سۋرەتتەردى تۇسىرگەندەر – نۇرعالي جۇماعازى, تۇرار قازانعاپوۆ (سپورتتى دامىتۋ ديرەكتسياسى)
التىنعا باستار جول
ءۇشىنشى جارىس كۇنى قازاقستان قۇراماسى ءۇشىن ءساتتى باستالدى. نىسانا كوزدەۋدەن ارالاس جۇپتا يسلام ساتباەۆ پەن الەكساندرا لي ازيا ويىندارىنىڭ قولا مەدالىن جەڭىپ الدى. جۇلدەگە تالاستا ولار يران سپورتشىلارىن 15:11 ەسەبىمەن ۇتتى. ءبىرىنشى, ەكىنشى ورىنداردى قىتاي مەن وزبەكستان سپورتشىلارى ءبولىسىپ الدى.
تاپانشامەن 25 مەترگە جىلجىمالى نىسانانى كوزدەۋدەن كوماندالىق جارىستا (نازىرقۇلوۆ/يبراەۆ/حۋدياكوۆ) قازاقستان قۇراماسى كۇمىس مەدالعا قول جەتكىزدى.
ال 10 مەترگە جىلجىمالى نىسانانى كوزدەۋدەن (جەكەلەي سىندا) اسسادبەك نازىرقۇلوۆ – 4, باقتيار يبراەۆ – 8, اندرەي حۋدياكوۆ 12-ورىننان كورىندى.
تاپانشامەن نىسانا كوزدەۋدەن (25 مەتر) قىزدار قۇراماسى ىرىكتەۋدەن ءساتتى ءوتتى. كەلەسى كەزەڭ بۇگىن وتەدى.
پايدالانباعان سوڭعى مۇمكىندىك
التىن جۇلدە الاتىنداردىڭ قاتارىندا دزيۋدوشىلارىمىزدىڭ بارىن ءبىلىپ, تاڭ اتىسىمەن الدىمەن دزيۋدو وتەتىن ارەناعا كەلگەن ەدىك. بۇل جەردە بەس جەرلەسىمىز تاتاميگە شىقتى.
78 كگ سالماقتا 1/8 فينالدا ارۋنا جانگەلدينا يەمەندىك قارسىلاسىن 10:0 ەسەبىمەن ۇتقانىمەن, 1/4 فينالدا وزبەكستاندىق بالۋانعا ەسە جىبەردى. ال جۇبانىش بەلدەسۋدە 2018 جىلعى ازيا ويىندارىنىڭ قولا جۇلدەگەرى تايلاندتىق يكۋمي ويودادان «يپپونمەن» باسىم ءتۇستى. ال ۇزدىكتەر قاتارىنان كورىنۋ ءۇشىن ول جاپون قىزى حۋەنجي يونگتەن باسىم ءتۇسۋ كەرەك ەدى. وكىنىشكە قاراي, بويجەتكەنىمىز «يپپون» ادىسىنە ءتۇسىپ قالدى.
+78 كگ سالماقتا ەل نامىسىن قورعاعان كاميلا بەرلىقاش جارىستى بىردەن 1/4 فينالدان باستاعان-دى. الايدا كاميلانىڭ العاشقى اياقالىسى كوڭىلدەگىدەي بولمادى. ول موڭعوليالىق بالۋانعا ەسە جىبەرىپ, جۇبانىش بەلدەسۋىندە وزبەكستاندىق رينوتا يسماتوۆانى «يپپونمەن» جەڭگەنىمەن, قولا جۇلدە ءۇشىن سايىستا جاپون ۆاكاۆا توميتادان جەڭىلىپ قالدى.
ال سوڭعى ەكى وليمپياداعا قاتىسىپ ۇلگەرگەن ديدار حامزا (90 كگ) چەمودانىن ەرتە قامدايتىن بولدى. جەرلەسىمىز الدىمەن 1/8 فينالدا يراندىق قارسىلاسىنان باسىم بولعانىمەن, شيرەك فينالدا موڭعوليالىق, ال جۇبانىش بەلدەسۋىندە وڭتۇستىككورەيالىق سپورتشىلاردان ەسكەرتۋىنىڭ كوپتىگىنەن جەڭىلىپ قالدى.
100 كگ سالماقتا تاتاميگە شىققان نۇرلىحان شارحاننىڭ جولى وتە اۋىر بولدى. وتانداسىمىز الدىمەن باحرەيندىك بالۋاندى جەڭسە, شيرەك فينالدا ونىڭ قارسىلاسى الەم جانە وليمپيادا چەمپيونى جاپوندىق اارون فيليپ ەدى. نۇرلىحان جارادى. جاپوندىق قارسىلاسى وعان قارسى ەشتەڭە ىستەي الماعان كۇيى تورەشىلەردەن ءۇش ەسكەرتۋ الىپ جارىستى ەرتە اياقتادى. الايدا جارتىلاي فينالدا جەرلەسىمىزدى تاعى ءبىر مىقتى دزيۋدوشى, 2022 جىلعى الەم چەمپيونى مۋزاففاربەك تۋروبوەۆ كۇتىپ تۇرعان ەدى. ەڭگەزەردەي وزبەك بالۋانىنا توتەپ بەرگەن ن.شارحان ءوزى ءادىس جاسايمىن دەپ «يپپونعا» ءتۇسىپ قالدى. ال قولا ءۇشىن تالاستا ول وڭتۇستىككورەيالىق ۆۋن جونگحۋنمەن بەلدەسىپ, «يپپون» ءادىسىن جاساپ تازا جەڭىسكە جەتتى. ال وزبەك دزيۋدوشىسى ءوزىنىڭ مىقتى ەكەنىن دالەلدەپ, ازيا ويىندارىنىڭ جەڭىمپازى اتاندى.
100 كگ سالماقتا عالىمجان قىرىقباي العاشقى بەلدەسۋىندە نەپال وكىلىن ەش قينالماي جەڭگەنىمەن, 1/4 فينالدا وزبەكستاندىق بالۋانعا ەسە جىبەردى, جۇبانىش بەلدەسۋىندە موڭعوليالىق بالۋاندى ۇتتى. ال قولا مەدال ءۇشىن بولعان كەزدەسۋدە كورەيالىق قارسىلاسىنا ەسە جىبەردى.
سەمسەرلەسۋشىلەر – ءبىر قولا
ازيا ويىندارىندا سەمسەرلەسۋشىلەرگە ۇلكەن سەنىم ارتىلعان ەدى. سەبەبى, قوس جەرلەسىمىز رۋسلان قۇربانوۆ پەن ەلمير ءالىمجانوۆ الەم چەمپيوناتتارىندا ۇزدىك سەگىزدىكتىڭ قاتارىنان كورىنەتىن. الايدا بۇل جولى التىن ءۇشىن تالاستا تەك ەلمير ءالىمجانوۆتىڭ عانا مۇمكىندىگى بولدى. سول سەبەپتى دە ءبىر توپ جۋرناليست پەن فوتوتىلشىلەر ەلميردىڭ ونەرىن تاماشالاۋعا اعىلدى. جارتىلاي فينالعا قوس جاپوندىق, ءبىر گونكونگتىق جانە ءبىزدىڭ ەلمير جولداما العان ەكەن. وتانداسىمىز جاپون سپورتشىسى كانومەن ەكىنشى بولىپ شپاگاعا شىقتى.
كەزدەسۋ باستالىسىمەن قوس قارسىلاس ءبىر-ءبىرىن ۇزاق ۋاقىت اڭدىسۋمەن جۇرگەندە ەكەۋى دە تورەشىدەن ەسكەرتۋ الدى. سودان كەيىن عانا سەمسەرشىلەر شابۋىلداي باستادى. ايتكەنمەن, جاپون سپورتشىسى بىردەن 2:0 ەسەبىمەن العا شىقتى. كەيىن 3:4, 3:7 ەسەبىمەن جاپوندىق باسىم ءتۇستى. ەلميردىڭ تارازى باسىن تەڭەستىرۋگە ءتىپتى, العا شىعۋعا دا مۇمكىندىگى بولعان ەدى. الايدا ونىڭ قارسىلاسى قورعانا ءجۇرىپ قارسى شابۋىلعا شىعادى ەكەن. وسىنداي ادىسپەن جاپوندىق سەمسەرلەسۋشى 15:9 ەسەبىمەن جەڭىسكە جەتتى. ءدال وسى ەلميردى جەڭگەن جاپون ازيا ويىندارىنىڭ جەڭىمپازى اتاندى.
ال قىزدار اراسىندا سىنعا تۇسكەن ايگەرىم سارىباي, كارينا دوسپاي ازيا ويىندارىن ەرتە اياقتادى.
بۇل كۇنى 200 مەترگە شالقالاي جۇزۋدە باق سىناعان كسەنيا يگناتوۆا ۇزدىك سەگىز سپورتشىنىڭ قاتارىنا ەنىپ, فينالعا جولداما السا, ەركىن ءادىس بويىنشا 400 مەترگە سۇڭگىگەن ديانا تاسجانوۆا ىرىكتەۋ سايىسىندا 4-ورىنمەن فينالعا شىقتى.
تەننيستەن كورتقا شىققان دەنيس ەۆسەەۆ ءدۇبىرلى دودانىڭ ءتورتىنشى كەزەڭىنە جولداما الدى. ول 3-راۋندتا تايپەيلىك قارسىلاسىنان 2:1 ەسەبىمەن باسىم ءتۇستى.
باسكەتبولدان (3ح3) ەرلەر قۇراماسى توپتىق سىندا كامبودجانى 21:13 ەسەبىمەن ۇتتى.
جەڭگەندەردەن جەڭىلگەندەر كوپ
كەشە جارىس جولىنا باستاپ شىققان تاەكۆوندوشىلاردىڭ اياقالىسى العاشىندا جامان ەمەس ەدى. 63 كگ سالماقتا سىنعا تۇسكەن, حالىقارالىق جارىستاردا جۇلدە الىپ جۇرگەن نۇربەك عازيز العاشقى كەزدەسۋىندە فيليپپيندىك جوزەف چۋانى 2:0 ەسەبىمەن جەڭسە, شيرەك فينالدا قىتايلىق يۋشۋاي يانگكە قارسى دايانگكە كوتەرىلىپ, 0:2 ەسەبىمەن ەسەسى كەتتى.
53 كيلودا باق سىناعان ازيزا قاراجانوۆا 1/16 فينالدا ۆەتنامدىق ۆۋ شي دانگقا ەش مۇمكىندىك بەرمەي, 2:0 ەسەبىمەن باسىم ءتۇستى. مەدال ءۇشىن تالاستا ول وڭتۇستىككورەيالىق حەجين پاركتەن اسا المادى – 0:2.
ماريا سەۆوستيانوۆا (57 كگ) گونكونگتىق قارسىلاسىن 2:0 ەسەبىمەن جەڭىپ, كەلەسى كەزەڭگە جولداما الدى. 100 مەترگە جۇزۋدەن (ەركىن ءادىس) باق سىناعان سوفيا سپودارەنكو تەك 11-ورىننان كورىنىپ, ىرىكتەۋدەن وتە المادى.
ە-سپورت, ياعني كيبەرسپورت تۇرىنەن جارىسقا كەلگەن تاسىنەر كالەل قاتارىنان ءۇش ويىندا دا (جاپونيا, كورەيا, سينگاپۋر) بىردەي ەسەپپەن ۇتىلدى – 0:2.
تاعى ءبىر وتانداسىمىز باۋىرجان ساعىمبەكوۆ ءدال وسىنداي ەسەپپەن وڭتۇستىككورەيالىق سپورتشىدان جەڭىلدى. ارتىنشا جاعدايىن جاقسارتۋعا تىرىسقان باۋىرجان پالەستينادان كەلگەن سپورتشىدان 2:1 ەسەبىمەن باسىم ءتۇستى.
شاحماتتان (قىزدار) 5-تۋر اياسىندا قوس قازاقستاندىق ءبيبىسارا اساۋباەۆا مەن جانسايا ابدىمالىك تەڭ تۇسسە, 6-راۋندتا ب.اساۋباەۆا قىتايلىق شاحماتشى جينەر جۋگە ەسە جىبەردى. ال ج.ابدىمالىك ۇندىستاندىق شاحماتشى حاريكا دروناۆالليمەن تەڭ ءتۇستى.
ەرلەر باسەكەسىندە رينات جۇماباەۆ نوۆەندرا پرياسمورو (يندونەزيا), قازىبەك نوگەربەك ۆەتنام شاحماتشىسى مينح لە تۋانعا جول بەردى.
ۆەلوترەكتەن كوماندالىق سپرينتتە ەرلەر قۇراماسى ىرىكتەۋ سىنىندا 7-ورىننان كورىنسە, اقپەيىل ءوسىم, مارينا كۋزمينا, ۆيولەتتا كازاكوۆا, انجەلا سولوۆەۆادان قۇرالعان ءىز كەسۋشىلەر كوماندالىق سايىستا تەك 6-ورىندى قاناعات تۇتتى.
باسكەتبولدان ەرلەر قۇراماسى العاشقى كەزدەسۋىندە ساۋد ارابياسىنان 62:86 ەسەبىمەن جەڭىلىپ قالدى.
سينگاپۋر قۇراماسىن 50:0 ەسەبىمەن ويسىراتا جەڭگەن رەگبيشى قىزدارىمىز ازيا ويىندارىن 5-ورىنمەن اياقتادى.
ۆولەيبولدان ەرلەر قۇراماسى سوڭعى ماتچىندا تايلاندتان باسىم ءتۇسىپ, ازيا ويىندارىن 9-ورىنمەن اياقتادى.
قىتاي ۇزاپ كەتتى
ءۇشىنشى كۇننىڭ قورىتىندىسى بويىنشا قىتايلىق اتلەتتەر التىن مەدال سانى بويىنشا دا, جالپى مەدال سانى بويىنشا دا بارلىق مەملەكەتتەن وق بويى ۇزاپ كەتتى. ءتىپتى, بارلىق مەملەكەتتىڭ جەڭىپ العان التىن مەدالدارىن قوسقاندا ءبىر قىتايدىڭ التىن جۇلدەسىنە جەتپەيدى.
قازاقستان قۇراماسى ەكىنشى, ءۇشىنشى ورىندارداعى كورەيا مەن جاپونيانىڭ مەدالىن ايتپاعاننىڭ وزىندە ءتورتىنشى ورىندا تۇرعان وزبەكستاننىڭ جەڭىپ العان مەدالدارىنىڭ تەڭ جارتىسىنا جەتە الماي, ۇياتتى بولىپ وتىرمىز. وزبەك اعايىندار كەشە قورجىندارىن تاعى 1 التىن, 2 كۇمىس جانە 5 قولا مەدالمەن تولىقتىردى. ءبىر قىزىعى, كورشى ەل ازيا ويىندارىنا باس-اياعى 396 سپورتشى الىپ بارسا, قازاقستان 524 سپورتشىنى ۇكىلەپ قوسقان. الايدا سپورت فۋنكتسيونەرلەرى ساننان ساپاعا كوشەتىن كەز كەلگەنىن ءالى بىلمەي جۇرگەن سياقتى. ايتپەگەندە, ازيا ويىندارىنىڭ ءۇشىنشى كۇنىندە قورجىندا بىردە-ءبىر التىن بولماۋى تاريحتا بولماعان جايت.
بۇل بۇگىن بولعان پروبلەما ەمەس. اتالعان ماسەلەنى توكيو وليمپياداسى كورسەتىپ بەرگەن ەدى. بىراق سپورت باسشىلارى ودان ساباق الماعان سياقتى. قايتكەنمەندە, ەلگە كەلگەننەن كەيىن باپكەرلەردەن باستاپ, تومەن ناتيجە كورسەتكەن سپورت تۇرىنە جاۋاپ بەرەتىن باسشىلاردىڭ ماسەلەسى قارالۋى كەرەك. قانداي شەشىم بولسا دا, ەڭ باستىسى, سپورتشىلارىمىز حالىقارالىق ارەنالاردا جوعارى ناتيجە كورسەتىپ, ءانۇرانىمىزدى ءجيى ورىنداتسا دەگەن تىلەك.
