فوتو: بەينەكادر
«ازيا ويىندارىنا شاقىرتۋ العان كەزدە قاتتى قۋاندىم. ەڭ العاشقى ۇلكەن جارىس بولعاندىقتان قوبالجۋ دا بولدى, قوبالجۋ-قورقىنىشىمدى جەڭۋگە اتا-انامنىڭ قولداۋى جاردەمدەستى», دەيدى ەركەجان سۇلەيمەن.
13 جاسار ءدىلناز نىعمەتجانوۆنىڭ كوگالداعى حوككەيمەن اينالىسىپ جۇرگەنىنە جەتى جىلدان اسقان. ءبىراز جەتىستىككە جەتىپ ۇلگەرگەن ول سپورت شەبەرى اتاعىنا ۇمىتكەر جانە ەڭ ۇزدىك جاس سپورتشى اتاعىن العان.
«بۇل مەنىڭ تۇڭعىش ازيادام. باستى ارمانىم - قازاقستاننان شىققان تۇڭعىش الەم چەمپيونى اتانۋ», دەيدى ءدىلناز نىعمەتجانوۆا.
قازاقستان قۇراماسى ازيا ويىندارى باستالماس بۇرىن ءۇندىستاندا وقۋ-جاتتىعۋ جيىندارىن وتكىزگەن. ايتا كەتسەك, ءۇندىستان, قىتاي, جاپونيا كوماندالارى حوككەيدەن الەمنىڭ ۇزدىك قۇرامالارى سانالادى. سول سەبەپتى ازيادادا باسەكەلەستىك دەڭگەيى وتە جوعارى بولعالى تۇر.
«كوماندانىڭ بولاشاعىن ويلاعاندىقتان قابىلەتتەرىنە قاراي وسى ەكى قىزدى تاڭداپ, ازيا ويىندارىنا الىپ كەلدىك. سەبەبى وسىنداي دارەجەدەگى جارىستار كەرەمەت تاجىريبە بەرەدى. بولاشاقتا وسى جاس سپورتشىلار ۇلتتىق قۇرامانى جەڭىسكە جەتەلەيدى دەپ ۇمىتتەنەمىز», دەدى كوگالداعى حوككەيدەن قازاقستاننىڭ قىزدار قۇراماسىنىڭ باس باپكەرى نۇرجان بەيبىتوۆ.
ايتا كەتۋ كەرەك, بۇگىن كوگالداعى حوككەيدەن قازاقستان قىزدار قۇراماسى يندونەزيانى 2:1 ەسەبىمەن ۇتىپ, ازيا ويىندارىندا العاشقى جەڭىسكە قول جەتكىزدى.
