فوتو: اشىق دەرەككوز
جيىندا سەنات دەپۋتاتى ءلاززات رىسبەكوۆا استانا قالاسى اكىمىنىڭ ورىنباسارى ەرسىن وتەباەۆتان ەلورداداعى جول قوزعالىسى قاۋىپسىزدىگى قالاي رەتتەلىپ جاتقاندىعىن سۇرادى.
«وتكەن جىلى «قازاقستان رەسپۋبليكاسىنىڭ استانانى جانە رەسپۋبليكالىق ماڭىزى بار قالالاردى دامىتۋ ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭدى ىسكە اسىرۋ ماقساتىندا جول قوزعالىسىن ۇيىمداستىرۋ ورتالىعى قۇرىلدى. ونىڭ نەگىزگى فۋنكتسيالارى – پاركينگتەر مەن تۇراقتاردى پايدالانۋ مونيتورينگى, باعدارشامداردى باسقارۋ, كولىك اعىندارىن رەتتەۋ جانە كولىك ينفراقۇرىلىمى وبەكتىلەرىن باقىلاۋ. بۇل شارالار استانا قالاسىنداعى جول قوزعالىسى قاۋىپسىزدىگى دەڭگەيىنە قالاي اسەر ەتتى جانە ورتالىق ءبىر جىل ىشىندە قانداي وڭ ناتيجەلەرگە قول جەتكىزدى؟», دەدى سەناتور.
ەرسىن وتەباەۆتىڭ ايتۋىنشا, ورتالىق جول قاۋىپسىزدىگىن ارتتىرۋ, كوشە-جول جەلىسىنىڭ وتكىزۋ قابىلەتىن جاقسارتۋ جانە ەكولوگيالىق جۇكتەمەنى ازايتۋ ماقساتىندا قۇرىلعان.
«قازىرگى ۋاقىتتا كومپانيا 12 مونيتورينگتىك كەشەنمەن جابدىقتالعان جانە قالاداعى كولىك قوزعالىسىن تۇراقتى باقىلاۋدا ۇستايدى. پيلوتتىق رەجيمدە تاۋلىگىنە شامامەن 1500 قۇقىقبۇزۋشىلىق تىركەلەدى», دەدى ە.وتەباەۆ.
ايتا كەتەيىك, سوڭعى اپتادا ەلىمىزدە جول-كولىك وقيعاسى ايتارلىقتاي كوبەيگەن. كۇنى كەشە الماتى وبلىسىنداعى كولىك تىزگىندەگەن ءجاسوسپىرىم 12 جاستاعى بالانى قاعىپ كەتكەنىن جازعان ەدىك.
