ن.ءجانتورين اتىنداعى اتىراۋ وبلىستىق فيلارمونياسىنىڭ قۇرامىنا كىرەتىن بۇل وركەستردىڭ كوركەمدىك جەتەكشىسى – ديريجەر, مادەنيەت سالاسىنىڭ ۇزدىگى ەرجان قيتاروۆ. وركەستر قۇرامىندا 60-تان استام مۋزىكانت جۇمىس ىستەيدى. وركەستردىڭ ساپارى الدىمەن ۆولودار اۋدانىنداعى التىنجار اۋىلىنان باستالدى.
بۇل – رەسەيدەگى قانداستار عانا ەمەس, تۋريستەر دە ءجيى كەلەتىن اۋىل. ويتكەنى مۇندا قازاقتىڭ كۇي ونەرىنىڭ نەگىزىن قالاۋشىلاردىڭ ءبىرى, ارتىنا مول مۇرا قالدىرعان ايگىلى كومپوزيتور قۇرمانعازى ساعىرباي ۇلى ماڭگىلىك تىنىستاپ جاتىر. رەسەيمەن شەكارالاس وڭىرلەردىڭ قولداۋىمەن 1996 جىلى كۇيشىگە كەسەنە تۇرعىزىلعان. ال 2005 جىلى قۇرمانعازى اتىنداعى وڭىرلىك مادەني ورتالىعى اشىلدى.
التىنجار اۋىلىنداعى تۇرعىنداردىڭ ءبارى دەرلىك دومبىرا شەرتەدى. ولار مۇنى كۇي اتاسىنىڭ اماناتىنداي سەزىنەدى. قوس ىشەكتى اسپاپتى بەبەۋلەتەتىن دومبىراشىنىڭ ءبىرى – قۇرمانعازى اتىنداعى وڭىرلىك مادەني ورتالىعىنىڭ ديرەكتورى امانگەلدى ابىلعازيەۆ.
ورتالىق ديرەكتورى امانگەلدى ابىلعازيەۆتىڭ ايتۋىنشا, قازىر بۇل ورتالىق الىس-جاقىن شەتەلدەردىڭ تۋريستەرى قىزىعۋشىلىق تانىتقان مادەنيەت وشاعىنا اينالىپ وتىر. ۇلى كۇيشىنىڭ شىعارماشىلىعى, ءومىرى تۋرالى سىر شەرتەتىن ەكسپوناتتار قويىلعان ورتالىقتا مۋزەي مەن تۋريستەر ءۇشىن قوناقۇي بوي كوتەرگەن. ورتالىقتا 40-قا جۋىق ادام جۇمىس ىستەيدى. دەنى قانداستارىمىز, اراسىندا 25 دومبىراشى بار. سونداي-اق «سامال» قازاق مۋزىكالىق ءانسامبلىنىڭ انشىلەرى ونەرىمەن كەلۋشىلەردى ءتانتى ەتىپ كەلەدى.
ء«بىزدىڭ ورتالىققا جىل سايىن 1000-عا جۋىق ادام كەلەدى. قۇرمانعازى ساعىرباي ۇلىنىڭ, ونىمەن زامانداس بولعان قازاقتاردىڭ ءومىرى تۋرالى ماعلۇمات بەرەمىز. اتىراۋ وبلىسىنىڭ اكىمدىگى مەن جاناشىر ازاماتتاردىڭ قولداۋىمەن مادەني ورتالىققا كۇردەلى جوندەۋ جۇرگىزىلدى. قازىر ورتالىقتىڭ قىزمەتىندە تىڭ ىزدەنىس, سەرپىن بار», دەيدى ورتالىق ديرەكتورى امانگەلدى ابىلعازيەۆ.
وسىنداي تاريحي مەكەننەن باستاۋ العان اتىراۋلىق وركەستردىڭ ونەرى استراحان وبلىستىق فيلارمونياسىندا جالعاستى. مۇنايلى وڭىردەن بارعان ونەر ۇجىمىنىڭ كونتسەرتىنە قازاقستان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى داۋرەن اباەۆ, اتىراۋ وبلىسى اكىمىنىڭ ورىنباسارى جاسۇلان بيسەمبيەۆ, رەسەيلىك كورەرمەن قاتىستى.
ق.احمەدياروۆ اتىنداعى «نارىن» حالىق اسپاپتار وركەسترى مادەنيەت سالاسىنىڭ ۇزدىكتەرى ەرجان قيتاروۆ پەن سايا جۇماشەۆانىڭ جەتەكشىلىگىمەن رەسەيلىك كورەرمەنگە ۇلتىمىزدىڭ جاۋھار تۋىندىلارى مەن شەتەلدىك شىعارمالاردى ۇسىندى. ونەردى سۇيەتىن كورەرمەن وركەستردىڭ ورىنداۋىنداعى ماحامبەتتىڭ, قۇرمانعازى مەن داۋلەتكەرەيدىڭ, ا.جۇبانوۆ پەن ع.قۇرمانعاليەۆتىڭ, ق.احمەدياروۆ پەن ە.برۋسيلوۆسكيدىڭ, گ.سۆيريدوۆ پەن ل.ءحاميديدىڭ, ءى.جاقانوۆ پەن ە.قۇسايىنوۆتىڭ تۋىندىلارىنا ىستىق ىقىلاسىن ءبىلدىردى. سونداي-اق مادەنيەت قايراتكەرى قۇتتىگەرەي دۇيسەەۆ, حالىقارالىق جانە رەسپۋبليكالىق كونكۋرستاردىڭ لاۋرەاتتارى جاسۇلان بازارباەۆ, مەرۋەرت ءۋالي, باۋبەك ومىرعالي, ەرىك كوشەروۆ, ارايلىم قيسياروۆا ونەر كورسەتتى.
قازاق وركەسترىنىڭ ونەرىن رەسەيدە تۇراتىن كورەرمەن جوعارى باعالادى. ماسەلەن, كورشى ەلدەگى قانداسىمىز كۇلاش ۇمبەتاليەۆانىڭ پىكىرىنشە, اتا جۇرتتاعى ونەر ۇجىمدارىنىڭ كونتسەرتىن تاماشالاۋ ۇدايى بولا بەرمەيدى. مۇنداي گاسترولدىك ساپار اسىرەسە جاس بۋىننىڭ ۇلتتىق مۋزىكا ونەرىن ۇمىتپاۋى ءۇشىن قاجەت.
ال استراحان وبلىسىنىڭ مادەنيەت ءمينيسترى ولگا پروكوفەۆانىڭ دەرەگىنە سۇيەنسەك, وڭىرارالىق مادەني ارىپتەستىكتىڭ كوكجيەگى كەڭەيىپ كەلەدى. جاقىندا كاسپي ماڭىنداعى بەس مەملەكەتكە ورتاق مادەني ءىس-شارا – «كاسپي ماۋسىمى» فەستيۆالى باستالعان.
«قازاقستان – تەك گەوگرافيالىق ورنالاسۋى جاعىنان عانا ەمەس, تاريحي, مادەني تۇرعىدان رەسەيگە ەڭ جاقىن ورنالاسقان ەل. ال اتىراۋ مەن استراحان وبلىستارىنىڭ تۇرعىندارى ءبىر-بىرىمەن بۇرىننان الەۋمەتتىك-ەكونوميكالىق تۇرعىدان تىعىز قارىم-قاتىناس, بەرىك بايلانىس ورناتىپ كەلەدى. دوستىق راۋىشتەگى رۋحاني بايلانىسىمىزدا شەكارا جوق. اتىراۋ وڭىرىندەگى تۇرعىندار الدىندا «سكيف» كۆارتەتى ونەر كورسەتتى. ەندى, مىنە, اتىراۋلىق وركەستردىڭ ونەرىن تاماشالادىق. ەلدەر اراسىندا شەكارا بولاتىنى داۋسىز. الايدا ونەرگە شەكارا كەدەرگى بولا المايتىنىنا كوزىمىز جەتتى», دەيدى ولگا پروكوفەۆا.
اتىراۋ وبلىسى اكىمىنىڭ ورىنباسارى جاسۇلان بيسەمبيەۆتىڭ ايتۋىنشا, ەكى ءوڭىردىڭ ونەر ۇجىمدارىنىڭ ساپارى ءجيى ۇيىمداستىرىلادى. مۇنداي بايلانىس بارلىق سالادا كەڭ قانات جايعان. ەندى مەديتسينا سالاسىنا مامان دايارلاۋدى بىرلەسە اتقارۋعا باسا ءمان بەرىلگەلى وتىر.
«استراحاندا بىلىكتى دارىگەرلەردى دايارلايتىن مەديتسينا ۋنيۆەرسيتەتى بار. قازىر اتالعان ۋنيۆەرسيتەتتە قازاقستاننان 140 ستۋدەنت وقىپ ءجۇر. ۋنيۆەرسيتەت باسشىلارىمەن كەزدەسىپ, ستۋدەنتتەردى اتىراۋ وبلىسىنىڭ مەديتسينا مەكەمەلەرىندە جۇمىسقا ورنالاستىرۋ ماقساتىندا مەموراندۋم جاساقتاۋ جونىندە ۋاعدالاستىق. الداعى ۋاقىتتا اتىراۋدا اتالعان ۋنيۆەرسيتەتتىڭ فيليالىن اشۋ تۋرالى ۇسىنىس بىلدىردىك. بۇل اتىراۋ وبلىسىنىڭ دەنساۋلىق ساقتاۋ سالاسىن جەتىلدىرۋگە وڭ ىقپال بولاتىنىنا سەنەمىن», دەيدى جاسۇلان بيسەمبيەۆ.
اتىراۋ – استراحان – اتىراۋ
