ۇلتتىق مەملەكەتتىك كىتاپ پالاتاسىنىڭ ستاتيستيكاسىن كەلتىرسەك, 2022 جىلى قازاقستاندا كىتاپتار مەن بروشيۋرالاردىڭ 4 044 اتاۋى تىركەلگەن. ەڭ كوپ كىتاپ پەن بروشيۋرا الماتى, الماتى وبلىستارىندا جارىق كورگەن: 1 749 كىتاپ پەن بروشيۋرا تىركەلگەن. ەلىمىزدەگى كىتاپتاردىڭ باسىم بولىگى پەداگوگيكا سالاسىندا (ادىستەمەلىك قۇرالدار, كىتاپتار) جارىق كوردى. كىتاپتار سانى – 1085. كوركەم ادەبيەت جانرى بويىنشا: قازاق ادەبيەتى – 664, پوەزيا – 166, دراما – 3, پروزا – 286.
Baurzhan foundation قورىنىڭ قۇرىلتايشىسى, كىتاپ فەستيۆالىنىڭ العاشقى ۇيىمداستىرۋشىسى جۇلدىز وماربەكتىڭ ايتۋىنشا, Kitap Fest – شىعارماشىلىقپەن شۇعىلداناتىن دارىندى ادامدارعا ارنالعان بىرەگەي الاڭ. بيىل قالا كۇنىمەن تۇسپا-تۇس كەلگەن Kitap Fest Almaty فەستيۆالى «ۇلتتىق ادەبيەت. ۇلتتىق ءتىل. ۇلتتىق داستۇرلەر» اتتى تاقىرىپتى ارقاۋ ەتتى.
«9 جىل ىشىندە Kitap Fest الماتىلىقتاردىڭ ەڭ سۇيىكتى ءىس-شاراسىنا اينالدى. ەلوردا كۇنىنە وراي شىلدە ايىندا كىتاپ فەستيۆالىن استانا قالاسىندا ەكىنشى رەت وتكىزگەن ەدىك. وقۋ مادەنيەتىن ىلگەرىلەتۋگە ارنالعان ءبىزدىڭ فەستيۆال, جازۋشىلار مەن وقىرماندار ءۇشىن بىرىڭعاي الاڭ قۇرىپ, بالالار مەن جاستاردىڭ كىتاپقا دەگەن قىزىعۋشىلىعىن ارتتىرۋدى كوزدەيدى. كىتاپ فەستيۆالى وتاندىق جازۋشىلارمەن كەزدەسۋلەردەن باستاپ, بالالارعا ارنالعان تانىمدىق شەبەرلىك ساباقتارىنا دەيىنگى ينتەراكتيۆتى ورتانى بىرىكتىرەدى. ءبىز كوپشىلىكتى وقۋعا تارتۋ, كىتاپتىڭ, مادەنيەت پەن ءبىلىمنىڭ ماڭىزىن ارتتىرۋ, جازۋشىلار مەن ادەبي شىعارمالاردى ناسيحاتتاۋعا جاردەمدەسۋ ءۇشىن جۇمىس ىستەپ جاتىرمىز», دەدى Kitap Fest كىتاپ فەستيۆالىنىڭ باس ۇيلەستىرۋشىسى مايرا ءالجانوۆا.
الماتى كىتاپ فەستيۆالى وتاندىق جازۋشىلاردىڭ جاڭا كىتاپتارىن تانىستىرىپ, كىتاپسۇيەر قاۋىم ءۇشىن اۋقىمدى باعدارلاما دايىندادى. «وففلاين كىتاپتار تۋرالى» شاتىرىندا تانىمال جازۋشىلار, قوعام قايراتكەرلەرى مەن بلوگەرلەر پىكىر الماستى. الماتىلىقتارعا يلليۋستراتسيالانعان كىتاپ كورمەسى, شەبەرلىك سىنىپتارى, ءتۇرلى بايقاۋ مەن اكتسيا, ەلىمىزدىڭ ءىرى باسپالارى مەن كىتاپ دۇكەندەرىنىڭ جارمەڭكەسى ۇسىنىلدى. باسپاگەرلەر جانە كىتاپ دۇكەندەرى ءوز ونىمدەرىن كورمەدە 30%-عا دەيىنگى جەڭىلدىكپەن ساتتى. بيىلعى جىلى كىتاپ فەستيۆالىندە 50-دەن اسا كىتاپ دۇكەندەرى مەن باسپالار ءوز ونىمدەرىن ۇسىندى. 28 جاڭا كىتاپتىڭ تۇساۋى كەسىلدى.
فەستيۆالدە 40-قا جۋىق پىكىر كوشباسشىلارى ءسوز سويلەدى: سماعۇل ەلۋباي, دوسىم ساتباەۆ, ءدىلدار مامىرباەۆا, ەلدوس توقتارباي, بەيبىت سارىباي, ابىلاي يۋسۋپوۆ, باسقا دا كوپتەگەن تانىمال ادەبي تۇلعا قازىرگى ادەبيەتتەگى ءۇردىس تۋرالى ءسوز قوزعادى. سونداي-اق «مەنىڭ العاشقى ەرتەگىلەرىم», «Tarmaqtar», باسقا دا جاڭا كىتاپتاردىڭ تۇساۋكەسەرى ءوتتى.
بەلگىلى ساياساتتانۋشى, پۋبليتسيست, باسپاگەر دوسىم ساتباەۆ پاۆەل كوكتىشەۆ جانە ءالىم حاميتوۆپەن بىرگە «كاك وسەدلات ەدينوروگا؟» كىتابىنىڭ تۇساۋىن كەستى. ونىڭ پىكىرىنشە, ونجىلدىقتا Kitap Fest شىعارماشىل تۇلعالار مەن كىتاپسۇيەر قاۋىم ءۇشىن بەدەلدى جانە قۋاتتى الاڭعا اينالدى.
مۇنداي ءىس-شارالاردى وتكىزۋ وتە ماڭىزدى. كىتاپ وقيتىن ادام سانا كوكجيەگىن كەڭەيتەدى, لوگيكاسىن, ويلاۋىن دامىتادى, ەستە ساقتاۋ قابىلەتىن جاقسارتادى. وسى رەتتە Kitap Fest وقىرمان قاۋىمدى بىرىكتىرىپ قانا قويماي, جاڭا مۇمكىندىكتەرگە جول اشىپ ءجۇر», دەدى ساياساتتانۋشى.
سونىمەن قاتار فەستيۆال قوناقتارى اكەلىنگەن كىتاپتارمەن الماسۋعا, ۇناعان كىتاپتاردى جەڭىلدىكپەن ساتىپ الۋعا نەمەسە ولاردى تولىعىمەن تەگىن الۋعا مۇمكىندىك الدى. بيىلعى كىتاپ فەستيۆالىندە ءارتۇرلى جانرداعى 5000 كىتاپ تەگىن تاراتىلدى.
بالالارعا ارنالعان ويىن-ساۋىق باعدارلاماسىندا انيماتورلار, اكۆاگريم مەن ءتۇرلى قىزىقتى بايقاۋ مەن ۆيكتورينا كەلگەن قوناقتارعا تاماشا كوڭىل-كۇي سىيلادى. ءداستۇر بويىنشا فەستيۆالدە «اۋىلعا كىتاپ» اكتسياسى وتكىزىلدى, وندا كەز كەلگەن وقىرمان ءوز ءۇيىنىڭ سورەسىنەن كىتاپ اكەلىپ, اۋىل كىتاپحانالارىنا تاپسىرۋعا اتسالىستى. بيىلعى فەستيۆالدە 3 مىڭعا تارتا كىتاپ جينالدى.
الماتى
