اتالعان فورۋمدا تاقىرىپتىق سەسسيالار ۇيىمداستىرىلدى. ماسەلەن, «مەنىڭ جەتىستىگىم – مەنىڭ ناتيجەم» سەسسياسىندا «قازاقستاننىڭ ەڭبەك ەرى» اتاعىنىڭ يەگەرلەرى ۇزاقباي قارابالين, مۇرات قايىرگەلدين, مۇحتار تولەۋتاەۆ سىندى تۇلعالار ستۋدەنتتەرمەن, ەڭبەكشىل جاستارمەن سۇراق-جاۋاپ فورماتىندا كەزدەسۋ وتكىزىپ, وزدەرىنىڭ كاسىبي جەتىستىكتەرىن باياندادى. ال «ەڭبەك نارىعى. بولاشاق ماماندىقتار» سەسسياسىندا جاھاندىق ترەندتەر, قازىرگى سىن-قاتەرلەر, ەكونوميكا مەن ەڭبەك نارىعىنداعى بولىپ جاتقان وزگەرىستەر تالقىلاندى.
ەڭبەك فورۋمى «ەڭبەك جولى» رەسپۋبليكالىق بايقاۋىنىڭ جەڭىمپازدارىن ماراپاتتاۋ راسىمىمەن قورىتىندىلاندى. ەڭبەك اۋلەتتەرى مەن ءوندىرىس جۇمىسكەرلەرىنىڭ مارتەبەسىن ارتتىرۋ ماقساتىندا جىل سايىن وتكىزىلىپ كەلە جاتقان بايقاۋ جەڭىمپازدارىن ماراپاتتاۋ راسىمىنە پرەمەر-ءمينيستردىڭ ورىنباسارى تامارا دۇيسەنوۆا, ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا, پارلامەنت دەپۋتاتتارىمەن قاتار «اتامەكەن» ۇلتتىق كاسىپكەرلەر پالاتاسى, جۇمىس بەرۋشىلەردىڭ رەسپۋبليكالىق بىرلەستىكتەرى, حالىقارالىق ۇيىمداردىڭ وكىلدەرى, ەڭبەك ارداگەرلەرى, بايقاۋ جەڭىمپازدارى قاتىستى.
پرەمەر-ءمينيستردىڭ ورىنباسارى تامارا دۇيسەنوۆا ەڭبەك ادامدارىن قۇتتىقتاپ, مەرەكەنىڭ ماڭىزىنا توقتالدى. ء«بىز بۇل جيىنعا بايقاۋ جەڭىمپازدارىن قۇتتىقتاۋ ءۇشىن عانا ەمەس, قۇرىلىسشى مەن ەنەرگەتيككە, ديقانشى مەن مالشىعا, ۇشقىش پەن تەمىرجولشىعا, اسپاز بەن باعبانعا, مۇعالىم مەن دارىگەرگە, تىنىشتىعىمىز بەن قاۋىپسىزدىگىمىزدى قامتاماسىز ەتەتىن ازاماتتارعا, ەلىمىزدەگى 9 ميلليون ەڭبەك ادامىنا العىس ايتۋ جانە قۇرمەت ءبىلدىرۋ ءۇشىن جينالامىز. سىزدەردىڭ ەڭبەكتەرىڭىزدىڭ ارقاسىندا ەل ەكونوميكاسى بيىل 8 ايدا 4,9%-عا جانە ءوندىرىس كولەمى 3,1%-عا ءوستى. اتاپ ايتساق, 10 ملن شارشى مەتر تۇرعىن ءۇي پايدالانۋعا بەرىلدى. 110 مەكتەپ, مۇگەدەكتەرگە ارنالعان 6 وڭالتۋ ورتالىعى, 220 سپورت عيماراتى, 6,4 مىڭ شاقىرىم اۆتوجول سالىنىپ جانە قايتا جاڭارتىلدى», دەدى تامارا دۇيسەنوۆا. سونىمەن قاتار ول ەڭبەك نارىعىندا باسەكەگە قابىلەتتى جاستاردى دايارلاۋ ءۇشىن جاعداي جاساۋعا, ەڭبەك رەسۋرستارىن ساقتاۋعا, قاۋىپسىز ەڭبەك ورتاسىن قۇرۋعا باعىتتالعان جۇمىستار تۋرالى دا ايتتى.
جيىندا تامارا دۇيسەنوۆا اقمولا وبلىسى «اگروحيميا قىزمەتى رەسپۋبليكالىق عىلىمي-ادىستەمەلىك ورتالىعى» مەكەمەسىنىڭ اگروحيميگى (68 جاستا) بازارباي قاراعاەۆتى, «قاراعاندى مەديتسينا ۋنيۆەرسيتەتى» كەاق وتباسىلىق مەديتسينا كافەدراسىنىڭ پروفەسسورى (67 جاستا) گۇلجان مەرشەنوۆانى, استانا قالاسى «ەلەكتر ەنەرگياسى جانە قۋات نارىعىنىڭ وتاندىق وپەراتورى» اق اناليتيكا جانە جوبالاردى باسقارۋ دەپارتامەنتىنىڭ ديرەكتورى (58 جاستا) اباي شاڭعىتباەۆتى, استانا قالاسى اكىمدىگىنىڭ «نۇرلى جۇرەك» الەۋمەتتىك قىزمەت كورسەتۋ ورتالىعى» كوممۋنالدىق مەكەمەسىنىڭ بولمە-تازالىقشىسى (60 جاستا) ليديا رووتتى «ەڭبەك ارداگەرى» مەدالىمەن ماراپاتتادى.
ال «ەڭبەك جولى» بايقاۋى جىل سايىن ەكى كەزەڭدە, ياعني وڭىرلىك جانە رەسپۋبليكالىق دەڭگەيلەردە ءۇش اتالىم بويىنشا وتكىزىلەدى: «ۇزدىك ەڭبەك اۋلەتى» – ەڭبەك ءوتىلى ەڭ ۇزاق, جەتىستىكتەرى ەڭ كوپ اۋلەت; «جۇمىس ىستەيتىن جاستاردىڭ ۇزدىك تالىمگەرى» – جۇمىس ءوتىلى كەمىندە 20 جىل, وتە ءتيىمدى جۇمىس ىستەيتىن تالىمگەر; ء«وندىرىستىڭ ۇزدىك جاس مامانى» – جۇمىس ءوتىلى 5 جىلدان اسپايتىن ءوندىرىستىڭ ەڭ بەلسەندى جانە ەڭبەكقور جۇمىسكەرى تاڭدالادى. وسى بويىنشا بيىل جەرگىلىكتى اتقارۋشى ورگاندار بايقاۋعا قاتىسۋ ءۇشىن 591 ءوتىنىم قابىلداعان.
سونىمەن «ەڭبەك جولى-2023» بايقاۋىنىڭ جەڭىمپازدارى: «ۇزدىك ەڭبەك اۋلەتى» اتالىمى بويىنشا 1-ورىن – استانالىق امانگەلدى اۋلەتى – «قتج» ۇك» اق – «كوپفۋنكتسيونالدى دامۋ ورتالىعى», 2-ورىن – شىعىس قازاقستان وبلىسىنان اۋشينوۆ اۋلەتى – «كازتسينك» جشس ريددەر تاۋ-كەن مەتاللۋرگيا كەشەنى, 3-ورىن – پاۆلودار وبلىسىنان سەيىتجان اۋلەتى – «ەكىباستۇز گرەس-2 ستانساسى» اق بولدى.
«جۇمىس ىستەيتىن جاستاردىڭ ۇزدىك تالىمگەرى» اتالىمى بويىنشا 1-ورىن – «قاراعاندى مەديتسينا ۋنيۆەرسيتەتى» كەاق كلينيكاسىنىڭ باس حيرۋرگى, مەديتسينا عىلىمىنىڭ دوكتورى, پروفەسسور نۇرقاسي اباتوۆ (61 جاستا), 2-ورىن – اقمولا وبلىسى «RG GOLD» جشس سىلتىسىزدەندىرۋ ۋچاسكەسىنىڭ شەبەرى قۇندىزبەك نۇقىشەۆ (59 جاستا), 3-ورىن – ماڭعىستاۋ وبلىسى «قازازوت» جشس سىناق ورتالىعىنىڭ باسشىسى ليۋدميلا مۋروۆتسەۆا (58 جاستا) جەڭىمپاز اتاندى.
ء«وندىرىستىڭ ۇزدىك جاس مامانى» اتالىمى بويىنشا 1-ورىن – اباي وبلىسى «ۆوستوك برويلەر» جشس باس ۆەتەرينار دارىگەرى (26 جاستا) ايگەرىم اعاتانوۆا, 2-ورىن – قوستاناي وبلىسى كاسىبي اسكەريلەندىرىلگەن اۆاريالىق-قۇتقارۋ قىزمەتتەرى شتابىنىڭ ءورت ءسوندىرۋشىسى (21 جاستا) اناتولي يسماگۋلوۆ, 3-ورىن – سولتۇستىك قازاقستان وبلىسى «پەتروپاۆل اۋىر ماشينا جاساۋ زاۋىتى» اق قۇراستىرۋ-مەحانيكالىق تسەحىنىڭ شەبەرى (26 جاستا) الىبەك ۋاتاەۆ ماراپاتتالدى.
ءار اتالىم بويىنشا بايقاۋ جەڭىمپازدارىنا اقشالاي جانە باعالى سىيلىقتار بەرىلدى. 1-ورىنعا 1 ملن تەڭگەنىڭ سەرتيفيكاتى مەن نوۋتبۋك, 2-ورىن يەگەرلەرىنە – 700 مىڭ تەڭگە جانە iPhone, 3-ورىن جەڭىمپازدارىنا – 500 مىڭ تەڭگە جانە iPad تابىستالدى. ەڭبەك ارداگەرلەرىنە مەدالدارمەن قوسا 500 مىڭ تەڭگەنىڭ سەرتيفيكاتتارى مەن باعالى سىيلىقتار تاپسىرىلدى.
