فوتو: اشىق دەرەككوز
مينيستر كونستيتۋتسيالىق زاڭ جوباسىندا «قازاقستان حالىق كەڭەسىنىڭ» جوعارى كونستيتۋتسيالىق كونسۋلتاتيۆتىك ورگان رەتىندە قۇقىقتىق مارتەبەسى ايقىندالاتىنىن اتاپ ءوتتى.
«كونستيتۋتسيالىق زاڭ جوباسىندا «قازاقستان حالىق كەڭەسىنىڭ» ناقتى ۇيىمداستىرۋشىلىق مودەلى قالىپتاستىرىلعان. نەگىزگى ماسەلەلەر بويىنشا شەشىم قابىلدايتىن جوعارى باسشىلىق ورگان سەسسيا بولادى. ونىڭ قۇزىرەتىنە زاڭ جوبالارىن ەنگىزۋ جانە رەفەرەندۋم وتكىزۋ تۋرالى باستامالار دا كىرەدى. سەسسيالار ارالىعىندا اعىمداعى قىزمەتتى جۇزەگە اسىرىپ, شەشىمدەردى دايىنداۋدى قامتاماسىز ەتەتىن القالى ورگان – تورالقا جۇمىس ىستەيدى», دەدى ەرلان سارسەمباەۆ.
سونداي-اق مينيستر قازاقستان حالىق كەڭەسىنىڭ قۇرامىن قالىپتاستىرۋ ماسەلەلەرىنە ەرەكشە نازار اۋدارىلعانىن ايتتى.
«زاڭ جوباسىندا قوعامنىڭ نەگىزگى توپتارى – ەتنومادەني بىرلەستىكتەردىڭ, قوعامدىق بىرلەستىكتەر مەن كوممەرتسيالىق ەمەس ۇيىمداردىڭ, سونداي-اق ءماسليحاتتار مەن قوعامدىق كەڭەستەردىڭ تەڭ دارەجەدەگى وكىلدىگى كوزدەلەدى. ياعني, «قازاقستان حالىق كەڭەسىنىڭ» قۇرامى اتالعان توپتاردىڭ ۇسىنىمدارىن ەسكەرە وتىرىپ, 42 مۇشەدەن تەڭ دارەجەدە قالىپتاستىرىلادى», دەدى مينيستر.
ەرلان سارسەمباەۆ «قازاقستان حالىق كەڭەسى» مۇشەلەرىنىڭ وكىلەتتىك مەرزىمىن ءتورت جىل دەپ بەلگىلەۋ ۇسىنىلاتىنىن جەتكىزدى. سونداي-اق كەڭەستىڭ توراعاسىن سەسسيادا ءتورت جىلدىق مەرزىمگە, پرەزيدەنتتىڭ ۇسىنىسى بويىنشا جانە كەڭەستىڭ جالپى مۇشەلەرىنىڭ كەمىندە ۇشتەن ءبىرىنىڭ باستاماسىمەن سايلاۋ ۇسىنىلاتىنىن ايتتى. ءوز كەزەگىندە, ينستيتۋتتىڭ تۇراقتى جۇمىس ىستەۋىن قامتاماسىز ەتۋ ماقساتىندا ءبىر تۇلعانىڭ كەڭەستىڭ توراعاسى بولىپ ەكى رەتتەن ارتىق سايلانۋىنا جول بەرىلمەيتىنى تۋرالى نورما كوزدەلگەنىن ەسكەرتتى.
«زاڭ جوباسىنىڭ ماڭىزدى بولىگى «قازاقستان حالىق كەڭەسىنىڭ وكىلەتتىكتەرىنە ارنالعان. ولاردىڭ قاتارىنا ىشكى ساياسات ماسەلەلەرى بويىنشا ۇسىنىستار ازىرلەۋ, زاڭنامالىق باستاما جاساۋ قۇقىعى ارقىلى زاڭ شىعارۋ پروتسەسىنە قاتىسۋ, رەفەرەندۋم وتكىزۋ جونىندە باستامالار كوتەرۋ, قوعامدىق تالقىلاۋلار مەن ديالوگ الاڭدارىن ۇيىمداستىرۋ, سونداي-اق قوعامدىق باقىلاۋعا قاتىسۋ كىرەدى. بۇل رەتتە بارلىق وكىلەتتىكتەر كونسۋلتاتسيالىق جانە باستاماشىلىق سيپاتتا بولىپ, مەملەكەتتىك بيلىك جۇيەسىمەن تەپە-تەڭدىكتى ساقتاۋدى قامتاماسىز ەتەدى», دەدى ەرلان سارسەمباەۆ.
ءمينيستردىڭ مالىمەتىنشە, كونستيتۋتسيالىق زاڭ جوباسى قابىلدانعان جاعدايدا, قولدانىستاعى «قازاقستان حالقى اسسامبلەياسى تۋرالى» زاڭنىڭ كۇشى جويىلدى دەپ تانۋ ۇسىنىلادى. وسىلايشا قازاقستان قوعامدىق-مەملەكەتتىك ءوزارا ءىس-قيمىلدىڭ جاڭا مودەلىنە كوشەتىن بولادى.
