فوتو: gov.kz
ەرمەك مارجىقپاەۆ سپورتشىلار جانە جاتتىقتىرۋشىلار قۇرامىمەن اڭگىمەلەسىپ, ولارعا ساتتىلىك تىلەدى. مينيستر ازيا ويىندارىندا تابىستى ونەر كورسەتۋ وتە ماڭىزى ەكەنىن ايتتى. سەبەبى بايراقتى باسەكەدە قۇرلىق چەمپيونى اتاعىمەن قاتار سپورتتىڭ 8 تۇرىنەن پاريج وليمپياداسىنىڭ جولداماسى ساراپقا سالىنادى.
ء«بىز وسى ساتكە دەيىن ۇزاق ءارى اۋقىمدى جۇمىس اتقارىپ, وتە بەلسەندى دايىندىقتى وتكەردىك. كەشەندى جوسپار ازىرلەندى. 400-دەن استام وقۋ-جاتتىعۋ جيىندارى ءوتىپ, ءتۇرلى تۋرنيرلەر ۇيىمداستىرىلدى, سونىڭ ارقاسىندا ءبىزدىڭ سپورتشىلار وزدەرىن جوعارى حالىقارالىق دەڭگەيدە كورسەتۋگە مۇمكىندىك الدى. ساناۋلى كۇندەردەن كەيىن سىزدەر باسقا ەلدەردىڭ تالانتتى جانە شەبەر سپورتشىلارىمەن باسەكەگە تۇسەسىزدەر. بۇل وڭاي ەمەس, بىراق ونداي تۋرنيرلەردە مىنەز شىڭدالادى, قۇندى تاجىريبە جيناقتالادى. بارشاڭىزعا ساتتىلىك, جىگەر مەن توزىمدىلىك تىلەيمىن. بايراقتى باسەكەدە مەدالدار, وليمپياداعا جولدامالار, رەيتينگتىك ۇپايلار عانا ەمەس, سونىمەن قاتار ەل نامىسى, بۇكىل وتاندىق سپورتتىڭ مارتەبەسى باسكە تىگىلەدى. ءبىزدىڭ مينيسترلىك ءاردايىم وتاندىق سپورتشىلاردى, جاتتىقتىرۋشىلاردى جانە وسى سالانىڭ باسقا دا ماماندارىنا قولداۋ كورسەتەدى. ءبىز الەمگە ەلىمىزدى تانىتىپ قانا قويماي, وسكەلەڭ ۇرپاققا ۇلگى كورسەتىپ, سپورت پەن سالاۋاتتى ءومىر سالتىنا دەگەن قىزىعۋشىلىقتى وياتامىز. بارشاڭىزدى ۇلكەن سپورت مەرەكەسىنىڭ باستالۋىمەن قۇتتىقتايمىن جانە الداعى ازيادادا ەڭ بيىك شىڭداردى باعىندىرۋعا تىلەكتەسپىن!», دەدى تۋريزم جانە سپورت ءمينيسترى ەرمەك مارجىقپاەۆ.
ەسكە سالايىق, XIX جازعى ازيا ويىندارى 23 قىركۇيەك پەن 8 قازان ارالىعىندا قىتايدىڭ حانچجوۋ قالاسىندا وتەدى. 4 جىلدا ءبىر رەت ۇيىمداستىرىلاتىن جارىسقا ەلىمىزدىڭ اتىنان قاتىساتىن 524 اتلەت 30 سپورت تۇرىنەن 305 مەدال ءۇشىن تالاسادى. قازاقستان قۇراماسى 1994 جىلدان بەرى ازيا ويىندارىنا وسىمەن سەگىزىنشى رەت قاتىسىپ جاتىر.
جارىسقا 45 مەملەكەتتەن 15 مىڭنان استام سپورتشى قاتىسىپ, سپورتتىڭ 40 تۇرىنەن جالپى سانى 481 مەدال جيىنتىعىن ءوزارا ساراپقا سالادى.
