16 قىركۇيەكتە باستالعان ءداستۇرلى «جاسىل استانا» ەكولوگيالىق ايلىعى 14 قازانعا دەيىن جالعاسادى. وسى ايلىق اياسىندا وتكەن سەنبىدە جالپىقالالىق سەنبىلىك ءوتتى. بۇعان بىلەك سىبانىپ, قالا تۇرعىندارى بەلسەنە قاتىستى. سونداي-اق تازالىق ءىس-شاراسىنا بيزنەس وكىلدەرى, كاسىپورىندار, ۇيىمدار, ونىڭ ىشىندە «قازاقستان عارىش ساپارى», «قازمۇنايگاز» ۇك» اق اتسالىستى.
كوممۋنالدىق سەنبىلىك اياسىندا 1 240 جاسىل جەلەك وتىرعىزىلدى. سەنبىلىكتەر اياسىندا بۇگىنگە دەيىن اۋدانى 1 ملن 360 مىڭ شارشى مەتردەن اسا ساياباقتار مەن الاڭدار تازارتىلدى. 108 بىرلىك تيەۋ تەحنيكاسى جانە 215 بىرلىك جۇك تەحنيكاسى جۇمىلدىرىلدى.
جالپى, 16 قىركۇيەك پەن 23 قىركۇيەك ارالىعىنداعى كەزەڭدە سەنبىلىككە 66 مىڭنان اسا ادام قاتىستى. 2 400-دەن اسا جاسىل جەلەك وتىرعىزىلدى. استانا قالاسىنداعى قاتتى تۇرمىستىق قالدىقتار پوليگونىنا 108 توننادان اسا قالدىق جينالىپ, تاسىمالداندى.
وسىناۋ يگى باستاما جالعاسىن تاۋىپ, ايلىق اياسىندا قالالىق قىزمەتتەردى, ەڭبەك ۇجىمدارىن جانە بەلسەندى قالا تۇرعىندارىن جۇمىلدىرا وتىرىپ, بىرنەشە كوممۋنالدىق جانە جالپىقالالىق سەنبىلىك وتكىزىلەدى.
