سۋرەتتەردى تۇسىرگەندەر – سالي سابيروۆ, تۇرار قازانعاپوۆ (سپورتتى دامىتۋ ديرەكتسياسى)
ازيا ويىندارىنىڭ رەكوردى تىركەلدى
جوعارىدا ايتقان ستەند اتۋدىڭ سكيد باعدارلاماسى بويىنشا قۇرامىندا اسەم ورىنباي, زويا كراۆچەنكو جانە ولگا پانارينا ونەر كورسەتەتىن ءبىزدىڭ كوماندا جالپى 350 ۇپاي جيناپ, جارىس رەكوردىن جاڭارتتى.
ال جەكەلەي سايىستا اسەم ورىنباي قولا جۇلدەگە قول جەتكىزدى. وسى جەڭىستەن كەيىن تۋريزم جانە سپورت ءمينيسترى ەرمەك مارجىقپاەۆ سپورتشىلاردى قۇتتىقتاپ, الداعى ۋاقىتتا سپورتشىلارىمىزدىڭ الاتىن التىن مەدالدارى كوپ بولاتىنىنا سەنىم ءبىلدىردى.
53 جاستاعى چەمپيون
ستەند اتۋدىڭ سكيد باعدارلاماسىندا التىن يەلەنگەن ۇشەۋدىڭ ءبىرى ولگا پانارينا ەكەنىن ايتتىق. ول – 53 جاستا. ازيادانىڭ سۋ جاڭا چەمپيونى مەن رەكوردشىسىنىڭ نەمەرەسى ءوسىپ كەلەدى.
– بىرىنشىدەن, كوپ جاتتىعامىن. ەكىنشىدەن, سپورتشىلار قارتايمايدى. نىسانا كوزدەۋ – بۇل مەنىڭ ومىرلىك ءىسىم. سوندىقتان وعان ارقاشان كۇش تابىلادى. كوماندالاستارىما العىس ايتقىم كەلەدى. مەنەن كەڭەس سۇراعاندارعا, ارقاشان كومەكتەسۋگە تىرىسامىن. ۇجىمىمىز وتە تاتۋ. مەنىڭشە, بۇل جەڭىس – وسى كوماندالىق رۋحتىڭ جەمىسى. بۇل مەدالىمدى اتا-اناما ارناعىم كەلەدى. ولار ارقاشان مەنىمەن بىرگە, – دەدى و.پانارينا.
ەكى دۇركىن قولا جۇلدەگەر
حانچجوۋداداعى دودادا وتانداسىمىز ادىلبەك مۋسين قولا جۇلدەگەر اتاندى. ول 100 مەترگە باتتەرفلياي ادىسىمەن جۇزۋدەن ۇزدىك ۇشتىككە ەندى. كورسەتكىشى – 51.86 سەكۋند. التىن مەدالدى جاپوندىق كاتسۋحيرو ماتسۋموتو (51.13), كۇمىستى قىتايلىق چانگحاو ۆانگ (51.24) جەڭىپ الدى.
ايتا كەتەلىك, بۇل ادىلبەكتىڭ جەتىك مەڭگەرگەن قاشىقتىعى سانالادى. ءبىزدىڭ سپورتشى وسىمەن جۇزۋدەن ازيا ويىندارىنىڭ ەكىنشى قولاسىن يەلەنىپ وتىر. بۇعان دەيىن ول يندونەزيادا وتكەن ازيادادا كوماندالىق ەستافەتادان جۇلدە العان-دى.
نامىستى قىز جەڭىمپازدار قاتارىندا
جازعى ازيادادا قازاق قىزى تۇرسىن ايان ۋ-شۋدان قولا جۇلدەگەر اتاندى. 52 كيلوعا دەيىنگى سالماقتىڭ جارتىلاي فينالىندا وتانداسىمىز جارىس قوجايىنى يۋەياو ليگە ەسە جىبەردى.
– ۇتىلىپ قالعانىما نامىستانىپ تۇرمىن (جىلاپ جىبەردى). قارسىلاسىم الەم چەمپيونى, دارەجەسى جوعارى ەكەنى كورىنىپ تۇر. الداعى جارىستاردا التىن الۋ ءۇشىن دايىندالىپ كەلەمىن. مۇنىمەن توقتاپ قالمايمىز. ازيا ويىندارى مەنىڭ ارمانىم ەدى. وسى جارىسقا قاتىسىپ, ارمانىم ورىندالعانىنا قۋانىشتىمىن. دوداعا قاتىسۋعا سەبەپكەر بولعان جاندارعا, باپكەرلەرگە العىسىم شەكسىز, – دەدى سپورتشى.
قىتايدىڭ ۇلتتىق سپورتى ۋ-شۋدىڭ ساندا ءتۇرى ازيا ويىندارىنىڭ باعدارلاماسىندا 1998 جىلدان (ەرلەر) بار. ايەلدەردىڭ باسەكەسى 2010 جىلى قوسىلدى. نازىكجاندىلار ەكى سالماقتا (52 كگ, 60 كگ), ەرلەر بەس سالماقتا (56 كگ, 60 كگ, 65 كگ, 70 كگ, 75 كگ) جۇلدەلەردى ساراپقا سالادى.
شاحماتشىلاردان قايىر بولمادى
جازعى ازيا ويىندارىندا شاحماتتان قازاقستان نامىسىن الەمدە مىقتى سانالاتىن ءبيبىسارا اساۋباەۆا مەن جانسايا ابدىمالىك قورعاعان ەدى. الايدا چەمپيون قىزداردان قايىر بولمادى. ءبيبىسارا جارىستى 5-ورىنمەن, جانسايا 8-ورىنمەن ءتامامدادى.
ايەلدەر اراسىنداعى باسەكەدە قىتاي قىزدارى التىن مەن قولانى ءوزارا بولىسسە, كۇمىستى وزبەكستان وكىلى يەلەندى. ەرلەر اراسىنداعى باسەكەدە قازىبەك نوگەربەك – 10, رينات جۇماباەۆ 16-ورىننان كورىندى.
ايتكەنمەن, قازاقستان شاحمات فەدەراتسياسىنىڭ اتقارۋشى ديرەكتورى گۇلميرا داۋلەتوۆانىڭ ايتۋىنشا, كوماندالىق جارىستا قىزدارىمىز ۇزدىكتەر ساپىنان كورىنەدى.
– كوماندالىق جارىستا جۇلدە الۋعا قىزدارىمىزدىڭ شاماسى جەتەدى. قازىر كومانداداعى بەس شاحماتشىمىز وسىندا كەلدى, دايىندىق ۇستىندە. بۇيىرتسا, جۇلدە الامىز دەپ وتىرمىز, – دەدى گ.داۋلەتوۆا.
بوكسشىلار جاراپ تۇر
قىزدارىمىز دا, ۇلدارىمىز دا ازىرشە جەڭىلىسسىز كەلە جاتىر. كەشە ءبىزدىڭ بوكسشىلاردان ءبىرىنشى بولىپ ەكى دۇركىن الەم چەمپيونى نازىم قىزايباي رينگكە كوتەرىلدى. ايەلدەر اراسىنداعى 50 كيلو سالماقتا باق سىناپ جاتقان وتانداسىمىز نەپالدىق تامانگ سۋسمانى ايقىن باسىمدىقپەن جەڭىپ (5:0), كەلەسى اينالىمعا شىقتى.
– شۇكىر, ءبىرىنشى جەكپە-جەكتى جەڭىسپەن باستادىم. ەندى الدا تاعى كەزدەسۋلەر بولادى. جەڭىسكە جەتۋگە ۇمتىلامىن. بۇل جەرگە ەشكىم جەڭىلۋ ءۇشىن كەلمەيدى عوي. ءار كەزدەسۋگە تولىقتاي دايىندالىپ ءجۇرمىن. جەڭىپ جاتقاننان كەيىن باپكەرلەرىم «اسىقپاي قيمىلدا» دەدى. ءۇش راۋند بويى جاقسى ونەر كورسەتتىم دەپ ويلايمىن. كەلەسى قارسىلاستارىم ەكى جەكپە-جەك وتكىزىپ ۇلگەرگەن. بۇگىن ءبىرىنشى كۇن قيىنىراق بولادى دەپ ويلاپ ەدىم. ادەتتە, العاشقى جەكپە-جەك ءار كەز قيىن بولادى عوي. بىراق دايىندىعىمنىڭ ارقاسىندا شارشامادىم. ءبىز ءار جارىسقا ۇلكەن ەڭبەكپەن كەلەمىز. ازيا ويىندارىندا ءبىز ءۇشىن ليتسەنزيا بەرىلەدى. سوندىقتان بۇعان پسيحولوگيالىق تۇرعىدا دايىندالدىق. ەڭ باستى ماقسات – ليتسەنزيا جەڭىپ الۋ. ءبارىن ۋاقىت كورسەتەدى, – دەدى بوكسشى.
وتانداسىمىز ساعىندىق توعامباي دا ازيا ويىندارىن جەڭىسپەن باستادى. ول موڭعوليالىق قارسىلاسىن مەرزىمىنەن بۇرىن جەڭدى. 92 كيلودا سىنعا تۇسكەن ساعىندىق بارياحاان دورجپەندى العاشقى ەكى راۋندتا ەكى رەت نوكداۋنعا ءتۇسىردى.
وزبەكستاندىق قازاق جارىستى ەرتە اياقتادى
63,5 كيلودا سىنعا تۇسكەن ەرتۋعان زەينۋللينوۆ 1/8 اينالىمدا تاجىكستاندىق بوكسشى باحادۋر وسمونوۆپەن قولعاپ ءتۇيىستىردى. باحادۋر – تاشكەنتتە وتكەن الەم چەمپيوناتىنىڭ قولا جۇلدەگەرى جانە 2019 جىلعى ازيا چەمپيونى. ەكى بوكسشى اراسىنداعى كەزدەسۋ وتە تارتىستى ءوتتى. جەكپە-جەك باستالىسىمەن ەكەۋىنىڭ دە قاباعى جارىلىپ, دارىگەرلەر ەكى سپورتشىعا دا بىرنەشە رەت كومەك كورسەتتى. سونداي-اق ەكى بوكسشى دا ءبىر-بىردەن نوكداۋن الدى. تورەشىلەر تارتىستى كەزدەسۋدە 3:2 ەسەبىمەن جەڭىستى قازاق بالاسىنا بەردى.
الەم چەمپيوناتى دەمەكشى, 2023 جىلعى الەم بىرىنشىلىگىنىڭ جەڭىمپازى رۋسلان ابدۋللاەۆ ازيا ويىندارىن ەرتە اياقتادى. ول موڭعوليالىق بااتارسۋحين چينزوريگكە ەسە جىبەردى. رۋسلان موڭعول بوكسشىسىن الەم چەمپيوناتىنىڭ فينالىندا باسىم تۇسكەن ەدى. بۇل جولى 0:5 ەسەبىمەن جەڭىلىس تاپتى.
