاسىمالى ستانساسىنىڭ باسشىسى ماقسات مامبەتقۇلوۆ.
دەمەك, دوستىق – مويىنتى تەمىرجول ۋچاسكەسىنىڭ ەكىنشى جولى جەتىسۋ وبلىسى اۋماعىندا بيىل جاز ايىندا باستالدى. جىل سوڭىنا دەيىن دوستىقتان سايقان ستانساسىنا دەيىنگى 4 ۋچاسكەگە تەمىرجول توسەۋ جوسپارلانعان. قازىر دوستىق – اقشي ۋچاسكەسىندە جۇمىس قارقىندى ءجۇرىپ جاتقانىن كوردىك: «دوستىق پەن مويىنتىعا دەيىنگى ءار ۋچاسكەدە جۇمىس قىزۋ ءجۇرىپ جاتىر. جەتىسۋ وڭىرىندەگى تەمىرجولدى سالۋ مىندەتى «Integra construction kz» جشس-نىڭ وڭتۇستىك ديرەكتسياسىنا تاپسىرىلعان. قازىر اقشي ستانساسى اۋماعىنداعى كىرمە جولداردى تازالاۋ, جول سالىناتىن جەردى تەگىستەۋ مەن تاس توگۋ جۇمىسىن اتقارۋ ۇستىندەمىز. وسى ۋچاسكەدە 120-عا جۋىق ادام جۇمىس اتقارىپ جاتىر. تەمىرجول قۇرىلىسىن جۇرگىزۋگە قاجەتتى جەڭىل جانە اۋىر تەحنيكامەن تولىق جابدىقتالعان. بيىلعى جوسپاردى جىل سوڭىنا دەيىن تولىق ورىندايمىز», دەيدى «Integra construction kz» جشس وڭتۇستىك ديرەكتسياسى ديرەكتورىنىڭ ورىنباسارى ورىنباسار قۇلپەيىسوۆ.
بۇل ۋچاسكەدەگى جۇمىسشىلاردىڭ ءبىر توبى كىرمە جولداردى بۇرىندارى توسەلگەن رەلستەن تازالاپ جاتسا, ەندى ءبىر بولىگى تەمىرجول توسەلەتىن جەرگە تاس توگىپ, تاعى ءبىر توپ تەحنيكاسى ونى جايمالاپ, شىڭداپ, جانتالاس جۇمىس ءجۇرىپ جاتىر. قۇرىلىس جۇمىسىنا جەرگىلىكتى تۇرعىندار تارتىلىپتى. ولاردىڭ ايلىق تابىسى دا جاقسى. ەرتەڭگى كۇنى ەل الەۋەتىن وسىرۋگە جۇمىس اتقاراتىن جاڭا جوبا بۇگىندە جەرگىلىكتى جۇرتتىڭ ءال-اۋقاتىن ارتتىرىپ جاتقانىن كوردىك.
جەتىسۋ وبلىسى
