بۇعان دەيىن جازعانىمىزداي, 1 قىركۇيەكتە 55 مىڭ ورىندىق 39 مەكتەپ پايدالانۋعا بەرىلگەن بولاتىن. بۇل ءوز كەزەگىندە 12 اپاتتىق جانە 29 ءۇش اۋىسىمدى مەكتەپتىڭ ماسەلەسىن شەشتى. ال مەكتەپ ماسەلەسىندە كۇن تارتىبىندەگى مىندەت پەن مەجە قانداي؟ مينيسترلىكتىڭ مالىمدەۋىنشە, 2023-2024 وقۋ جىلىندا, ياعني وسى قىركۇيەك ايىنان باستاپ 132 مىڭ وقۋشىعا ارنالعان 154 مەكتەپتىڭ قۇرىلىسى باستالدى. قازىر وڭىرلەردەگى 194 مەكتەپ جوندەلىپ ءبىتتى, تاعى 66 مەكتەپ كۇردەلى جوندەۋدەن ءوتىپ جاتىر. 2024 جىلى تاعى 300-گە جۋىق جاڭا مەكتەپتىڭ قۇرىلىسىن باستاۋ جوسپارلانعان. جاڭا جىلدا قۇرىلىسى باستالاتىن جاڭا مەكتەپتەر قايدا, قاي وڭىرلەردە, نەشەۋدەن سالىنادى؟ وسىعان كەڭىنەن توقتالايىق.
جاڭا جىلدا باس-اياعى 296 مەكتەپ سالىنباق, ونىڭ ەڭ كوبى تۇركىستان وبلىسىندا بوي كوتەرەدى. تۋ كورسەتكىشى جوعارى وڭىردە 43 مەكتەپتىڭ قۇرىلىسى باستالادى. 2024 جىلى سالىناتىن مەكتەپتەر سانى بويىنشا ەكىنشى ورىندا 31 مەكتەپپەن اقتوبە وبلىسى تۇر. العاشقى ۇشتىكتى الماتى وبلىسى قورىتىندىلاپ تۇر, بۇل وبلىستا 28 وقۋ وشاعى بوي كوتەرمەك. جاڭا مەكتەپ سالۋ جونىندە ساناقتىڭ سوڭىن اباي وبلىسى (5 مەكتەپ), سولتۇستىك قازاقستان, پاۆلودار, جەتىسۋ وبلىستارى (ارقايسىسى 3 مەكتەپتەن), ۇلىتاۋ وبلىسى (2 مەكتەپ) تۇيىندەيدى. ال بەتەگەدەن بيىك, جۋساننان الاسا بولىپ ورتادا جۇرگەن وڭىرلەردىڭ ىشىندە ءۇش مەگاپوليس پەن قالعان 8 وبلىس بار. اشىپ ايتساق, الماتى قالاسىندا – 26, استانادا – 25, شىمكەنتتە 12 مەكتەپ سالىنادى. ماڭعىستاۋ وبلىسىندا – 19, اتىراۋ وبلىسىندا – 17, جامبىل وبلىسىندا – 15, اقمولا وبلىسىندا – 14, قاراعاندى وبلىسىندا – 13, قىزىلوردا وبلىسىندا – 12, باتىس قازاقستان وبلىسىندا – 10, شىعىس قازاقستان وبلىسىندا – 8, قوستاناي وبلىسىندا 7 وقۋ وشاعىنىڭ ىرگەسى قالانادى.
