وعان سەبەپ كوپ. وتان الدىنداعى ازاماتتىق بورىشىن وتەپ كەلگەننەن كەيىن ءوزىنىڭ اق مەكەنى اقدالا اۋىلىندا مەحانيزاتور بولىپ ەڭبەك جولىن باستاعان باقتىعالي اتالعان كەڭشاردا ءارتۇرلى جۇمىستار ىستەپ, ەڭبەكقورلىعىمەن تانىلعان. بۇدان سوڭ بالا كۇننەن قولىنا قالام ۇستاتقان اقىندىعى مەن يىعىنا ىلگەن فوتواپپاراتى شىعارماشىلىققا جەتەلەيدى. اۋداندىق «بالقاش ءوڭىرى» گازەتىنە وپەراتور, ءفوتوتىلشى, 2009-2016 جىلدار ارالىعىندا تالدىقورعان قالاسىنداعى «جەتىسۋ» تەلەارناسىندا شتاتتان تىس وپەراتور بولىپ تا قوسىمشا جۇمىس ىستەگەن باقتىعالي داۋىتباەۆ قازاقستان جۋرناليستەر وداعىنىڭ مۇشەسى, د.قوناەۆتىڭ تۋعانىنا 110 جىل تولعان مەرەكەلىك مەدالىنىڭ يەگەرى اتانعان تالانت يەسى.
ونىڭ قالامىنان تۋعان «كيەلى مەكەن», «كوكجيدە التىن بەسىگىم», «قازاقستان بارىستارى», «الاتاۋداي اسقارلى», «ناۋرىز», «جان انام», باسقا دا ولەڭدەرىنە سازگەرلەر ءان جازعان. «تاۋەلسىزدىككە-30 ءان» وبلىستىق بايقاۋعا قاتىسىپ, تاڭداۋلى 7 اقىننىڭ ىشىندە توپ جارعان «تاۋەلسىزدىك – ماڭگىلىك» اتتى ولەڭىنە ءان جازىلىپ, مادەني ءىس-شارالاردىڭ وزەگىنە اينالعان. باقتىعاليدىڭ دىنمۇحامەد قوناەۆقا ارناعان ولەڭىنە جازىلعان ءان دە وسى كۇنى بالقاش جۇرتىنىڭ جۇرەگىندە جاتتالعان دەسەك اسىرا ايتقاندىق ەمەس.
ونەرلى ازاماتتىڭ تاعى ءبىر قىرى – بۇگىنگى كۇنگە دەيىن جيناعان قالامساپتارىنىڭ سانى 1400-گە جەتىپتى.
«مەنىڭ كوللەكتسيامداعى قالامداردىڭ دەنى شىتىرلاق قالامدار. 2004 جىلدان باستاپ جيناپ كەلەمىن. قالام جيناۋعا دەگەن قىزىعۋشىلىعىم بالا كۇننەن باستالعان. ءوزىم ولەڭ جازاتىن بولعان سوڭ قالامساپتى باسقا دۇنيەدەن ارتىق كورەمىن. قالامدارىمنىڭ اراسىندا وليمپيادا چەمپيونى جاقسىلىق ۇشكەمپىروۆتىڭ جانە بالالار جازۋشىسى ءالي ىسقاباەۆتىڭ قالامدارى بار», دەگەن باقتىعالي داۋىتباەۆتىڭ قالامساپتار قورجىنى بيىلعى جىلى 18 قالاممەن تولىعىپتى. ونىڭ ىشىندە ەكەۋىن ۇلى بەكارىس يسپانيا مەملەكەتىنە بارعاندا ارنايى ساتىپ اكەلگەن بولسا, كۇيەۋبالاسى ەرسىننىڭ دە ارنايى تاپسىرىسپەن جاساتقان قالامسابى ەرەكشە كوز تارتادى.
وسىنداي قاسيەتتەرىمەن دارالانعان باقتىعالي – مەملەكەتتىك ءتىلدىڭ بىردەن-ءبىر جاناشىرى. ول انا ءتىلىمىزدىڭ مارتەبەسىن كوتەرىپ, ءوز تۇعىرىنا قونۋىنا ۇنەمى اتسالىسىپ, قيسىق-قىڭىر جارنامانى كوزى شالسا كەمشىلىگىن ايتىپ, سىن-ەسكەرتپە جاساۋدان جاسقانبايدى, ونىڭ ورىندالۋىن قاداعالاۋدى دا ۇلتجاندى ازاماتتىڭ وزىنە مىندەتتەپ العانى اڭعارىلادى.
بويىنا كىسىلىك پەن كىشىلىك, ەڭبەكقورلىق سىندى اسىل قاسيەتتەردى ءسىڭىرىپ, ادام قىزىعارلىق بىرقاتار ونەردى ارقالاپ جۇرگەن باقتىعالي داۋىتباەۆ ۇلكەن شاڭىراقتىڭ يەسى, جەتى بالانىڭ اكەسى. ومىردە وزىنە قولداۋ ءبىلدىرىپ, شىعارماشىلىعىنا دەمەۋ بولىپ جۇرگەن اياۋلى جارى, «التىن القا» يەگەرى مايرا وقاسوۆا ەكەۋىنىڭ ۇل-قىزدارى ەسەيىپ, الدى وتاۋ قۇرىپ ۇلگەرگەن. باعى مەن بابى ۇيلەسكەن شاڭىراقتا بۇگىندە بالداي ءتاتتى نەمەرەلەر ءوسىپ كەلەدى.
الماتى وبلىسى
