التى ستۋدەنتكە جىلدىق وقۋ گرانتىن تابىس ەتكەن تۇلەك – ەرجان تاستامبەكوۆ. عىلىم جانە جوعارى ءبىلىم مينيسترلىگى تاراتقان اقپاراتقا سۇيەنسەك, جىلدىق وقۋ گرانتىنا ۇمىتكەرلەردى ىرىكتەۋ ستۋدەنتتەردىڭ الەۋمەتتىك جاعدايىنا, وقۋ ۇلگەرىمىنە جانە ۇبت-دا جينالعان ۇپاي سانىنا قاراي جۇرگىزىلگەن. ۋنيۆەرسيتەت پرورەكتورى دۋمان ايتماعامبەتوۆ, وقۋ ورداسىنىڭ تۇلەگى, Zebra Coffee كوفەحانالار جەلىسىنىڭ نەگىزىن قالاۋشى ەرجان تاستامبەكوۆ, ENU Endowment Fund وكىلدەرى 1-كۋرس ستۋدەنتتەرىمەن اڭگىمەلەسۋ وتكىزىپتى. ناتيجەسىندە, كاسىپكەر 2023-2024 وقۋ جىلىندا فيلولوگيا, ساۋلەت جانە قۇرىلىس, الەۋمەتتىك عىلىمدار فاكۋلتەتىنىڭ دارىندى ستۋدەنتتەرىنە قولداۋ كورسەتەتىن بولدى.
– گرانت الۋشىلاردى ىرىكتەۋ ارنايى كريتەريلەر بويىنشا جۇرگىزىلدى. بيىل مەملەكەتتىك گرانتقا ءبىر-ەكى ۇپاي جەتپەگەن جانە اكىمدىكتەر مەن ءتۇرلى قوردىڭ گرانتتارىن يەلەنبەگەن, سونداي-اق ۋنيۆەرسيتەتتەگى وقۋ اقىسىن تولەۋگە مۇمكىندىگى تومەن ستۋدەنتتەردىڭ انكەتالارى قارالدى. ارينە, تاڭداۋ كەزىندە ءبىز دارىندى جاستاردىڭ الەۋمەتتىك جاعدايىن دا ەسكەردىك. ەڭ الدىمەن, قولداۋ مەن كومەككە مۇقتاج نەمەسە قيىن جاعدايعا تاپ بولعاندارعا باسىمدىق بەرىلدى. بەلسەندى ستۋدەنتتەرگە دە گرانت ءبولىندى, – دەدى ە.تاستامبەكوۆ.
ءامىرحان شەگەباەۆ ۇبت-دان 112 ۇپاي جيناعانىمەن, مەملەكەتتىك گرانتقا قول جەتكىزە المادى. دارىندى سپورتشى ۋنيۆەرسيتەت تۇلەگىنىڭ قولداۋىمەن بيىلعى وقۋ جىلىندا الەۋمەتتىك عىلىمدار فاكۋلتەتىندە تەگىن وقۋ مۇمكىندىگىنە يە بولدى. ءامىرحان – سپورت شەبەرلىگىنە كانديدات. شايبالى حوككەيدەن جاستار جانە مەكتەپ وقۋشىلارى اراسىندا ەل چەمپيوناتتارىنا, دوپتى حوككەيدەن قىسقى گيمنازياداعا قاتىسقان.
– اڭگىمەلەسۋ بارىسىندا ءوزىمنىڭ سپورتقا دەگەن قۇشتارلىعىم ەرەكشە ەكەنىن ايتتىم. وقۋدى بىتىرگەندە سپورتتىڭ بەدەلى مەن دەڭگەيىن ارتتىرۋعا كۇش سالعىم كەلەدى. گرانت العانىما وتە قۋانىشتىمىن جانە كاسىپكەر ەرجان تاستامبەكوۆ پەن ENU Endowment Fund قورىنا قولداۋ كورسەتكەنى ءۇشىن العىس ايتامىن, – دەيدى ءامىرحان.
ال اقتوبەدەن كەلگەن ايلانا ساپارعالي ادامداردىڭ ومىرلىك ماسەلەلەرىن شەشۋگە كومەكتەسكىسى كەلەدى. ويتكەنى ول – بولاشاق پسيحولوگ.
– شىنىمدى ايتسام, اڭگىمەلەسۋگە قاتىسقانىممەن, ءدال مۇنداي ءبىر عاجايىپ كۇتكەن جوق ەدىم. گرانت يەگەرى بولعانىمدى حابارلاعاندا سەنە المادىم. بۇل ماعان دا, انام ءۇشىن دە كۇتپەگەن, كەرەمەت جاڭالىق بولدى. بالا كەزىمدە استاناعا ءجيى كەلىپ, ەۋرازيا ۋنيۆەرسيتەتىنىڭ عيماراتىنا قاراپ, وسى بەدەلدى وقۋ ورداسىندا ءبىلىم الۋدى ارماندايتىنمىن. ساپالى ءبىلىم الىپ, سۇرانىسقا يە مامان بولىپ, بولاشاقتا ادامداردىڭ ومىرلىك ماسەلەلەرىن شەشۋگە كومەكتەسكىم كەلەدى, – دەيدى ايلانا.
ىرىكتەلگەن ىزدەنۋشىلەردىڭ قاتارىندا جامبىل وبلىسى قاراتاۋ قالاسىنان كەلگەن ارۋجان تورەگەلدى مەن استانالىق سىمبات بازارباي دا بار. ەكەۋى دە – فيلولوگيا فاكۋلتەتىنىڭ ستۋدەنتى. جىلدىق گرانت يەلەرى مەتسەنات پەن ۋنيۆەرسيتەت سەنىمىن اقتاۋعا تىرىسامىز دەيدى.
ەسكە سالا كەتەيىك, 2022 جىلى ۋنيۆەرسيتەت تۇلەكتەرىنىڭ باستاماسىمەن ENU Endowment Fund قۇرىلعان بولاتىن. قور ارقىلى دارىندى جانە مۇقتاج ستۋدەنتتەرگە قولداۋ كورسەتىلەدى.
