پوليتسيا دەپارتامەنتى جپقب جول ءجۇرىسىن قاداعالاۋدى ۇيىمداستىرۋ توبىنىڭ ەرەكشە تاپسىرمالار جونىندەگى اعا ينسپەكتورى, پوليتسيا پودپولكوۆنيگى بولات ءىزباساروۆ كەلتىرگەن دەرەككە سەنسەك, وڭىردەگى جول-كولىك وقيعاسىنىڭ سانى وتكەن جىلمەن سالىستىرعاندا 853-تەن 547-گە تومەندەگەن. ال جول-كولىك وقيعاسى سالدارىنان قازا بولعاندار سانى 18 پايىزعا ازايىپتى. سونداي-اق جاراقات العانداردىڭ دا قاراسى سيرەگەن. ناقتىراق ايتار بولساق, 39 پايىزعا تومەندەپتى. جاسوسپىرىمدەردىڭ قاتىسۋىمەن ورىن العان جول-كولىك وقيعاسىنىڭ ازايعانى بايقالعانىمەن, باقيعا اتتانعان ورىمدەي جاستاردىڭ كوبەيگەنى كوڭىلگە كىربىڭ ۇيالاتادى.
«جاسوسپىرىمدەردىڭ قاتىسۋمەن بولعان جول-كولىك وقيعاسى 27,4 پايىزعا, ياعني 248-دەن 180-گە ازايعان. سونداي-اق جاراقات العاندار سانى 33,5 پايىزعا, ناقتىراق ايتساق, 319-دان 212-گە دەيىن تومەندەگەن. الايدا قازا بولعاندار سانى 46,2 پايىزعا ارتتى. وتكەن جىلدىڭ ەسەپتى مەرزىمىندە 13 ءجاسوسپىرىم باقيعا اتتانسا, بيىل مەرت بولعاندار سانى 19-عا جەتىپ وتىر», دەيدى ب.ءىزباساروۆ.
جاۋاپتى مامان كەلتىرگەن دەرەكتەرگە قاراعاندا, جول-كولىك وقيعاسىنىڭ باسىم بولىگى كوشەلەردەگى جول جيەگىندە تىركەلەدى ەكەن. الايدا جەرگىلىكتى ماڭىزى بار اۆتوجولدارداعى اپات سالدارىنان قايتىس بولعان جاسوسپىرىمدەردىڭ سانى كۇرت ارتا تۇسكەنى شىنىندا دا جاعا ۇستاتادى.
ء«جاسوسپىرىم ءولىمى رەسپۋبليكالىق ماڭىزى بار اۆتوجولداردا دا از ەمەس. ماسەلەن, كەيىنگى جەتى ايدا بولعان 37 جول-كولىك وقيعاسى كەزىندە التى ءجاسوسپىرىم قىرشىننان قيىلدى. بۇل كورسەتكىش بارشامىزدى ويلاندىرادى. سونىمەن قاتار 52 ءجاسوسپىرىم ءتۇرلى دارەجەدەگى دەنە جاراقاتىن العان. جەرگىلىكتى ماڭىزى بار اۆتوجولدا 15 جول-كولىك وقيعاسى تىركەلىپ, سالدارىنان 8 ءجاسوسپىرىم قازا بولدى. سونداي-اق 11 ءجاسوسپىرىم دەنە جاراقاتىن الدى. وسى قارالى سانعا قاراپ-اق جاسوسپىرىمدەر ءولىمىنىڭ دەنى قاي دارەجەدەگى جولدا تىركەلىپ وتىرعانىن بايقاۋ قيىن ەمەس. كولىك وقيعاسىنىڭ باسىم بولىگى كوشەلەردە تىركەلەدى. بۇگىنگى كۇنگە دەيىن 128 جول اپاتى ورىن السا, سالدارىنان 5 ءجاسوسپىرىم كوز جۇمدى. سونىمەن قاتار 149 ءجاسوسپىرىم دەنە جاراقاتىن العانىن ايتا كەتۋ كەرەك», دەيدى ول.
ب.ءىزباساروۆ كەلتىرگەن دەرەككە سەنسەك, جىل باسىنان بەرى كامەلەت جاسىنا تولماعان جاياۋ جۇرگىنشىلەردىڭ قاتىسۋىمەن 83 جول-كولىك وقيعاسى انىقتالعان. سالدارىنان 2 ادام ومىرمەن قوش ايتىسسا, 88 ادام ءتۇرلى دارەجەدەگى دەنە جاراقاتىن الىپتى. سونداي-اق ۆەلوسيپەدتىڭ «جالىنان» تارتقان جاسوپىرىمدەردىڭ قاتىسۋىمەن 13 وقيعا تىركەلگەن. جول-كولىك وقيعاسىنىڭ كەسىرىنەن 1 ادام كوز جۇمىپ, جاراقاتتانعاندار سانى 13-كە جەتكەن.
بۇگىندە جاسوسپىرىمدەر موپەد تىزگىندەۋگە قۇمارتىپ العانى بەلگىلى. پوليتسيا وكىلىنىڭ ايتۋىنشا, موپەد مىنگەن جاستاردىڭ جول ەرەجەسىن بۇزۋى سالدارىنان 7 جول-كولىك وقيعاسى انىقتالعان. اپات سالدارىنان 7 ادام ءتۇرلى دارەجەدە دەنە جاراقاتىن العان. سونداي-اق كامەلەت جاسىنا تولماعان جولاۋشىلاردىڭ قاتىسۋىمەن تىركەلگەن 77 جول-كولىك وقيعاسى كەزىندە 16 ادام باقيلىق بولسا, 104 ازامات ءتۇرلى جاراقاتپەن اۋرۋحاناعا جەتكىزىلگەن.
جول-كولىك وقيعاسى كەزىندە ومىرمەن قوش ايتىسقان جاسوسپىرىمدەردىڭ باسىم بولىگى 10-14 جاستاعى بالالار ەكەن. بۇل جاعداي اتا-انالاردى ويلاندىرسا دەيسىڭ. ويتكەنى كورسەتكىش جىل وتكەن سايىن ارتىپ بارادى. ورىمدەي جاستاردىڭ ءومىر كورمەي جاتىپ باقيعا اتتانعانى جانىڭدى ايازداي قاريدى.
«جاسوپىرىمدەر ءولىمىنىڭ ارتقانى كىمدى دە بولسا الاڭداتادى. سوندىقتان اتا-انالار بالالارىن قاتاڭ قاداعالاسا دەيمىز. ماسەلەن, 7-10 جاس ارالىعىنداعى بالالاردىڭ قاتىسۋمەن بولعان 37 جول-كولىك وقيعاسى سالدارىنان 41 ادام جاراقاتتانسا, 10-14 جاستاعى 4 ءجاسوسپىرىم قايتىس بولدى. 42 ادام ءتۇرلى دارەجەدە جاراقات الدى. 14-16 جاستاعى جاسوسپىرىمدەردىڭ قاتىسۋىمەن تىركەلگەن 20 جول اپاتى كەزىندە 3 ادام باقيعا اتتانعان. 16-18 جاستاعى ءجاسوسپىرىمنىڭ قاتىسۋىمەن بولعان جول-كولىك وقيعاسى كەزىندە 2 ادام قايتىس بولدى», دەيدى ب.ءىزباساروۆ.
ايماقتا جول قاۋىپسىزدىگىن قامتاماسىز ەتۋ ماقساتىندا اۋقىمدى جۇمىس اتقارىلعانىنا قاراماستان, قۇقىق بۇزۋشىلىق سانى 3 098-گە جەتكەنىن دە ايتا كەتۋ كەرەك. پوليتسيا دەپارتامەنتى ءىس-شارالار جوسپارىنا سايكەس بۇل باعىتتا اتقارىلعان جۇمىستىڭ از ەمەس ەكەنىن العا تارتادى.
«جىل باسىنان بەرى جاسوسپىرىمدەردىڭ قاۋىپسىزدىگىن قامتاماسىز ەتۋ ماقساتىندا وبلىس اۋماعىندا «ابايلاڭىز, بالالار!», «بالالاردىڭ جولداعى قاۋىپسىزدىگى», «نازار اۋدارىڭىز, بالالار!», «جۇرگىزۋشى, اباي بولىڭىز, جولاۋشىڭىز – بالا!» تاقىرىپتارىندا جانە وزگە دە پروفيلاكتيكالىق ءىس-شارالار مەن اكتسيالار ۇيىمداستىرىلدى. بارلىق مەكتەپتە وتكىزىلگەن اتا-انا جينالىسىندا بالالار قاۋىپسىزدىگىنە قاتىستى ءتۇسىندىرۋ جۇمىستارى جۇرگىزىلدى», دەيدى دەپارتامەنت وكىلى.
قىسقاسى, پوليتسيا قىزمەتكەرلەرى تاراپىنان از جۇمىس اتقارىلماعان. الايدا ءجاسوسپىرىم ءولىمى ازايار ەمەس. نەگە؟ قاراپايىم جۇرت قۇزىرلى ورگان قىزمەتكەرلەرىنىڭ ەسكەرتۋلەرىن ەرەن ساناماي ما؟ الدە كولىك تىزگىندەگەن جۇرگىزۋشىلەردىڭ جاۋاپكەرشىلىگى تومەن بە؟ مۇمكىن وڭ-سولىن باعامداپ ۇلگەرمەگەن بالالارىن باقىلاۋسىز جىبەرگەن اتا-انا كىنالى بولار؟ جەتى ايدىڭ قورىتىندىسى بويىنشا 19 ءجاسوسپىرىم ومىرمەن قوش ايتىسسا, جىل سوڭىنا دەيىن بۇل قايعىلى سان قانشاعا جەتەتىنى بەيمالىم. ءبىر نارسە انىق: اۆتوكولىك تىزگىندەگەن جۇرگىزۋشى دە, جولدا جۇرگەن ازاماتتار دا قاۋىپسىزدىك ەرەجەلەرىن قاتاڭ ساقتامايىنشا ءولىم-ءجىتىم سيرەمەيتىنىن قاتاڭ ەسكەرۋىمىز كەرەك.
جامبىل وبلىسى
