– ەلىمىزدە جوعارى ءبىلىمدى جانە عىلىمدى دامىتۋدىڭ 2023-2029 جىلدارعا ارنالعان تۇجىرىمداماسىن ىسكە اسىرۋ جونىندەگى ءىس-قيمىل جوسپارىندا ستۋدەنتتەردى جاتاقحانامەن قامتۋ قاراستىرىلعان. بۇعان قوسا ء«بىلىم بەرۋ قىزمەتىنە قويىلاتىن بىلىكتىلىك تالاپتارىن جانە ولارعا سايكەستىكتى راستايتىن قۇجاتتاردىڭ تىزبەسىن بەكىتۋ تۋرالى» بۇيرىقتا باسقا قالادان كەلگەن ءبىلىم الۋشىلاردىڭ كەمىندە 70 پايىزىنىڭ تۇرۋى ءۇشىن (جاتاقحانالار/حوستەلدەر/قوناقۇيلەر) جاعداي جاساۋ كوزدەلگەن. ەلىمىزدىڭ 104 جوعارى وقۋ ورنىنداعى جاتاقحانالار سانى 380 بىرلىكتى قۇرايدى, توسەكتىك ورىن سانى – 106 203 بىرلىك, ونىڭ ىشىندە 182 وبەكتى بويىنشا 24 560 توسەكتىك ورىن جالعا الىنعان. باتىس قازاقستان, پاۆلودار, شىعىس قازاقستان, اباي, جەتىسۋ, ۇلىتاۋ, اقتوبە, جامبىل, قىزىلوردا, ماڭعىستاۋ, الماتى وبلىستارىندا جانە شىمكەنت قالاسىندا قاجەتتىلىك جاتاقحانا مەن حوستەلدەردى جالعا الۋ ارقىلى وڭ شەشىمىن تاۋىپ وتىر. اقمولا, تۇركىستان, قوستاناي, قاراعاندى جانە اتىراۋ وبلىستارىندا 695-تەن 60 ورىنعا دەيىن قاجەتتىلىك بار, – دەدى عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم كوميتەتى توراعاسىنىڭ ورىنباسارى اقەركە ابىلايحان.
مينيسترلىك وكىلىنىڭ ايتۋىنشا, قازىر ەڭ ۇلكەن قاجەتتىلىك الماتى قالاسىندا تىركەلگەن – 14 مىڭ. سول سەكىلدى استانا قالاسىندا – 5 300 ورىن, سولتۇستىك قازاقستان وبلىسىندا 2 300 ورىن جەتىسپەيدى. وسى ءۇش وڭىردە جاتاقحاناداعى ورىن تاپشىلىعى وتكىر تۇر.
– بىلتىرعى جاعدايمەن سالىستىرعاندا ماسەلە اقىرىنداپ شەشىمىن تاۋىپ كەلەدى. مىسالى, وتكەن جىلى رەسپۋبليكا بويىنشا جاتاقحانا ورىندارىنا قاجەتتىلىك 69 مىڭ ورىن بولسا, بيىل بۇل كورسەتكىش 23 686 ورىندى قۇراپ وتىر. بىراق ءبىز ورىن تاپشىلىعى ازايدى دەپ ارقانى كەڭگە سالمايمىز. سەبەبى ءار تسيفردىڭ ارتىندا ءاربىر ستۋدەنتتىڭ تاعدىرى تۇر. سوندىقتان بۇل ماسەلەگە بىردە-ءبىر ۋنيۆەرسيتەتتىڭ باسشىلىعى بەيجاي قاراي المايدى. مينيسترلىك تە ءوز تاراپىنان بۇل باعىتتا جۇمىستار جۇرگىزىپ جاتىر. ايتالىق, بۇگىندە جاتاقحانا ماسەلەسىن شەشۋ ءۇشىن ەلىمىزدەگى 58 جوعارى وقۋ ورنى 182 وبەكتى نەمەسە 24 560 ورىندىق جاتاقحانا, جەكەمەنشىك حوستەلدەرمەن كەلىسىمشارتقا وتىردى. بۇل جەردە قويىلاتىن ەڭ باستى تالاپ – حوستەلدەردە تەك ستۋدەنتتەر تۇرۋى كەرەك, سونىمەن قاتار ولاردىڭ قاۋىپسىزدىگى ساقتالۋعا ءتيىس. اتا-انانىڭ كوبى حوستەل دەگەن ءسوزدى ەستىگەندە قورقادى. الايدا ونداعى جاسالعان جاعداي كەيبىر جاتاقحاناداعىدان جاقسى. نەگىزى حوستەلدەردى جەكەمەنشىك جاتاقحانالار دەپ ايتۋعا بولادى, – دەدى ا.ابىلايحان.
عىلىم جانە جوعارى ءبىلىم مينيسترلىگىنە قاراستى «قارجى ورتالىعى» اق-نىڭ ىلگەرىلەتۋ جانە سىرتقى كوممۋنيكاتسيالار دەپارتامەنتىنىڭ ديرەكتورى اينۇر ساعىندىقوۆا رەسپۋبليكا بويىنشا 8 مىڭنان اسا ورىندىق 32 جاتاقحانانى پايدالانۋعا بەرۋ جوسپارلانعانىن جەتكىزدى.
– 2023 جىلعى جوسپار بويىنشا جوعارى وقۋ ورىندارىنىڭ ستۋدەنتتەرى ءۇشىن 8 مىڭنان اسا ورىندىق 32 جاتاقحانانى پايدالانۋعا بەرۋ جوسپارلانعان. بۇگىندە 2 600 ورىندىق 6 جاتاقحانا ىسكە قوسىلدى. 6 مىڭنان اسا ورىندىق قالعان 26 جاتاقحانانى جىلدىڭ سوڭىنا دەيىن ىسكە قوسۋ جوسپارلانىپ وتىر. جالپى, جاتاقحانالارعا زارۋلىكتى جويۋ ماقساتىندا مەملەكەتتىك تاپسىرىستى ورنالاستىرۋ تەتىگى ازىرلەندى. وسى تەتىككە سايكەس كەز كەلگەن جەكە كاسىپكەر نەمەسە جوعارى وقۋ ورنى ءوز قاراجاتى ەسەبىنەن جاتاقحانانى پايدالانۋعا ەنگىزە الادى. تەك سودان كەيىن ءار ستۋدەنتكە مەملەكەتتىك تاپسىرىس ورنالاستىرىلادى. ەگەر جاتاقحانا جاڭا قۇرىلىس جوباسىمەن سالىنسا, وندا مەملەكەتتىك تاپسىرىس ءبىر ستۋدەنتكە جىلىنا 195 ايلىق ەسەپتىك كورسەتكىش كولەمىندە 6 جىل بويى تولەنەدى. بۇل – بارىنە ورتاق تالاپ. تەك الماتى قالاسىندا نورماتيۆ كوبىرەك. ويتكەنى بۇل – سەيسميكالىق ءوڭىر. الماتى قالاسىندا 6 جىل ىشىندە 1 ستۋدەنتكە قۇرىلىس كەزىندەگى نورماتيۆ 230 ايلىق ەسەپتىك كورسەتكىشتى قۇرايدى, – دەيدى ا.ساعىندىقوۆا.
«قارجى ورتالىعى» وكىلىنىڭ مالىمدەۋىنشە, قولدا بار عيماراتتى قايتا جابدىقتاۋ, قايتا جاڭعىرتۋ ارقىلى جاتاقحانانى پايدالانۋعا بەرۋگە دە بولادى. رەكونسترۋكتسيا جولىمەن مەملەكەتتىك تاپسىرىسقا ەنگىزىلسە, وندا رەسپۋبليكا بويىنشا 1 ستۋدەنتكە شاققاندا 8 جىلعا 47 ايلىق ەسەپتىك كورسەتكىشتى, الماتى, استانا قالالارى ءۇشىن 8 جىلعا 92 ايلىق ەسەپتىك كورسەتكىشتى قۇرايدى.
– وسى تەتىككە سايكەس, مەملەكەت تاراپىنان قويىلاتىن ەڭ باستى تالاپ – سالىنعان جاتاقحانانىڭ نىسانالى ماقساتىن وزگەرتپەۋ بويىنشا 20 جىلدىق شەكتەۋ. ەكىنشى تالاپ – جاتاقحانادا تەك ستۋدەنتتەر, دوكتورانتتار مەن ماگيسترانتتاردىڭ تۇرۋى. ءار جاتاقحانادا بەينەباقىلاۋ بولادى, تۋرنيكەت ورنالاستىرىلادى. ياعني ءار ستۋدەنتتىڭ قاشان كىرىپ, قاشان شىققانىن تەكسەرۋگە بولادى. بۇل تەتىك 2018 جىلدان باستاپ جۇمىس ىستەپ كەلەدى. 2018-2020 جىلدار ارالىعىندا جوعارى وقۋ ورىندارى ستۋدەنتتەرى ءۇشىن 26 مىڭنان استام ورىنعا 99 جاتاقحانا ەنگىزىلگەن. مۇنداي ورىنداردى ەنگىزۋ بويىنشا كوشباسشى وڭىرلەر – استانا, الماتى, شىمكەنت قالالارى جانە اباي, اتىراۋ, جامبىل وبلىستارى, – دەدى ا.ساعىندىقوۆا.
مينيسترلىكتىڭ تاراتقان اقپاراتىنا سۇيەنسەك, مۇقتاج ستۋدەنتتەردى جاتاقحانامەن قامتاماسىز ەتۋ ماسەلەلەرى جونىندەگى جەدەل شتاب جۇمىس ىستەيدى. شتاب الماتى قالاسى, بايتۇرسىنوۆ كوشەسى, 22-ءۇي, 1-كورپۋس مەكەنجايىندا ورنالاسقان. سونىمەن قاتار ستۋدەنتتەردى جاتاقحانامەن قامتاماسىز ەتۋ بويىنشا ارنايى احۋالدىق ورتالىق بار. احۋالدىق ورتالىقتىڭ بايلانىس نومەرلەرى: + 7 700 950 95 28; + 7 700 255 14 43. بۇدان بولەك, ستۋدەنتتەر ءوزىنىڭ جاتاقحاناعا قاتىستى الەۋمەتتىك جاعدايىمەن ءار وڭىردەگى جوعارى وقۋ ورىندارىنىڭ وكىلدەرىنەن قۇرىلعان ومبۋدسمەندەر ينستيتۋتىنا حابارلاسا الادى.
