پرەزيدەنت «ادىلەتتى قازاقستاننىڭ ەكونوميكالىق باعدارى» اتتى جولداۋىندا اۋىلشارۋاشىلىعى سالاسىنداعى تۇيىتكىلدى شارۋالاردىڭ بىرقاتارىنا توقتالدى. سۋ ۇنەمدەۋ بويىنشا بىرنەشە باستاما كوتەرىپ, ەلىمىز ءۇشىن سۋدىڭ تاپشىلىعى قاي كەزدە دە ماڭىزدى ماسەلە ەكەنىن, وڭتايلى شەشۋ جولدارىن ءجىتى قاراستىرۋ قاجەتتىگىن ەسكەرتتى. پرەزيدەنت ايتقانداي, تىرشىلىك ءنارى سۋدىڭ نارقى مۇناي, گاز نەمەسە مەتالدان كەم ەمەس. سوندىقتان سۋ رەسۋرستارى جانە يرريگاتسيا مينيسترلىگىن قۇرۋى ماڭىزدى قادام, وتە ورىندى شەشىم دەر ەدىك. سەبەبى پارلامەنت سەناتىندا اۋىل شارۋاشىلىعىنىڭ اقساپ تۇرعان سالاسى ەشقاشان نازاردان تىس قالعان ەمەس.
سۋ تاپشىلىعى ماسەلەسىن پارلامەنت سەناتىنىڭ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ دەپۋتاتتارى ۇنەمى ايتىپ, كوتەرىپ ءجۇر. وتكەن ەكى شاقىرىلىمدا ۇكىمەتكە دەپۋتاتتىق ساۋال ارقىلى جولداپ, ءوز ۇسىنىستارىن دا جازباشا جولدادى. ەندى ايتىلىپ, جازىلىپ جۇرگەن يرريگاتسيالىق جۇيەلەردى قالپىنا كەلتىرۋ ماسەلەسىنىڭ ءتۇيىنى شەشىلەدى. يرريگاتسيا جۇيەسىنە قاتىستى اتقارىلعان اۋقىمدى جۇمىستار دا جوق ەمەس. الايدا نەگىزسىز قۇرىلعان جوبالاردىڭ شارۋالاردىڭ جۇمىسىنا كەرى اسەر ەتكەنى دە جاسىرىن ەمەس. ەلىمىزدە سۋ تاپشىلىعى ماسەلەسى جىل وتكەن سايىن كۇردەلەنىپ, قۇرعاقشىلىق قىسقان سايىن كۇش الىپ كەلەدى. بۇۇ مالىمەتتەرى بويىنشا 2030 جىلعا قاراي قازاقستان سۋ تاپشىلىعىنا تاپ بولۋى مۇمكىن. ەندى قۇرىلعان جاڭا مينيسترلىك وسى ماسەلە بويىنشا جۇيەلى تۇردە جۇمىس اتقارادى دەپ سەنىم بىلدىرەمىز. ءبىز ءوز تاراپىمىزدان زاڭنامالىق تۇرعىدان قولداۋ كورسەتۋگە دايىنبىز.
جولداۋدا ايتىلعان تاعى ءبىر ماڭىزدى ماسەلە مەملەكەت باسشىسى: «ەگىن شارۋاشىلىعىندا ماڭىزدى رەفورما جاسايتىن كەز كەلدى. ەگىس تۇرلەرىن كوبەيتۋىمىز كەرەك. سونداي-اق كوبىرەك پايدا اكەلەتىن داقىلدار ەككەن ءجون. سۋدى كوپ قاجەت ەتەتىن ەگىس القابىن بىرتىندەپ ازايتىپ, ءبىر عانا داقىل ءتۇرىن ەگۋدى شەكتەۋ قاجەت. ديقانداردى جەرگىلىكتى تۇقىممەن قامتاماسىز ەتۋ ماڭىزدى. سونىمەن قاتار جاڭا سۇرىپتاردى شىعارىپ, ونى ءوسىرۋ ماسەلەسىن شەشكەن ءجون», دەدى. راسىندا دا مول ءونىم الامىز دەسەك, جەردىڭ جاعدايىن جاقسارتۋ كەرەك, تىڭايتىپ, تۇقىمدى جاڭالاپ, وزىق تەحنولوگيانى قولدانۋ قاجەت.
پرەزيدەنت الداعى ءۇش جىلدا اگروونەركاسىپتەگى وڭدەلگەن ءونىم ۇلەسىن 70% جەتكىزۋ كەرەكتىگىن تاپسىردى. مەملەكەت باسشىسىنىڭ كەلتىرگەن دايەگى بويىنشا ەلدەگى اۋىل شارۋاشىلىعى تەحنيكاسىنىڭ 80 پايىزى توزىپ تۇر, جىل سايىن ونىڭ 8-10 پايىزىن جاڭارتىپ وتىرۋ قاجەت ەكەنىن مىندەتتەدى. شارۋالاردىڭ قولىن بايلايتىن ءبىر كەدەرگى وسى تەحنيكانىڭ ەسكىلىگى. توزىعى جەتكەن تەمىر تەز سىنعىش كەلەدى. ديقاندار سىنعان تەحنيكامەن قالاي مول ءونىم ءوسىرىپ جيناي الادى؟
الەۋمەتتىڭ الەۋەتىن ارتتىرۋ دا كۇيىپ تۇرعان ماسەلەنىڭ ءبىرى. جولداۋدا پرەزيدەنت كەلەسى جىلدىڭ 1 قاڭتارىنان باستاپ ەڭ تومەنگى جالاقى مولشەرىن 85 مىڭ تەڭگەگە كوتەرۋدى تاپسىردى. سوڭعى ءۇش جىلدا ەڭ تومەنگى جالاقى مولشەرى ءۇش ەسەگە كوبەيدى. سونىڭ ناتيجەسىندە جولداۋدا ايتىلعانداي, 1 ميلليون 800 مىڭ ادام, ونىڭ ىشىندە 350 مىڭ بيۋدجەت قىزمەتكەرلەرىنىڭ ءال-اۋقاتىن ارتتىرۋعا سەرپىن بەرەدى.
«جول قادىرىن جۇرگەن بىلەر» دەيدى. ينفراقۇرىلىمنىڭ ءيى قانباي, يلەۋى كەمشىن سوعىپ تۇرعان سالاسىنىڭ ءبىرى – كۇرە جولدىڭ كەم-كەتىگى.
«اۆتوكولىك جولدارىنىڭ قۇرىلىسى ماسەلەسى شەشىمىن تابۋعا ءتيىس. قازىر ونىڭ ساپاسى سىن كوتەرمەيدى. ءتيىستى جۇمىستار ۋاقتىلى جانە ساپالى جاسالمايدى. جەمقورلىق بەلەڭ الىپ تۇر, باسەكە دە جوقتىڭ قاسى. مۇنىڭ ءبارى – وسى سالادا ابدەن تامىر جايعان كەمشىلىكتەر. سوندىقتان جىل سوڭىنا دەيىن ناقتى شارالار قابىلداۋ قاجەت. مىندەتىن ادال اتقارماعان بارلىق كومپانيا زاڭ بويىنشا جاۋاپقا تارتىلادى. بۇل ماسەلەگە مەن باسا نازار اۋدارامىن. باقىلاۋدى كۇشەيتىپ, جاڭا نورماتيۆتىك قۇجاتتار قابىلداۋ كەرەك. 2029 جىلعا دەيىن 4 مىڭ شاقىرىمنان استام جولعا كۇردەلى جوندەۋ جۇرگىزۋ قاجەت», دەدى پرەزيدەنت. قاي وبلىسقا بارساڭىز دا شالعايداعى اۋىل, اۋداننىڭ جولىنىڭ بارلىعى تالاپقا ساي دەي المايمىز. سوندىقتان ۇكىمەت مۇشەلەرىنە زور جاۋاپكەرشىلىك جۇكتەلىپ وتىر.
جانبولات جورگەنباەۆ,
پارلامەنت سەناتىنىڭ دەپۋتاتى
