«جاساندى ينتەللەكتتىڭ بۇرىن-سوڭدى بولماعان دامۋى ءوندىرىس سالاسىن, ەڭبەك نارىعىن جانە قىزمەت كورسەتۋ سالاسىن وزگەرتۋ مىندەتىن قويادى.
ساراپشىلاردىڭ بولجاۋىنشا, ون جىلدان كەيىن الەمدەگى ونىمدەر مەن قىزمەتتەردىڭ 70 پايىزى تسيفرلىق پلاتفورما ۇلگىلەرىنە نەگىزدەلەدى. سوندىقتان ءبىزدىڭ ەلدەردە تسيفرلىق شەشىمدەردى قولدانۋ اياسىن جۇيەلى تۇردە كەڭەيتۋ باسىمدىققا اينالۋى مۇمكىن», دەدى پرەزيدەنت.
مەملەكەت باسشىسىنىڭ ايتۋىنشا, تسيفرلىق شەشىمدەر ەكونوميكانىڭ بارلىق سالالارىنا بەلسەندى تۇردە ەنگىزىلەدى. ماسەلەن, ەلىمىزدە قولما-قول اقشاسىز وپەراتسيالاردىڭ ۇلەسى 82 پايىزعا جەتتى, مەملەكەتتىك قىزمەتتەردىڭ 90 پايىزدان استامى ەلەكتروندى تۇردە كورسەتىلەدى.
«وتكەن جىلدىڭ وزىندە وتاندىق IT-سالانىڭ ەكسپورت كولەمى بەس ەسە ءوستى. ءبىز بۇل كورسەتكىشتى 2026 جىلعا قاراي ءبىر ميلليارد دوللارعا جەتكىزۋدى كوزدەپ وتىرمىز. قازاقستان وسى ستراتەگيالىق ماڭىزدى سالادا جاقىن كورشىلەرىمەن ىنتىماقتاستىقتى جان-جاقتى نىعايتۋدى جاقتايدى», دەدى ق.توقاەۆ.
