اتالعان ءىس-شارانىڭ اشىلۋ سالتاناتىندا ءسوز العان پارلامەنت ءماجىلىسىنىڭ سپيكەرى ەرلان قوشانوۆ ەلىمىزدە ۇلتتىق سپورت تۇرلەرى مەملەكەت قولداۋىمەن قارقىندى دامىپ كەلە جاتقانىن جەتكىزدى.
ء«تول مادەنيەتىمىزدى دارىپتەپ, ۇلتتىق سپورتتى دامىتۋ – مەملەكەت باسشىسى قاسىم-جومارت توقاەۆتىڭ ءاردايىم ەرەكشە نازارىندا. ونىڭ ۇرپاق تاربيەسىندەگى ماڭىزى تۋرالى پرەزيدەنت تۇركىستاندا وتكەن ۇلتتىق قۇرىلتايدا ايتقان ەدى. ۇلتتىق سپورت تۇرلەرى – بۇل ءبىزدىڭ تاريحىمىزدىڭ جانە قازاق حالقىنىڭ وزىندىك ەرەكشەلىگىنىڭ ايناسى. ونى دامىتا وتىرىپ, رۋحاني مۇرامىزدى بولاشاق ۇرپاقتىڭ يگىلى ءۇشىن ساقتاپ قالامىز», دەدى ە.قوشانوۆ.
سونداي-اق ءماجىلىس توراعاسى الداعى جىلى ەلىمىزدە مەملەكەت باسشىسىنىڭ قولداۋىمەن وتەتىنىن V دۇنيەجۇزىلىك كوشپەلىلەر ويىندارىنىڭ ءمانى مەن ماڭىزىنا دا توقتالدى. ءبىرشاما مەملەكەتتىڭ سپورتشىلارى باس قوساتىن حالىقارالىق جارىستا ەلىمىزدىڭ الەۋەتىن تانىتۋعا مۇمكىندىك بەرىلەتىنىن تىلگە تيەك ەتتى.
VI فەستيۆالدىڭ اشىلۋ سالتاناتىنا قاتىسقان ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ الداعى بەس كۇندە سپورتشىلارىمىز كوكپار, اسىق اتۋ, توعىزقۇمالاق, جەكپە-جەك, جامبى اتۋ, تەڭگە ءىلۋ جانە تاعى دا باسقا ۇلتتىق ويىن تۇرلەرىنەن كۇش سىناساتىنىن ايتىپ ءوتتى.
سونداي-اق بۇل ءىس-شاراداعى ايتۋلى وقيعانىڭ ءبىرى – «Joryq» ات سپورتى فەدەراتسياسى وسىمەن ەكى جىل قاتارىنان وتكىزىپ وتىرعان « ۇلى دالا جورىعى» رەسپۋبليكالىق مارافون-بايگەسى. ەلىمىزدىڭ تۇكپىر-تۇكپىرىنەن ارنايى ات باسىن بۇرعان 20 كوماندا 14 كۇندە ەلوردادان تۇركىستانعا دەيىنگى 1 300 شاقىرىم قاشىقتىقتى ءجۇرىپ وتەدى.
«بايگە-مارافون «Amanat» پارتياسىنىڭ قولداۋىمەن بىلتىر تۇڭعىش رەت وتكىزىلگەن ەدى. بۇل – بولاشاقتا ۇلتتىق ات سپورتى تۇرلەرىنىڭ دامۋىنا ايرىقشا اسەر ەتەتىن ماڭىزدى ءارى اۋقىمدى وقيعا. ءدۇبىرلى دودا ەلىمىزدىڭ بارلىق ءوڭىرىن بىرىكتىردى. شاباندوزدار سايىن دالانى ات تۇياعىمەن دۇبىرلەتىپ, تۋعان جەردىڭ سىرىنا قانىعادى. سپورتتىق جەتىستىكتەردەن بولەك, بۇل بايگە ەتنوتۋريزمدى دامىتۋعا جانە حالقىمىزدىڭ مادەني مۇراسىن ناسيحاتتاۋعا مۇمكىندىك بەرەدى», دەدى «Amanat» پارتياسىنىڭ توراعاسى.
فەستيۆالدى ۇيىمداستىرۋعا تۋريزم جانە سپورت مينيسترلىگى, استانا قالاسىنىڭ اكىمدىگى, «Amanat» پارتياسى, «سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامى, ۇلتتىق سپورت قاۋىمداستىعى, تۋريزم مەن سپورتتى قولداۋ قورى ۇيىتقى بولدى.
