ون ساۋساعىنان ونەر تامعان ەۆگەني بەككەر دە تاعدىر تالكەگىمەن تايتالاسامىن دەپ ويلاماعان. ءبارى ءوز ىرعاعىمەن ءوتىپ جاتقان ءتارىزدى ەدى. ۋريۋپينكا سەلوسىنىڭ تۋماسى كوپبالالى وتباسىندا ەر جەتتى. «بالالى ءۇي – بازار» دەگەندەي, ءۇيىنىڭ ءىشى كۇمبىرلەگەن كۇمىس كۇلكىگە تولىپ تۇراتىن, توڭىرەكتىڭ ءبارى شاتتىقتىڭ قۇشاعىندا, ۋايىم-قايعىنىڭ قالىڭ شىلتەرلى تورى تۇمشالاپ كورمەگەن. اكەسى ومىردەن ەرتە ءوتتى. وتباسىنىڭ تىرەنىشى دە, مىقتى تايانىشى دا اكە ەكەن عوي. قايران دا قايران اكەنىڭ قامقورلىعىنان ايىرىلعان سوڭ ەش ادامدى اياۋدى بىلمەيتىن جەتىمدىكتىڭ تيگەن جەرىن ويىپ تۇسەر ازۋ ءتىسى اقسيىپ, ءتونىپ كەلگەن قاپقىسى كەلەتىندەي مە قالاي؟ ءۇش ءىنىسى مەن كىشكەنتاي قارىنداسى اكە قامقورلىعىن كورمەي ءوستى. تاعدىردىڭ سالعان قيىندىعى جالعىز اسقار تاۋ اكەسىز ءوتۋ ەمەس ەكەن, مۇنىڭ ماڭدايىنا تاعى ءبىر اۋىرتپالىق جازىلىپتى. 19 جاسىندا ويلاماعان جەردەن جول اپاتىنا ۇشىرادى. ءبىرىنشى توپتاعى مۇگەدەك بولىپ قالدى. كەڭ دۇنيە تارىلعانداي, اعىن سۋ توقتاعانداي. ەۆگەني ءۇشىن ەندىگى تىرلىكتىڭ ەشبىر ءمانى جوق ءتارىزدى. وڭاشادا ءزىلماۋىر قورعاسىنداي قالىڭ ويعا بەرىلدى. ەندى كورگەن كۇنى قالاي بولادى. ءتورت قۇبىلا تەگىس قاراڭعى. سول قاراڭعىلىق قۇشاعىنان شىعارار ءۇمىت ساۋلەسى ءسال عانا ۇشقىن شاشاتىنداي. كەيىن ويلاپ قاراسا, ءوز بويىنداعى قىزىلدى-جاسىلدى تىرشىلىككە دەگەن شەكسىز ماحابباتى, قۇشتارلىعى ەكەن عوي. ءبىر ءتاۋىرى اپاتقا ۇشىراعانشا, ورتا ءبىلىم العان. سەلوداعى قىرماندا وپەراتور بولىپ جۇمىس ىستەگەن ءارى وتان الدىنداعى اسكەري بورىشىن وتەپ, تەمىردەي تارتىپكە شىڭدالعان. از دا بولسا ءومىر مەكتەبىنەن ءوتىپ ۇلگەرگەن.
ايتپاقشى, اسكەردە جۇرگەندە ءوز بويىنان بۇرىن بايقاي بەرمەيتىن قىزىعۋشىلىقتى اڭعارعان. شىنداپ شۇعىلدانسا, كوز جاۋىن الاتىن ادەمى بۇيىمدار جاساي بىلەدى ەكەن.
– كەيدە ادام بەيىمى وسە كەلە پايدا بولادى دەپ جاتادى عوي. مۇمكىن سولاي دا شىعار, ايتەۋىر ءوزىم تالپىنىپ ۇيرەنىپ كەتتىم, – دەيدى ەۆگەني.
قازىر ول كوزدىڭ جاۋىن الاتىن قويىن داپتەرلەر مەن ءارتۇرلى پىشىندەگى قوبديشالار جاسايدى. زاتتىڭ سانىنە قىزىققان ءارى قاجەتتى بولعاندىقتان ات-تۇيەدەي قالاپ الۋشىلار دا از ەمەس. شەبەردىڭ ءوز ايتۋىنا قاراعاندا, الداعى ۋاقىتتا ءار بۇيىمنىڭ ءپىشىنىن جەتىلدىرە تۇسپەك.
بالكىم, شىنايى شەبەرلىك وسىنداي تىنىمسىز ەڭبەكپەن جولداس شىعار. ەڭ باستىسى, تاعدىردىڭ سالعان سىناعىنا مويىماي, تىرشىلىكتىڭ اقباس تولقىندارىمەن الىسۋعا قاپتال جەتىپ جاتقان قاجىر-قايراتتى ايتساڭىزشى. اقجارىلىپ ايتقان اڭگىمەسىنەن ەشكىمگە ماسىل بولۋدى قالامايتىنىن اڭعاردىق. قالاي بولعان كۇندە دە تۇلا بويىندا شىمشىمداپ جوق, بۋىرقانىپ تۇرعان ناعىز ەرلەرگە ءتان قايراتتىڭ بار ەكەنىن جان جۇرەگىمىزبەن سەزىندىك.
بۇگىنگى تاڭدا ەۆگەني ناتاليا نيكولاەۆنامەن بىرگە تۇرادى. مۇگەدەكتىگىنە بايلانىستى مەملەكەت تاراپىنان كورسەتىلەتىن كومەك بار ءارى اناسىنىڭ جان جىلۋى كوكىرەگىن جىلىتىپ, ەشتەڭەدەن كەمدىك كورەتىن جايى جوق. ەڭ باستىسى, ومىرگە دەگەن قۇشتارلىق, تىرشىلىككە دەگەن تالپىنىس بار. ال جاساعان بۇيىمدارىن وتكىزۋ تۋرالى جارناما جاساپ كورمەپتى. «ەل قۇلاعى ەلۋ» دەگەن راس, وسىنداي شەبەردىڭ بار ەكەنى تۋرالى اڭگىمە ەل ىشىنە تاراپ كەتكەن. جالعىز قيىندىعى – قوبديشالار جاسايتىن ماتەريالداردىڭ تاپشىلىعى. قاجەتتى زاتتاردىڭ باعاسى ءوسىپ, قاسقالداقتىڭ قانىنداي قات بولىپ كەتكەلى قاشان. وزىندىك قۇنى وسكەن سوڭ ۇستىنە قولاقىسىن كوپ قوسا المايدى.
– اۋىلدىق جەردەگى قاراپايىم حالىقتىڭ تابىسى ونشالىقتى قوماقتى ەمەس قوي, – دەيدى شەبەر, – قىمباتقا ساتساڭ قينالىپ قالۋى مۇمكىن. ءوز جاعدايىمدى دا ويلاۋىم كەرەك. قاجەتتى شيكىزاتتى ارناۋلى ونلاين دۇكەندەر ارقىلى الىپ وتىرمىن.
ەل ىشىندە جاناشىر جان از ەمەس. ەۆگەنيدىڭ قارەكەتىن كورگەننەن كەيىن وعان الدەبىر جومارت جان ارناۋلى كەرەۋەت سىيلاپتى. جەرگىلىكتى «ۋريۋپين ي ك» سەرىكتەستىگىنىڭ ديرەكتورى گ.بوگينا جانە ينۆەستور پ.كولوديۋك كومەك قولىن سوزىپ تۇرادى ەكەن.
– ادام كەز كەلگەن قيىندىققا توزەدى. ايتسە دە ەت جاقىن تۋىس پەن كوزتانىستاردىڭ جان جىلۋى كەرەك-اق. ەرتەرەكتە ارقيلى كونكۋرستارعا قاتىسۋشى ەدىم. ەڭبەگىمە وراي العان ديپلومدارىم مەن قۇرمەت گراموتالارىم دا جەتەرلىك. ەڭ باستى ماراپات – جۇرتشىلىقتىڭ قۇرمەتى, دەيدى شەبەر.
ءسوز سوڭىندا شەبەر ءوزىن ەشكىمنىڭ مۇسىركەگەنىن قالامايتىنىن جەتكىزدى. قيمىل-قوزعالىسى قيىن بولسا دا, ءور كوڭىلدە ومىرگە دەگەن ولشەۋسىز ماحاببات بار. ال ماحاببات – بار قيىندىقتىڭ قۇرساۋىن بۇزىپ-جارىپ كەتەتىن قۇدىرەتتى كۇش. سول قۇدىرەت ءبىرىنشى توپتاعى مۇگەدەكتىڭ قوس قولتىعىنان پەرىشتەدەي جەلەپ-جەبەپ, العا سۇيرەپ كەلەدى. جايساڭ جاننىڭ جان سىرىن ۇققان سوڭ جولىڭ اشىلسىن دەدىك ىشتەي ءبىز دە كەمەل كەلبەتىنە ءسۇيسىنىپ...
اقمولا وبلىسى,
اقكول اۋدانى
