كوشپەلىلەر سالتىندا الىس جورىققا شىققان اتتىلاردىڭ اسار اتى, قوسار اتى دەگەن بولاتىنى تاريحتان بەلگىلى. اسار ات جولدا ازىق قىلۋعا ارنالسا, ال قوسار اتتى قوسالقى ات دەۋگە بولادى. بۇگىنگى « ۇلى دالا جورىعى» مارافونىندا بۇل سالتتار دا ەسكەرۋسىز قالعان جوق. تەبىنگىسىنە تەر قاتقان اتتىلار ورتا جولدا تىڭ اتقا ءمىنىپ, ساپارىن ودان ارمەن جالعاستىردى. ازىرگە باسىپ وتكەن جولدىڭ ۇزاقتىعى 850 شاقىرىمنان اسادى. 14 قىركۇيەكتە « ۇلى دالا جورىعى» مارافون-بايگەسىنىڭ 9-كەزەڭى باستالدى. ەلوردادان اتتانعان 19 كوماندانىڭ 12-ءسى جولدا, وزگەسى جارىس جولىنان شىعىپ قالدى.
«ەندى كوماندالار جولدان شىعىپ قالادى دەگەن قاۋىپ ازايدى. ويتكەنى شاباندوزدار ات اۋىستىرىپ ءمىندى. ۋاقىتىن ۇتىمدى پايدالانىپ, تۇركىستانعا جەتەدى دەگەن سەنىمدەمىز. بىلتىر 600 شاقىرىمدى 9 كوماندا 32 اتپەن وتسە, بيىل 650 شاقىرىمدى 12 كوماندا 41 اتپەن العاشقى كەزەڭدى اياقتاپ وتىر. بىلتىر 650 شاقىرىمدى ءبىرىنشى بولىپ باعىندىرعان كوماندانىڭ ۋاقىتى شامامەن 56 ساعاتتى قۇراسا, بيىل 42 ساعاتتا ءجۇرىپ ءوتتى. بۇل اتتاردىڭ دايىندىعىن كورسەتەدى. ەكىنشىدەن, باسەكەنىڭ وتە جوعارى دەڭگەيدە ەكەنىن بىلدىرەدى. سونداي-اق 1-كەزەڭنىڭ 4 اتى كوماندادان تىس 1 300 شاقىرىمدى باعىندىرۋعا بەكىنىپ وتىر. ونىڭ ءبارى مال دارىگەرىنىڭ رۇقساتىمەن جۇزەگە اسادى», دەدى «Joryq» ات سپورتى فەدەراتسياسىنىڭ پرەزيدەنتى, جوبا اۆتورى باقىتجان تۇرلىبەك.
باس تورەشى نادەجدا كۋپتسوۆانىڭ ايتۋىنشا, كوماندالاردىڭ جارىستان شىعىپ قالۋى ولاردىڭ دايىندىعىنىڭ ازدىعى مەن اتتاردىڭ بابى كەلىسپەگەننەن بولدى.
«ۆەتەرينارلاردىڭ كەڭەسىنە قۇلاق تۇرگەندەر جارىستى ءالى جالعاستىرىپ كەلەدى. ازىرگە ماڭعىستاۋ, جەتىسۋ, قوستاناي قۇراما كوماندالارى اتتارىنا وتە جاقسى ءمان بەرۋدە. بىلتىر جورىققا قاتىسا الماي قالعان قوستاناي وبلىسى كومانداسى ءبارىمىزدى ءتانتى ەتتى. مال دارىگەرلەرىنىڭ پىكىرىنشە, 650 شاقىرىمدى باعىندىرعان اتتار قاتارىندا قوستانايلىق شاباندوزدار كاسىبيلىگىمەن, تۇلپارلارىنىڭ مىقتىلىعىمەن قاتتى ەرەكشەلەنەدى.
دەگەنمەن كىمنىڭ جەڭىسكە جەتۋى مۇمكىن ەكەنىن ايتا المايمىن. قالعان جەردى تىڭ اتتارمەن باستادىق. اتتاردىڭ قالاي بەيىمدەلەتىنىن باقىلاۋىمىز كەرەك. ءارى وڭتۇستىك وڭىرگە جاقىنداعان سايىن اۋا رايى جىلى كەلەدى», دەيدى ن.كۋپتسوۆا.
ۇيىمداستىرۋشىلاردىڭ ايتۋىنشا, الدا 5 كەزەڭ, ياعني 450 شاقىرىم قالدى. بۇعان ءالى ات اۋىستىرماي كەلە جاتقاندار دا بار.
«استانا قالاسى, ماڭعىستاۋ, جەتىسۋ, قوستاناي وبلىستارىنىڭ شاباندوزدارى 650 شاقىرىمدى ءجۇرىپ وتكەن تۇلپارلارىمەن تۇركىستانعا دەيىنگى 1 300 شاقىرىمدى ەڭسەرۋدى كوزدەپ وتىر. بۇل تورتتىككە تورەشىلەر «رەكورد» دەگەن اتاۋ بەرىپ, ارنايى 13-كوماندا رەتىندە تىركەپ, ناتيجەلەرىن كۇندەلىكتى باقىلاپ وتىر. «رەكورد» كومانداسىنىڭ جىگىتتەرى دىتتەگەن ماقساتىنا جەتسە, كەلەسى جىلعى جورىققا گيننەستىڭ رەكوردتار كىتابىنىڭ وكىلدەرىن شاقىرتۋ جوسپاردا بار. 1 300 شاقىرىمدى ءبىر اتپەن از ۋاقىتتا باعىندىرعان ازاماتتار مەن قازاناتتاردىڭ ناتيجەسى رەكوردتار كىتابىنا بۇرىن-سوڭدى بولماعان ەرەكشە ناتيجە رەتىندە ەنگىزۋگە سۇرانىپ تۇر», دەيدى تورەشىلەر.
ايتا كەتەيىك, « ۇلى دالا جورىعى» رەسپۋبليكالىق مارافون-بايگەسىنىڭ باس سەرىكتەسى – «Sport Qory» تۋريزم يندۋسترياسى مەن سپورتتى قولداۋ قورى.
