ەسكەكشىلەر ەڭسەمىزدى كوتەردى
كانوەدە ەسكەك ەسۋدەن التىن بولادى-اۋ دەگەن حابار تاراعاننان كەيىن, بارلىق جۋرناليست تاڭ اتپاي «Fuyang Water Sports Centre»-گە جينالدى. سەبەبى جەرگىلىكتى ۋاقىت بويىنشا ساعات 9:00-دە باستالاتىن جارىسقا قوناقۇيدەن جەتۋ ءۇشىن كەم دەگەندە ءبىر ساعاتتان اسا ۋاقىت ءجۇرۋ كەرەك ەدى. ونىڭ ۇستىنە سەرگەي ەمەليانوۆ پەن تيمۋر حايداروۆ باستاعان ەسكەكشىلەردىڭ التىن الاتىنىنا بارلىعىمىز سەندىك. سەنىم اقتالدى دا. ناتيجەسىندە, اراعا بىرنەشە كۇن سالىپ, قازاقستان قورجىنى ءتورتىنشى التىن مەدالمەن تولىقتى.
س.ەمەليانوۆ پەن ت.حايداروۆ باستاعان جۇپ 500 مەترلىك قاشىقتىقتا قارسىلاستارىنان اناعۇرلىم وزىپ, ازيا ويىندارىنىڭ التىن جۇلدەسىنە يە بولدى. سپورتشىلارىمىز جەڭىستەن كەيىن تىلشىلەرمەن تىلدەسىپ, الداعى جوسپارلارى تۋرالى ايتتى.
– ەموتسيا دەگەن كەرەمەت! بۇعان دەيىن ەكى ازيا ويىندارىندا كۇمىس جۇلدە الدىم. ءۇشىنشى ازيا ويىندارى مەن ءۇشىن ءساتتى باستالدى. العاشقى قاشىقتىقتا التىن الدىق. ەرتەڭ تيموفەي ەمەليانوۆپەن 1000 شاقىرىمدا باق سىناپ, بارىمىزدى سالامىز. جەڭىس بولادى دەپ ۇمىتتەنەمىن. كوڭىل كۇي – وتە كەرەمەت! مارەگە ءبىرىنشى بولىپ جەتۋ ەرەكشە سەزىم ەكەن. ەلىمىزگە التىن مەدال اكەلگەنىمىزگە قۋانىشتىمىز. تاعى قايتالايمىز دەگەن ويدامىن. ءبارى ويلاعانداي ءوتتى. ءبىز ءوز جۇمىسىمىزدى اتقاردىق. ناتيجەسىندە, قاشىقتىقتى سەنىمدى تۇردە يگەرىپ, ءبىرىنشى كەلدىك, – دەدى سەرگەي ەمەليانوۆ.
تيمۋر حايداروۆ جوسپارى تولىعىمەن ىسكە اسقانىن جەتكىزدى.
اراعا ءسال ۋاقىت سالىپ قازاقستان ايەلدەر قۇراماسى بايداركا مەن كانوەدە ەسكەك ەسۋدەن ەكى كۇمىس مەدال جەڭىپ الدى. جۇپتىق سىندا (500 مەتر) ماريا بروۆكوۆا مەن رۋفينا ىسقاقوۆا كۇمىس مەدالعا قول جەتكىزدى. بۇل سايىستا قىتاي ءبىرىنشى ورىندى جەڭىپ السا, تايلاند ءۇشىنشى ورىندى يەلەندى.
ال بايداركا جارىسىندا (500 مەتر) جۇپتىق سىننىڭ فينالىندا قازاقستان قۇراماسى ەكىنشى ورىن الدى. وسىلايشا, وتاندىق سپورتشىلار يرينا پودوينيكوۆا مەن ولگا شمەلەۆا كۇمىس مەدالدى قورجىنعا سالدى. بۇل سايىستا قىتاي قۇراماسى مارە سىزىعىنا ءبىرىنشى بولىپ جەتسە, ءۇشىنشى ورىن وزبەكستان قۇراماسىنا بۇيىردى.
وتانداستارىمىز باسەكە سوڭىنا دەيىن تارتىستى بولعانىن ايتادى.
– ءبىز التىن الامىز دەپ ويلادىق. بىراق بۇل – سپورت. بارىمىزدى سالدىق. باپكەرلەر سوڭىنا دەيىن قارسىلاستاردى العا جىبەرمەۋىمىزدى تالاپ ەتتى. ءبىز قالاي باستاساق, سول قارقىنمەن مارەگە دە جەتتىك, – دەدى و.شمەلەۆا.
ەرلەر اراسىندا بايداركادان جەكەلەي سىندا (1000 مەتر) كيريلل تۋباەۆ قولا مەدال ەنشىلەدى. التىن مەدال قىتايلىق دۋن چجانعا بۇيىرسا, كۇمىس جۇلدەنى وزبەكستاندىق شاحريەر ماحكاموۆ يەلەندى.
ال 1000 مەترلىك جارىستا جەكەلەي سىندا تيموفەي ەمەليانوۆ مارەگە ءۇشىنشى بولىپ جەتتى. ءبىرىنشى ورىندى تايپەيلىك كۋان-چە لا جەڭىپ السا, ەكىنشى ورىن وزبەكستاندىق ۆلادلەن دەنيسوۆكە بۇيىردى.
باتۋتتاعى گيمناستيكادان ەل نامىسىن قورعاعان سپورتشى قىزىمىز ۆيكتوريا بۋتولينا ازيا ويىندارىنىڭ قولا جۇلدەگەرى اتاندى. باسەكەنىڭ فينالىندا ۆيكتوريا 52,600 ۇپاي جيناپ, قىتاي قۇراماسىنىڭ سپورتشىلارى سيۋەين چجۋ (التىن) مەن يچەنگ حۋدان (كۇمىس) قالىپ قويدى.
ايتا كەتەيىك, 18 جاستاعى ۆيكتوريا بۋتولينا ءۇشىن بۇل – العاشقى ازيادا. ال سيۋەين چجۋ وسى باعدارلامادا توكيو وليمپياداسىنىڭ چەمپيونى اتانعان.
سۋ دوبىنان التىن بۇيىرسا…
سوڭعى جەتى ازيا ويىندارىندا التى رەت التىن مەدال ۇتىپ العان سۋ دوبىنان قازاقستاننىڭ ەرلەر قۇراماسى جارىستى جاقسى ناتيجەمەن باستادى. سپورتشىلارمىز گونكونگ كومانداسىمەن كەزدەسىپ, 25:4 ەسەبىمەن سەنىمدى جەڭىسكە جەتتى. بۇگىن ەل قۇراماسى جاپونيامەن باق سىناساتىن بولادى.
جارىس جولىندا – جەڭىل اتلەتتەر
كەشە كەشكە جەڭىل اتلەتتەر جارىس جولىنا شىقتى. التى باعدارلاما بويىنشا سىنعا تۇسكەن سپورتشىلارىمىز ەكى قولا مەدال جەڭىپ الدى.
قىزدار اراسىندا ادەلينا زەمس 400 مەترگە كەدەرگىمەن جۇگىرۋ سايىسىندا 57,16 سەكۋند ناتيجەسىمەن 3-ورىنعا يە بولدى.
ال ادەلينا زەمس, ەفيم تاراسوۆ, اناستاسيا زاليۋبوۆسكايا جانە دميتري كولبوۆ باستاعان كوماندالىق ەستافەتادا قازاقستان قۇراماسى قولا جۇلدەنى يەلەندى. نەگىزى جەرلەستەرىمىز مارە سىزىعىن ءتورتىنشى بولىپ كەسكەن ەدى. الايدا شري-لانكا كومانداسى جارىس ەرەجەسىن بۇزعانى ءۇشىن جۇلدەگەرلەر قاتارىنان الىنىپ تاستالدى.
اۋىر اتلەتتەر «نوكاۋت» الدى
اۋىر اتلەتتەردەن مازا كەتكەلى قا-شان! بۇرىنعىداي سىڭعىرلاتىپ التىن الاتىن كەزەڭدەر كەلمەسكە كەتكەن سەكىلدى. ايتپەسە, ازيا ويىندارىندا اۋىر اتلەتتەرىمىزدىڭ ۆ توبىندا سىنعا تۇسكەنى ەرسى كورىنەدى ەكەن. 59 كيلودا سىنعا تۇسكەن التىناي تاڭىربەرگەنوۆا مەن داريا بالابايۋك 8-9-ورىندارعا جايعاسسا, ريو وليمپياداسىنىڭ قولا جۇلدەگەرى كارينا گوريچەۆا (64 كگ) بار-جوعى بەسىنشى ورىننان كورىندى (ا توبى).
سونىمەن قاتار بۇل كۇنى شاحماتتان قىزدار قۇراماسى ۆەتنام قۇراماسىن 3:1 ەسەبىمەن جەڭدى.
قازاقستاننىڭ باسكەتبول قۇراماسى جەڭىلىس تاپتى. ەرلەر اراسىنداعى جارىستىڭ 1/8 فينالىندا قازاقستان تايپەي قۇراماسىمەن كەزدەستى. الايدا وتانداستارىمىز بۇل ماتچتا جەڭىسكە جەتە المادى. كەزدەسۋ 62:83 ەسەبىمەن قارسىلاستاردىڭ جەڭىسىمەن اياقتالدى.
ال ۆولەيبولدان قازاقستان ايەلدەر قۇراماسى دا جاپونيالىق قارسىلاستارىنا ەسە جىبەردى. توپتىق كەزەڭ اياسىندا وتكەن بۇل ماتچتا ۆولەيبولشىلارىمىز 17:25, 20:25, 13:25 ەسەبىمەن جەڭىلىپ قالدى.
ترامپليننەن سۋعا سەكىرۋ ىرىكتەۋىنەن سۇرىنبەي وتكەن نازار قوجانوۆ فينالدىق سىندا 10-ورىننان كورىندى.
