فوتو: اشىق دەرەككوز
ءوز سوزىندە ەرلان سارسەمباەۆ زاڭ جوباسى جالپىۇلتتىق ديالوگ, قوعامدىق قاتىسۋ جانە «حالىق ۇنىنە قۇلاق اساتىن مەملەكەت» تۇجىرىمداماسى قاعيداتتارىنا نەگىزدەلگەن قوعام مەن مەملەكەتتىڭ ءوزارا ءىس-قيمىلىنىڭ زاماناۋي ينستيتۋتسيونالدىق مودەلىن قالىپتاستىرۋعا باعىتتالعانىن اتاپ ءوتتى.
«كونستيتۋتسيالىق زاڭ جوباسىندا قازاقستان حالىق كەڭەسىنىڭ ناقتى ۇيىمداستىرۋشىلىق مودەلى قالىپتاستىرىلعان. نەگىزگى ماسەلەلەر بويىنشا شەشىم قابىلدايتىن جوعارى باسشىلىق ورگان – سەسسيا. ونىڭ قۇزىرەتىنە زاڭ جوبالارىن ەنگىزۋ جانە رەفەرەندۋم وتكىزۋ تۋرالى باستامالار دا كىرەدى. سەسسيالار ارالىعىندا اعىمداعى قىزمەتتى جۇزەگە اسىرىپ, شەشىمدەردى دايىنداۋدى قامتاماسىز ەتەتىن القالى ورگان – تورالقا جۇمىس ىستەيدى», دەدى مينيستر.
زاڭ جوباسىندا «قازاقستان حالىق كەڭەسىنىڭ» قۇرامىن قالىپتاستىرۋ ماسەلەلەرىنە ەرەكشە نازار اۋدارىلعان. ەتنومادەني بىرلەستىكتەردىڭ, قوعامدىق ۇيىمدار مەن كوممەرتسيالىق ەمەس سەكتوردىڭ, سونداي-اق ءماسليحاتتار مەن قوعامدىق كەڭەستەردىڭ تەڭگەرىمدى ءارى تەڭ وكىلدىگى كوزدەلەدى.
«قازاقستان حالىق كەڭەسىنىڭ قۇرامى اتالعان توپتاردىڭ ۇسىنىمدارىن ەسكەرە وتىرىپ, 42 مۇشەدەن تەڭ دارەجەدە قالىپتاستىرىلاتىن بولادى. مۇنداي ءتاسىل ءارتۇرلى قوعامدىق مۇددەلەردى ەسكەرۋگە جانە ورتاق كەلىسىلگەن ۇستانىمدى قالىپتاستىرۋعا مۇمكىندىك بەرەدى», دەدى ەرلان سارسەمباەۆ.
ءمينيستردىڭ سوزىنشە, زاڭ جوباسىندا كەڭەستىڭ ازاماتتىق قوعام ينستيتۋتتارىمەن جانە مەملەكەتتىك ورگاندارمەن رەسپۋبليكالىق ءارى وڭىرلىك دەڭگەيلەردە ءوزارا ءىس-قيمىل تەتىكتەرى بەكىتىلەدى.
ەسكە سالا كەتەيىك, بۇعان دەيىن حالىق كەڭەسىنىڭ جۇمىسى قالاي قارجىلاندىرىلاتىندىعىن جازعان بولاتىنبىز.
