ەل كولەمىندە كاسىپكەر ايەلدەردى جان-جاقتى قولداۋ جۇمىستارى ءتۇرلى باعدارلامالار نەگىزىندە, جۇيەلى جۇرگىزىلىپ كەلەدى. سونىڭ ءبىر مىسالى – الداعى قازان ايىندا باستاۋ الماقشى «TalpynUp» تالىمگەرلىك باعدارلاماسى. التى ايعا جوسپارلانعان باعدارلاما – Imperial College London ( ۇلىبريتانيا) پروفەسسورلارى مەن بيزنەس-ترەنەرلەر قاۋىمداستىعىنىڭ (قازاقستان) بىرلەسكەن جوباسى. ورتالىق كوممۋنيكاتسيالار قىزمەتى الاڭىندا وتكەن ءباسپاسوز كونفەرەنتسياسىندا جوبانى ۇيىمداستىرۋشىلار جاڭا قاناتقاقتى جوبا جانە جالپى ايەلدەر كاسىپكەرلىگىنىڭ دامۋى جايىندا كەڭىنەن اڭگىمەلەپ بەردى.
بريتاندىق ساراپشىلار, Imperial College London پروفەسسورلارى ميشەل روگان مەن اننە تەر بۇكىل الەمدە ايەلدەر ۇقساس كەدەرگىلەرگە تاپ بولاتىنىن جانە تالىمگەرلىك باعدارلامالار ولارعا networking, ياعني پايدالى بايلانىستار ورناتۋعا كومەكتەسەتىنىن اتاپ ءوتتى. ايەلدەر بيزنەسى, ساراپشىلار اتاپ وتكەندەي, ارقاشان باسەكەلەستىكتەن گورى ىنتىماقتاستىققا نەگىزدەلگەن.
«McKinsey Global Institute ەسەبىنە سايكەس, ايەلدەردىڭ ەكونوميكالىق قاتىسۋى ەرلەرمەن تەڭ بولاتىن ستسەناريدى جۇزەگە اسىرۋ 2025 جىلعا قاراي جىل سايىنعى الەمدىك ىشكى جالپى ءونىمنىڭ 28 ترلن دوللارعا (26%) وسۋىنە اكەلۋى مۇمكىن. ەلىمىز تۋرالى ايتار بولساق, ۇلتتىق ەكونوميكا مينيسترلىگىنىڭ دەرەكتەرى بويىنشا, رەسپۋبليكانىڭ ءىجو-دەگى شاعىن جانە ورتا بيزنەس ۇلەسىنىڭ ءوسۋى 10 جىلدا 16% قۇراپ, 2022 جىلى 33,5%-عا جەتكەن. قازاقستاننىڭ شوب-پەن اينالىساتىنداردىڭ 31%-ى نەمەسە 1 ميلليونى ايەلدەر», دەدى بيزنەس-ترەنەرلەر قاۋىمداستىعىنىڭ باسشىسى ايگەرىم تارباعاتاەۆا.
سونداي-اق سپيكەر دەف-ءتىڭ «جۇمىس ورىندارىنىڭ بولاشاعى – 2023» ەسەبىنە سايكەس, جۇمىس ورىندارىنىڭ 23%-ى 2027 جىلعا قاراي وزگەرەتىنىن اتاپ ءوتتى. ەڭ كوپ قىسقارتۋلار اكىمشىلىك پوزيتسيالار مەن ءداستۇرلى كاسىپتەر بويىنشا بولادى دەپ كۇتىلۋدە. وسى تۇرعىدا جۇمىس ىستەيتىن ايەلدەر ەڭبەك نارىعىنىڭ وزگەرۋىنە بايلانىستى ءجيى زارداپ شەگەدى, ويتكەنى كوپشىلىگى قىزمەت كورسەتۋ جانە دەنساۋلىق ساقتاۋ سالاسىنداعى اكىمشىلىك جۇمىستارمەن اينالىسادى.
«ايەلدەر كاسىپكەرلىگىن جانە ايەلدەردى دامىتۋ اياسىندا قاۋىمداستىقتا «ايەلدەردىڭ دامۋ كلۋبى» اشىلدى, وندا ءبىز تەگىن نەگىزدە ءتۇرلى فورماتتا وقىتۋلار وتكىزەمىز. سونداي-اق قازان ايىندا Imperial College London-مەن بىرلەسىپ ايەلدەر بيزنەس-داعدىلارى مەن ءوز بيزنەسىنىڭ جاعدايىن جاقسارتۋى ءۇشىن «TalpynUp» التى ايلىق تالىمگەرلىك باعدارلاماسى باستالادى», دەدى ايگەرىم تارباعاتاەۆا.
سوڭعى جىلدارى مەملەكەت ەلدەگى ايەلدەر كاسىپكەرلىگىن دامىتۋعا ايتارلىقتاي كوڭىل ءبولىپ كەلەدى. كاسىپكەر ايەلدەردىڭ ەكونوميكالىق بەلسەندىلىگىن قولداۋ ماقساتىندا ءتۇرلى قارجىلاي جانە قارجىلاي ەمەس قولداۋ شارالارى قاراستىرىلعان. ايتالىق, 2022 جىلدىڭ قورىتىندىسى بويىنشا سىياقى مولشەرلەمەسىن سۋبسيديالاۋ شەڭبەرىندە كاسىپكەر ايەلدەردىڭ 6 مىڭنان اسا جوباسى, نەسيەلەرگە كەپىلدىك بەرۋ بويىنشا 4 مىڭعا جۋىق جوبا قولداۋ تاپتى.
بىلتىرعى ناۋرىزدان باستاپ ەل وڭىرلەرىندە ايەلدەر كاسىپكەرلىگىن دامىتۋ ورتالىقتارى جۇمىس ىستەي باستادى. ورتالىقتار ارقىلى كاسىبىن دوڭگەلەتىپ وتىرعان ىسكەر حانىمدار مەن جەكە كاسىپتى قولعا العان قىز-كەلىنشەكتەرگە قارجىلاي ەمەس بارلىق قىزمەت تۇرلەرىنەن قولداۋ كورسەتىلىپ, جەكە بيزنەس جوبالاردى ىسكە اسىرۋدا تاجىريبەلىك كومەك تۇرلەرى ۇسىنىلاتىن بولادى. سونىمەن قاتار وقىتۋ ترەنينگتەرى مەن شەبەرلىك سىنىپتارىن ۇيىمداستىرۋ, جەڭىلدەتىلگەن نەسيە بەرۋ باعدارلامالارىنا, كووپەراتيۆتىك قوزعالىستارعا تارتۋ, دايىن ونىمدەردى نارىققا وتكىزۋ اياسىن كەڭەيتۋ جاعىنان كومەك كورسەتۋ كوزدەلگەن. ەلىمىزدە ايەلدەر كاسىپكەرلىگىن قولداۋ جونىندەگى جۇمىستار الداعى ۋاقىتتا دا جالعاسا بەرەدى.
