وتاندىق دەلەگاتسيانى پرەمەر-ءمينيستردىڭ ورىنباسارى سەرىك جۇمانعارين باسقاردى. وتىرىستا ەاەو-عا مۇشە ەلدەر قازاقستاندىق تاراپتىڭ باستاماسىمەن تاعى ەكى ۇسىنىستى قولداپ, قابىلدادى. ءبىرىنشى ماسەلە – ەاەو بويىنشا ارىپتەس ەلدەردىڭ مەملەكەتتىك ساتىپ الۋلارىنا بيزنەستىڭ قاتىسۋى ءۇشىن قولجەتىمدى تاۋارلار مەن قىزمەتتەردىڭ ءتىزىمىن ودان ءارى كەڭەيتۋ. قازاقستان بۇل جۇمىستى كەزەڭ-كەزەڭىمەن جۇرگىزىپ كەلەدى. وتكەن وتىرىستا ساتىپ الۋعا قاتىسۋعا بولاتىن تىزبەگە اۋىر ماشينا جاساۋ جانە ولشەۋ قۇرالدارى سالالارى ەنگىزىلدى. ارنايى, اۋىر ماشينا جاساۋ, حيميا جانە مۇناي-گاز ونەركاسىبى, ولشەۋ قۇرالدارى سالالارىندا 7 تاۋار پوزيتسياسى بويىنشا شارتتار, وندىرىستىك جانە تەحنولوگيالىق وپەراتسيالار بەلگىلەندى.
ەكىنشى ۇسىنىس دارىلىك زاتتاردى سايكەستەندىرۋ قۇرالدارىمەن تاڭبالاۋعا قاتىستى. 2025 جىلعا قاراي دارىلىك پرەپاراتتاردىڭ بىرىڭعاي نارىعىن قالىپتاستىرۋ ءۇشىن قاجەتتى قۇجات 2021 جىلدان باستاپ تالقىلانىپ كەلەدى. قازاقستاندىق تاراپتىڭ ۇسىنىستارى ءوز اۋماقتارىندا تاڭبالاۋ جاساعان ەاەو-عا مۇشە مەملەكەتتەردىڭ دارىلىك پرەپاراتتاردى سايكەستەندىرۋ قۇرالدارىن ءوزارا تانۋ شارتتارىنا قاتىستى بولدى. وسى نورمالار ءالى قابىلدانباعان ەلدەر ەكسپورت كەزىندە ءوز پرەپاراتتارىن تاۋارلار جەتكىزىلەتىن مەملەكەتتىڭ زاڭناماسىنا سايكەس تاڭبالايدى.
جەكە تۇلعالار مەن ونلاين ساۋدانى تاڭدايتىندارعا ماڭىزدى شەشىمدەردىڭ ىشىندە 2024 جىلعى 1 ساۋىرگە دەيىن ەاەو كەدەندىك اۋماعىنا جەتكىزىلەتىن جەكە پايدالانۋعا ارنالعان تاۋارلاردىڭ, ياعني زاتتاردىڭ 1000 ەۋرو مولشەرىندەگى شەكتى قۇنى ۇزارتىلدى. بۇل ۋاقىتشا شارا ونلاين-ساۋدانى قولداۋدى قامتاماسىز ەتۋگە جانە ەاەو-عا مۇشە مەملەكەتتەر ازاماتتارىنىڭ يمپورتتىق تاۋارلارعا دەگەن سۇرانىسىن قاناعاتتاندىرۋعا ارنالعان.
ەەك كەڭەسى اۋا رايى بولجامى جانە مەتەورولوگيا سالالارىنداعى قىزمەتتەر سەكتورى بويىنشا اكىمشىلىك ىنتىماقتاستىق تۋرالى كەلىسىمنىڭ جوباسىن ماقۇلدادى. قۇجات قاتىسۋشى ەلدەردىڭ سايتتارىندا ەركىن قولجەتىمدىلىك قامتاماسىز ەتىلەتىن اقپاراتتىڭ تىزبەسىن جانە ءوزارا اقپاراتتىق ءىس-قيمىل ءتارتىبىن ايقىندايدى. كەلىسىم ەۋرازيالىق ەكونوميكالىق وداق اياسىندا اۋا رايى بولجامى جانە مەتەورولوگيا بويىنشا قىزمەتتەردىڭ بىرىڭعاي نارىعىن قالىپتاستىرۋعا مۇمكىندىك بەرەدى.
كەدەن وداعىنىڭ ەت جانە ەت ونىمدەرىنىڭ قاۋىپسىزدىگى تۋرالى تەحنيكالىق رەگلامەنتىنە وزگەرىستەر ەنگىزىلدى. وزگەرىستەر ەت ونىمدەرىن تۇتىنۋشىلاردى شاتاستىرماۋ ءۇشىن تاعامدىق زاتتاردىڭ مولشەرىن جانە رۇقسات ەتىلگەن اۋىتقۋلاردى دۇرىس كورسەتۋدى باقىلاۋعا بايلانىستى ماسەلەلەردى شەشۋگە باعىتتالعان.
سونداي-اق كەدەندىك, تەحنيكالىق رەتتەۋ, ەنەرگەتيكا جانە ءوزارا اقپاراتتىق ءىس-قيمىل سالالارىنداعى ەكونوميكالىق ينتەگراتسيانى دامىتۋعا باعىتتالعان بىرقاتار ماسەلە قارالىپ, قابىلداندى.
