ءجۇز مىڭ وتباسىنىڭ جاعدايى جاقساردى

ەڭبەك جانە حالىقتى الەۋمەتتىك قورعاۋ مينيسترلىگى مالىمدەگەندەي, مەملەكەتتىك قولداۋ شارالارى ارقىلى 2022 جىلى اتاۋلى الەۋ­مەتتىك كومەك (ااك) العان 100,4 مىڭ وتباسى بيىل كەدەيلىك جاع­دايىنان شىقتى. بۇل رەتتە ااك-ءتىڭ نەگىزگى ماقساتى – اقشالاي تولەم تۇرىندە قولداۋدى جۇزەگە اسىرۋ جانە وتباسىنىڭ ەڭبەككە قابىلەتتى مۇشەلەرىن جۇمىسپەن قامتۋعا جاردەمدەسۋدىڭ بەلسەندى شارالارىنا تارتۋ ارقىلى وتباسىن قيىن ومىرلىك جاعدايدان شىعارۋ ەكەنىن ايتا كەتكەن ءجون.

اتالعان شارالار مىناداي قادام­داردى قامتيدى: تابىسى وڭىرلىك ەڭ تومەنگى كۇنكورىس دەڭگەيىنىڭ 70%-دان اسپايتىن ازاماتتارعا توقسان سايىن الەۋمەتتىك كومەك تاعايىنداۋ; تابىسى از وتباسىلارداعى 1 جاستان 6 جاس­تى قوسا العانداعى ءار بالاعا 1,5 اەك (5 175 تەڭگە) مولشەرىندە اي سايىنعى قوسىمشا تولەم بەرۋ; جۇمىسقا ورنالاستىرۋ, ءوز ءىسىن اشۋعا نيەتتى وتباسىلارعا گرانتتار بەرۋ, بىلىكتىلىكتى ارتتىرۋ كۋرستارىنا جىبەرۋ جانە باسقا دا ۇسىنىستار بەرۋ ارقىلى جۇمىسپەن قامتۋعا جاردەمدەسۋ.

بىلتىر ااك الۋشىلار سانى 141,5 مىڭ وتباسىن (728,7 مىڭ ادام) قۇرادى. ال وسى جىلدىڭ 1 تامىزىندا 102,7 مىڭ وتباسى ااك (538,9 مىڭ ادام) الدى. وڭىرلىك بولىنىستە بيىلعى جاعداي بويىنشا, ااك الۋشىلاردىڭ ەڭ كوپ سانى تۇركىستان وبلىسىندا – 25,1 مىڭ وتباسى (24,4%), شىمكەنت قالاسىندا – 11,1 مىڭ وتباسى (10,8%), قىزىلوردا وبلىسىندا – 8,8 مىڭ وتباسى (8,6%), الماتى وبلىسىندا – 8,6 مىڭ وتباسى (8,4%), جامبىل وبلىسىندا – 7,2 مىڭ وتباسى (7%), جەتىسۋ وبلىسىندا 6,2 مىڭ وتباسى (6%) تىركەلگەن.

سونىمەن قاتار ااك تاعايىن­داۋلارىنىڭ ەڭ از سانى ۇلىتاۋ وبلىسىندا – 459 وتباسى (0,4%), اتىراۋ وبلىسىندا – 903 مىڭ وتباسى (0,9%), سولتۇستىك قازاقستان وبلىسىندا – 1,4 مىڭ وتباسى (1,3%), قاراعاندى وبلىسىندا – 1,7 مىڭ وتباسى (1,6%) تىركەلگەن.

ااك الۋشىلاردىڭ باسىم كوپشىلىگى – بالالاردىڭ ۇلەسىندە, بۇل – 355,2 مىڭ ادام (65,9%), جۇمىس ىستەيتىن ازاماتتار – 80,1 مىڭ ادام (14,9%), بالالارعا, قارتتارعا, مۇگەدەكتىگى بار ادامدارعا كۇتىم جاسايتىن ادامدار – 70 مىڭ ادام (13% ), ال قالعان 6,2%-ى – ازاماتتار­دىڭ باسقا ساناتتارىنا تيەسىلى.

قابىلدانعان شارالاردىڭ, اسىرەسە جۇمىسپەن قامتۋعا جار­دەمدەسۋدىڭ بەلسەندى شارالارىنا تارتۋدىڭ ناتيجەسىندە 2022 جىلى اتاۋلى الەۋمەتتىك كومەك العان 141,5 مىڭ وتباسىنىڭ ىشىنەن ءوز ءومىرىن قالىپقا كەلتىرۋ ءۇشىن بەرىلگەن مۇمكىندىكتى ءساتتى پايدالانعان 100,4 مىڭ وتباسى كەدەيلىكتىڭ شەگىنەن شىقتى. سولاردىڭ ءبىرى – وڭتۇستىك وڭىردەن كوشىپ كەلگەن, قازىر سولتۇستىك قازاقستان وبلىسى قىزىلجار اۋدانىنىڭ تۇرعىنى اقنيەت التىنبايدىڭ وتباسى. ەرلى-زايىپتىلار مال شارۋاشىلىعىمەن اينالىسۋعا شەشىم قابىلداپ, وسى ماقساتتا ولار شاعىن نەسيە الدى.

ء«بىزدىڭ كامەلەتكە تولماعان ءتورت بالامىز بار. ءبىز ااك الۋشىلار قاتارىندا بولعان ەدىك. كۇيەۋىم مال شارۋاشىلىعىن دامىتىپ, ءوزىم دەكرەتتىك دەمالىستا جۇرگەن كەزىمدە ۇيدە پىسىرىلەتىن ۇن ونىمدەرى مەن كونديتەرلىك ونىمدەردى دايارلاۋمەن اينالىسىپ, وتباسىلىق مەرەكەلەر مەن مەيرامدارعا تاپسىرىستار قابىلدادىم. كەيىننەن ورتا مەكتەپكە الەۋمەتتىك پەداگوگ رەتىندە جۇمىسقا ورنالاستىم. ناتيجەسىندە, بۇگىندە وتباسىمىز – ااك الۋشىلار قاتارىندا ەمەس», دەدى اقنيەت.