مەملەكەت باسشىسى كامەلەتكە تولماعاندارعا جاسالعان زورلىق-زومبىلىقتىڭ كەز كەلگەن تۇرىنە قاتىستى جازانى كۇشەيتۋدى تالاپ ەتىپ وتىر. جول, عيمارات, كيىم-كەشەك, ازىق-ت ۇلىك, ياعني بارلىعى بالالار ءۇشىن قاۋىپسىز بولۋى كەرەكتىگىن, سونداي-اق وسكەلەڭ ۇرپاقتىڭ پسيحيكالىق ساۋلىعى – وتە ماڭىزدى ماسەلە ەكەنىن اتاپ ءوتتى. ءبىلىم بەرۋ مەكەمەلەرىندەگى پسيحولوگيالىق قولداۋ قىزمەتىن ينستيتۋتسيونالدى تۇردە كۇشەيتۋ قاجەتتىگىن, ول ءۇشىن بىرىڭعاي سەنىم تەلەفونىن ۇيىمداستىرىپ, زورلىق-زومبىلىققا جانە قىسىمعا, ياعني بۋللينگكە تاپ بولعاندارعا كومەك كورسەتۋگە ارنالعان باعدارلاما ازىرلەگەن دۇرىس دەگەن باستاما كوتەردى.
ەندى وسى باستامالارعا ايماقتارداعى اكىمدەردىڭ, سالالار بويىنشا مينيسترلىكتەردىڭ جاۋاپكەرشىلىگىن قاتاڭداتۋ كەرەك. ءاربىر لاۋازىمدى تۇلعا وزىنە قاراستى اۋماقتاعى نەمەسە سالاداعى زاڭ بۇزۋشىلىقتارعا, قىلمىستارعا, سىبايلاس جەمقورلىققا قارسى كۇرەستە جاۋاپكەرشىلىگىن تولىق سەزىنسە, ادام قۇقىعىن تاپتايتىن ارەكەتتەرگە جول بەرىلمەس ەدى. بۇعان دەيىن «ورىنباسارى جەمقورلىق جاساسا, باسشى ورنىن بوساتۋى كەرەك» دەپ ايتىلدى. الايدا ول ورىندالىپ جۇرگەن جوق, باسشىلار ورىندارىندا وتىرا بەرەدى. مەن سول تالاپتى كۇشەيتۋ كەرەك دەپ ەسەپتەيمىن. ويتكەنى بۇل ادىلەتتىلىككە تولىق سايكەس كەلەدى.
جولداۋدا پرەزيدەنت زاڭسىز يەمدەنىلگەن اكتيۆتەردى قايتارۋ تۋرالى تاعى دا ايتتى. بۇل باعىتتا قازىر زاڭ قابىلداندى, جۇمىس باستالدى. حالىق ادىلەتتىلىكتى كۇتىپ وتىر. زاڭسىز جەكەمەنشىككە ءوتىپ كەتكەن جانە شەتەلگە شىعارىلعان اكتيۆتەر مەملەكەت مەنشىگىنە قايتارىلىپ, ودان تۇسكەن قارجى ەلدىڭ ءال-اۋقاتىن كوتەرۋگە جۇمسالىپ, مەملەكەت مۇددەسىنە جۇمىس ىستەۋى كەرەك. بۇل – پرەزيدەنتىمىزدىڭ تىكەلەي باقىلاۋىنداعى شارۋا. ەل كۇتكەندەي ناتيجە بولارىنا سەنىممەن قارايمىز.
مارات ءباشىموۆ,
ءماجىلىس دەپۋتاتى
