ەكىباستۇزدا جىلۋ بەرۋ ماۋسىمى باستالدى

مۇنداعى قايتا جاڭارتىلعان № 2, 5, 8, 12 ءتورت جىلۋ ماگيسترالىنە جۇرگىزىلگەن گيدراۆليكالىق سىناقتار مەن جەلىلەردى جۋ جۇمىستارى ءساتتى اياقتالعان. قازىر ماگيسترالدار حيميالىق تازارتىلعان سۋمەن تولتىرىلىپ جاتىر.

كوكتەم مەن كۇز مەزگىلدەرىندەگى گيدراۆليكالىق سىناقتار كەزىندە انىقتالعان بارلىق اقاۋلار جويىلعان. جەلىلەر جىلۋ جانە ىستىق سۋمەن قامتاماسىز ەتۋ ءۇشىن جىلۋ ەنەرگياسىن بەرۋگە دايىن تۇر.

قالاعا جىلۋ بەرۋدى باستاۋ ماقساتىمەن ەكىباستۇزعا كەلگەنىن جانە قالادا ءۇش كۇن بولاتىنىن ايتقان وبلىس اكىمى: «ىسكە قوسۋ كەزىندە جىلۋ جەلىلەرى قىزمەتكەرلەرىنىڭ, ەنەرگەتيكتەردىڭ جانە جەرگىلىكتى اكىمدىكتىڭ جۇمىسى جىلۋمەن جابدىقتاۋدىڭ بارلىق جۇيەسىن تەڭدەستىرۋگە باعىتتالاتىن بولادى. بۇل رەتتەۋدى قاجەت ەتەتىن تەحنولوگيالىق تۇرعىدان كۇردەلى جۇيە, سوندىقتان, قازان ايىنىڭ باسىندا ءبىز ونى تاۋلىك بويى باقىلايتىن بولامىز. بارلىق جەلىلەر دايىن. ەكىباستۇزدا بارلىعى 400 شاقىرىمعا جۋىق جەلى بار, ونىڭ 74 شاقىرىمى اۋىستىرىلدى, بۇل 20%-دان ءسال عانا تومەن. وكىنىشكە قاراي, قالعان 80%-ى ەسكى جەلىلەر جانە ولاردا جىلۋ بەرگەندە جەدەل تۇردە جويىلاتىن كىشىگىرىم اقاۋلار ورىن الۋى مۇمكىن. وتكەن جىلى بولعان جاعدايعا جول بەرمەيمىز», دەدى.

جىلۋ بەرۋ بارىسىندا انىقتالعان ەسكەرتۋلەردى جەدەل جويۋ ءۇشىن 19 جوندەۋ بريگاداسىنىڭ كەزەكشىلىگى ۇيىمداستىرىلعان.

ەكىباستۇز جەو-دا 4 قازاندىق اگرەگاتى (3 ەنەرگەتيكالىق جانە 1 سۋ جىلىتۋ) دايىن. 10 قازانعا دەيىن تاعى 2 سۋ جىلىتۋ قازاندىعى ىسكە قوسىلادى, ال, قالعان 4 قازاندىق قازان ايىنىڭ سوڭىنا دەيىن اياقتالادى.