ءبىلىم سالاسىن دامىتۋ ماقساتىندا قولعا الىنعان جوبالار از ەمەس. ارينە, ءاربىر جوبانىڭ ءوز ميسسياسى بار. ايتسە دە «اۋىلدىق جەرلەردەگى تىرەك مەكتەپتەردىڭ الەۋەتىن دامىتۋ» جوباسىنىڭ ورنى بولەك ەكەنى راس. بۇگىندە وڭىردە اتالعان جوبا اياسىندا اتقارىلعان جۇمىستار وڭ ناتيجە بەرىپ وتىرعانى تالاس تۋدىرمايدى. الەۋەتتى جوبانىڭ جەمىسىن وڭىردەگى بىرقاتار اۋىلدىق مەكتەپ تە سەزىنە باستادى. اسىرەسە شالعاي اۋداندارداعى ءبىلىم وردالارىنا ايرىقشا نازار اۋدارىلا باستاعانى قۋانتادى.
بىرەر كۇن بۇرىن جامبىل وبلىسى اۋماعىنىڭ 30 پايىزىن الىپ جاتقان مويىنقۇم اۋدانىنىڭ ورتالىعى مويىنقۇم اۋىلىنىڭ تۇرعىندارى دا الەۋەتتى جوبانىڭ شاراپاتىن سەزىندى. ناقتىراق ايتساق, تۇرار رىسقۇلوۆ اتىنداعى ءبىلىم ورداسى جەرگىلىكتى جۇرتشىلىققا تىرەك مەكتەبى رەتىندە تانىستىرىلدى. ءدال سول كۇنى جۋالى اۋدانىنداعى ءاليحان بوكەيحان اتىنداعى مەكتەپ-ليتسەيى دە تىرەك مەكتەبى رەتىندە جۇمىسىن باستاعانىن ايتا كەتكەن ءجون.
قىسقاسى, وسى جىلى «اۋىلدىق جەرلەردەگى تىرەك مەكتەپتەردىڭ الەۋەتىن دامىتۋ» جوباسىنا وڭىردەن ەكى مەكتەپ قوسىلىپ, وقۋشىلاردىڭ يگىلىگىنە بەرىلدى. «قازاقستان حالقىنا» قوعامدىق قورى مەن ء«بىلىم بەرۋ سالاسىن تۇراقتى دامىتۋ» قورىنىڭ قولداۋىنىڭ ناتيجەسىندە 250 ملن تەڭگە ءبولىنىپ, ءبىلىم وشاقتارىنىڭ ماتەريالدىق-تەحنيكالىق بازاسى تولىعىمەن جاڭارتىلدى.
جوبا جەتەكشىلەرى وزدەرىنە جۇكتەلگەن مىندەتتى ءارى قاراي دا ابىرويمەن جالعاستىرۋعا نيەت ءبىلدىرىپ وتىرعانى جان سەمىرتەدى. ولار اۋىل بالالارىنىڭ الەۋەتى قالادا ءبىلىم الاتىن جاسوسپىرىمدەردەن ەش كەم ەمەس ەكەنىنە بەك سەنىمدى.
مويىنقۇم اۋىلىندا ورنالاسقان تۇرار رىسقۇلوۆ اتىنداعى تىرەك مەكتەبىنىڭ تانىستىرىلىمىنا قاتىسقان ءوڭىر باسشىسى ەربول قاراشوكەەۆ جوبا اياسىندا اتقارىلعان جۇمىس تۋرالى ءوز ويىمەن ءبولىستى.
– پرەزيدەنت قاسىم-جومارت توقاەۆتىڭ تاپسىرماسىنا سايكەس ءبىلىم سالاسىنداعى جۇمىستاردى ودان ءارى قاراي جانداندىرۋدىڭ ماڭىزى زور. بۇگىندە وڭىرىمىزدە بىرقاتار جۇمىس قولعا الىنعانى بەلگىلى. وسى جىلدىڭ وزىندە 25 ءبىلىم نىسانىنىڭ قۇرىلىس جۇمىستارى جۇرگىزىلىپ, 9 مەكتەپ جانە 5 مەكتەپتىڭ قوسىمشا قۇرىلىسى اياقتالدى. راسىندا دا, اعارتۋ سالاسىندا اتقارىلاتىن جۇمىس از ەمەس. ناقتىراق ايتار بولسام, «جايلى مەكتەپ» ۇلتتىق جوباسى اياسىندا 9500 ورىندىق 12 ءبىلىم ورداسىن سالۋدى جوسپارلاپ وتىرعان جايىمىز بار. ونىڭ 7-ەۋى 2024 جىلى, قالعان 5-ەۋى 2025 جىلى پايدالانۋعا بەرىلەدى. جالپى العاندا, تۇرعىنداردىڭ ساناسىندا «قالا مەكتەپتەرىندە وقيتىن جاسوسپىرىمدەردىڭ ءبىلىمى اۋىلدىقتارعا قاراعاندا اناعۇرلىم جوعارى» دەگەن تۇسىنىك قالىپتاسىپ قالعانى جاسىرىن ەمەس. بۇگىندە اۋىل مەن قالا مەكتەپتەرى اراسىنداعى وقۋشىلاردىڭ ءبىلىم ساپاسىنداعى الشاقتىقتى جويۋدىڭ ماڭىزى زور ەكەنى بەلگىلى. وسى تۇرعىدان كەلگەندە ايتارلىقتاي جەمىستى جۇمىس اتقارىپ جۇرگەن «قازاقستان حالقىنا» جانە ء«بىلىم بەرۋ سالاسىن تۇراقتى دامىتۋ» قورىنا العىس بىلدىرەمىز. بىرلەسىپ ىسكە اسىرار جۇمىس از ەمەس, – دەدى ءوڭىر باسشىسى.
ەلىمىزدىڭ بارلىق وڭىرىندە ىسكە اسىپ جاتقان ىلكىمدى جوباعا «قازاقستان حالقىنا» قوعامدىق قورى مەن ء«بىلىم بەرۋ سالاسىن تۇراقتى دامىتۋ» قورىنان بولەك «AITAS» حولدينگى, نازارباەۆ زياتكەرلىك مەكتەپتەرى ايتارلىقتاي زور ۇلەس قوسىپ جاتقانىن ايتا كەتكەن ءلازىم. قازىرگى كەزدە نازارباەۆ زياتكەرلىك مەكتەبىنىڭ بىلىكتى ماماندارى ۇستازداردى تاعىلىمدامادان وتكىزۋ جۇمىستارىن باستاپ كەتتى. ولار اۋىلدارداعى تىرەك مەكتەپتەردە ەڭبەك ەتەتىن پەداگوگ مامانداردىڭ بىلىكتىلىگىن ارتتىرۋ باعىتىنداعى جۇيەلى جۇمىستى جىلدار بويى جۇرگىزۋگە نيەتتى.
– ءوزىمىز بەلگىلەگەن جوسپار اياسىندا اي سايىن وقىتۋ ۇدەرىسىنە جۇيەلى تۇردە قولداۋ كورسەتەمىز. قىركۇيەك ايىنىڭ العاشقى اپتاسىندا فيزيكا, حيميا, بيولوگيا ءپانىنىڭ مۇعالىمدەرىنە جاڭادان جەتكىزىلگەن قۇرال-جابدىقتارمەن جۇمىس ىستەۋدى تولىقتاي ۇيرەتتىك. جالپى العاندا, تىرەك مەكتەپتەرىنىڭ مۇعالىمدەرىنە قولدان كەلگەنشە كومەكتەسۋگە ءازىرمىز. الداعى ۋاقىتتا وزگە مۇعالىمدەر دە ءبىزدىڭ مەكتەپتىڭ وزىق تاجىريبەسىمەن تانىسىپ, جۇمىس بارىسىندا قولداناتىن بولادى. ودان بولەك, ادىستەمەلىك كومەك كورسەتىپ جاتقان جايىمىز بار. ءوز كەزەگىندە ۇستازدار ءارتۇرلى زەرتحانالىق جۇمىستاردى ىسكە اسىرۋعا بەلسەنە كىرىسكەنىن ايتا كەتكەن ءجون. ءبىز اۋىل مەكتەپتەرىندەگى ۇستازدارعا ءۇش جىل بويى قولۇشىن بەرەمىز دەپ جوسپارلاپ وتىرمىز. بىلىكتى ماماندارىمىز ولارعا بار بىلگەنىن ۇيرەتەدى. اتقارىلعان جۇمىستاردىڭ ناتيجەسىندە اۋىل بالالارىنىڭ ءبىلىم ساپاسى جاقسارادى, – دەيدى تارازداعى نازارباەۆ زياتكەرلىك مەكتەبىنىڭ ديرەكتورى قارلىعاش ابدراحمانوۆا.
جوبا جەتەكشىلەرىنىڭ ايتۋىنشا, «قازاقستان حالقىنا» قورى بولگەن 250 ملن تەڭگە ەسەبىنەن مەكتەپتەگى 36 كابينەت تولىقتاي جابدىقتالعان. ولاردىڭ ىشىندە STEM زەرتحاناسى, ارت-ستۋديا مەن كينوستۋديا, روبوتتەحنيكا كابينەتتەرى بار. بۇل ارينە, اۋىل مەكتەپتەرى ءۇشىن قۋانىشتى جاڭالىق ەكەنى داۋسىز.
تۇرار رىسقۇلوۆ اتىنداعى مەكتەپتە 70 ۇستاز ەڭبەك ەتەدى. ولار كەزەڭ-كەزەڭىمەن نازارباەۆ زياتكەرلىك مەكتەبىنىڭ قارقىندى وقىتۋ باعدارلاماسىن مەڭگەرىپ, اۋىل بالالارىن وزىق باعدارلامالار نەگىزىندە وقىتپاق. وسىلايشا, ەلدى مەكەندەردە تۇراتىن قاراكوزدەردىڭ ءبىلىم دەڭگەيىن قالالىق بالالاردىڭ بىلىمىمەن تەڭەستىرۋگە كۇش سالماق.
جالپى العاندا, ء«بىلىم بەرۋ سالاسىن تۇراقتى دامىتۋ» قورى جامبىل وبلىسىندا وسىمەن ءۇشىنشى ءبىلىم ورداسىن تىرەك مەكتەپتەر جەلىسىنە قوسىپ وتىر. بۇعان دەيىن سارىسۋ اۋدانىنا قاراستى ساۋداكەنت اۋىلىنداعى بالتاباي ادامباەۆ اتىنداعى مەكتەپكە كومەك كورسەتكەن بولاتىن. قور جەتەكشىسى دانيار توقتارباەۆتىڭ ايتۋىنشا, قولعا الىنعان جۇمىستار الداعى ۋاقىتتا دا جالعاسىن تابادى. ويتكەنى تىرەك مەكتەپتەردىڭ جەلىسىنە قوسىلۋعا نيەت ءبىلدىرىپ وتىرعان ءبىلىم ورداسى از ەمەس.
– بۇل جۇمىس وسى جىلمەن توقتاپ قالمايدى. كەلەسى جىلى ءوڭىردىڭ تاعى 8 مەكتەبىن تىرەك مەكتەپتەر جەلىسىنە قوسامىز دەپ وتىرمىز. ەلىمىزدىڭ ءار اۋدانىنان كەم دەگەندە ءبىر ءبىلىم ورداسىن تىرەك مەكتەپتەر قاتارىنا قوسساق, ودان ەشكىم ۇتىلمايدى. ال بۇل ءبىلىم وردالارى جاقىن ماڭايدا ورنالاسقان شاعىن جيناقى مەكتەپتەرمەن تاجىريبەسىن بولىسەدى. ناتيجەسىندە, اياداي اۋىلداردا وقيتىن بالالار دا ساپالى بىلىمگە قول جەتكىزەدى, – دەيدى د.توقتارباەۆ.
شىنى كەرەك, ءبىرشاما ۋاقىت بۇرىن مويىنقۇمدىقتار ء«بىزدىڭ اۋداننىڭ مەكتەپتەرى وسى جوباعا قاشان ەنەدى ەكەن؟» دەگەندى ءجيى ايتىپ جۇرەتىن. ويتكەنى شالعاي اۋدانداعى اۋىل تۇرعىندارى دا بالالارىنىڭ ىزدەنىس ىزىنە ءتۇسىپ, ساپالى بىلىممەن قامتىلعانىن قالايتىن. ەندى, مىنە, اۋدان ورتالىعىنداعى ءبىلىم ورداسى تىرەك مەكتەپتەردىڭ جەلىسىنە قوسىلىپ, جاڭا باعىتتا جۇمىس ىستەۋ مۇمكىندىگىنە يە بولىپ وتىر.
وبلىستىق ءبىلىم باسقارماسى باسشىسىنىڭ ورىنباسارى ايدىن دوسىباەۆا كەلتىرگەن دەرەككە زەر سالساق, الداعى ۋاقىتتا وڭىردە بىرنەشە جاڭا مەكتەپ بوي كوتەرەدى. ناتيجەسىندە, قوردالانعان بىرقاتار ماسەلە شەشىمىن تابادى.
– وسى جىلدىڭ قىركۇيەك ايىندا جامبىل اۋدانىنا قاراستى شوقاي اۋىلىنىڭ بالالارى جاڭا مەكتەپتە ءبىلىم الۋ مۇمكىندىگىنە يە بولدى. 150 ورىندىق ءبىلىم ورداسىندا وقۋشىلاردىڭ ساپالى بىلىممەن قامتىلۋى ءۇشىن بارلىق جاعداي قاراستىرىلدى. بۇدان بولەك, قاراشا, جەلتوقسان ايلارىندا تاعى بىرنەشە مەكتەپ پايدالانۋعا بەرىلمەك. سونداي-اق 11 نىساننىڭ قۇرىلىسى الداعى جىلى اياقتالادى. ءبىر سوزبەن ايتقاندا, ءوڭىردىڭ ءبىلىم سالاسىنداعى وتكىر ماسەلەلەردى شەشۋگە باسىمدىق بەرىپ وتىرمىز, – دەيدى ايدىن دوسىباەۆا.
ونىڭ ايتۋىنشا, بۇگىندە وڭىردە ءۇش اۋىسىمدى ءتورت مەكتەپ بار بولسا, وقۋشى ورنىنىڭ تاپشىلىعى بار ەكى مەكتەپ تىركەلگەن. بالالاردى ءۇش اۋىسىمدا وقىتاتىن ءتورت ءبىلىم ورداسىنىڭ ماسەلەسى 2024-2025 جىلدارى وڭىنان شەشىلمەك. سونداي-اق ەكى مەكتەپتىڭ ماسەلەسى قوسىمشا قۇرىلىس ەسەبىنەن شەشىمىن تاپپاق.
«اۋىلدىق جەرلەردەگى تىرەك مەكتەپتەردىڭ الەۋەتىن دامىتۋ» جوباسى اياسىندا اتقارىلاتىن جۇمىستىڭ اۋقىمى زور ەكەنىنە ەشكىمنىڭ كۇمانى جوق. ويتكەنى اۋدانداردا جاڭادان بوي كوتەرەتىن مەكتەپتەر از ەمەس. بولاشاقتا جاڭا ءبىلىم وردالارى دا جوباعا ەنۋى مۇمكىن. جوبا ءوز ميسسياسىن تولىق اياقتامايىنشا توقتامايدى دەپ سەنەمىز.
جامبىل وبلىسى,
مويىنقۇم اۋدانى
