قازاقستان فينتەح قاۋىمداستىعىنىڭ جۇرگىزگەن ساۋالداماسىنىڭ ناتيجەسىنە كوز جۇگىرتسەك, بالالارىن مەكتەپكە دايىنداۋ ءۇشىن ونلاين-قارىز الاتىنداردىڭ كورسەتكىشى ەداۋىر كوپ ەكەنى بايقالادى. اتالعان الەۋمەتتىك ساۋالداماعا 529 رەسپوندەنت قاتىسقان. وندا مەكتەپ جاسىنداعى بالالارى بار اتا-انانىڭ كوبى ولاردى مەكتەپكە دايىنداۋ ءۇشىن ونلاين-قارىز الۋعا جۇگىنەتىنىن ايتقان. ونىڭ 33 پايىزى شاعىن نەسيەنى كەمىندە ءبىر رەت العانىن, ال تاعى 35 پايىزى جىل سايىن 1 قىركۇيەك قارساڭىندا تۇراقتى تۇردە الادى ەكەن. شاعىن نەسيە ۇيىمدارىنىڭ مالىمەتىنە سەنسەك, باسقا ايلارمەن سالىستىرعاندا قىركۇيەك قارساڭىندا ونلاين-نەسيە الۋعا دەگەن سۇرانىس ورتا ەسەپپەن 3%-عا ارتقان.
زەرتتەۋ ناتيجەسىنە سايكەس, ەلىمىزدە ءبىر بالانى مەكتەپكە دايىنداۋ ءۇشىن 200 مىڭ تەڭگەدەن ارتىق جۇمسايتىندار سانى – 11 پايىز, 100 مىڭنان 200 مىڭعا دەيىن جۇمسايتىندار – 38 پايىز, 50 مىڭ مەن 100 مىڭ كولەمىندە جۇمسايتىندار – 46 پايىز, ال 50 مىڭ تەڭگە جۇمسايتىنداردىڭ كورسەتكىشى – 5 پايىز عانا.
«ساۋالدامادا بەلگىلى بولعان دەرەكتەرگە قاراپ وتىرساق, اتا-انالاردىڭ بالالارىن مەكتەپكە دايىنداۋ كەزىندە جەدەل قارجى تابۋ ءۇشىن شاعىن نەسيە بەرەتىن ۇيىمدارعا جۇگىنۋگە ءماجبۇر ەكەنىن كورەمىز. ونىڭ ءوسىمى كوپ ەكەنىنە قاراماستان, اتا-انالار بالالارىن وقۋدان قالدىرعىسى كەلمەيدى. ارينە, بۇعان شاراسىز كۇيدە بارىپ وتىرعاندار وسال توپتاعى وتباسىلار ەكەنى انىق. وكىنىشتىسى سول – ەڭ ءتيىمدى جول ازىرگە وسى شاعىن نەسيە ۇيىمدارىنا جۇگىنۋ بولىپ وتىر», دەيدى قازاقستان فينتەح قاۋىمداستىعىنىڭ وكىلى.
بالانى مەكتەپكە دايىنداۋعا شاعىن نەسيە الاتىنداردىڭ جالپى كورسەتكىشى 68 پايىز بولسا, ال 32 پايىزى ءوز قاراجاتىمەن قامتاماسىز ەتەدى ەكەن. ۇلتتىق ستاتيستيكا بيۋروسىنىڭ دەرەكتەرى بويىنشا, بيىل 1 قاڭتاردان باستاپ ەڭ تومەنگى جالاقى 70 مىڭ تەڭگە مولشەرىندە بەلگىلەنسە, زەرتتەۋ دەرەكتەرى بويىنشا بالالاردى مەكتەپكە دايىنداۋ ءۇشىن 2023 جىلى ءبىر بالاعا ورتا ەسەپپەن 100 مىڭ تەڭگە كەتەدى. دەمەك 30 پايىز جەتىسپەۋشىلىك بار دەگەن ءسوز. وسى تاپشىلىقتىڭ ورنىن اتا-انالار قارىزدانىپ-قاۋعالانىپ تولتىرادى. ويتكەنى 100 مىڭ تەڭگەنى كوپتەگەن وتباسىنىڭ وتباسىلىق بيۋدجەتى كوتەرە المايتىنىن ۇلتتىق ستاتيستيكا بيۋروسى ۇسىنعان مىنا تسيفرلار دا دالەلدەيدى. 16 جاسقا دەيىنگى بالاسى بار وتباسىلاردىڭ 77,6 پايىزى جان باسىنا شاققاندا 100 مىڭ تەڭگەگە دەيىن جۇمساي السا, ايىنا 100 مىڭنان 150 مىڭ تەڭگەگە دەيىن جۇمساۋعا مۇمكىندىگى بار وتباسىلار ۇلەسى نەبارى 15 پايىزدى, 150 مىڭنان كوپ جۇمساي الاتىندار ۇلەسى 6,6 پايىزدى كورسەتىپ وتىر.
قورىتا ايتقاندا, «Amanat» پارتياسى حالىقتىڭ قارجىلىق ساۋاتتىلىعىن ارتتىرۋ ماقساتىندا Halyk Bank-پەن بىرگە «قارىزسىز قوعام» جوباسىن باستاعانى بەلگىلى. سونىڭ ناتيجەسىندە ەلىمىزدىڭ 8 ايماعىندا 20 مىڭنان اسا ادام قارجىلىق ساۋاتىن ارتتىرعان. ولاردىڭ كوپشىلىگى – 10 جانە ودان دا كوپ نەسيە العان ادامدار. ولاردىڭ سوزىنە سەنسەك, بۇل جوبا از ۋاقىت ىشىندە ءوز تيىمدىلىگىن كورسەتتى دەيدى. الايدا جوعارىداعى زەرتتەۋ ناتيجەسىنە قاراساق, جاعدايدىڭ ءالى دە ءماز ەمەس ەكەنىن بايقاپ وتىرمىز. ماسەلەن, «قارىزسىز قوعام» جونىندە بيىلعى جولداۋدا مەملەكەت باسشىسى دا تىلگە تيەك ەتتى. راس, قاعازداعى ستاتيستيكاعا سەنسەك, ءبارى كەرەمەت, ال ءىس جۇزىندە باسقاشا بولىپ وتىرعانى انىق. بۇل رەتتە پرەزيدەنت: «باستى ماقسات – قاعاز جۇزىندەگى بيىك جەتىستىكتەرگە قول جەتكىزۋ ەمەس, شىن مانىندە, حالىقتىڭ تۇرمىس ساپاسىن جاقسارتۋ بولۋعا ءتيىس», دەدى.
