مينيسترلىكتىڭ مالىمەتىنشە, ءبىلىم كۇنى پايدالانۋعا بەرىلگەن 25 مىڭ ورىندىق 13 مەكتەپ ءبىلىم بەرۋ ينفراقۇرىلىمىن قولداۋ قورىنىڭ دەمەۋشىلىگىمەن, ال 30 مىڭ ورىندىق 26 مەكتەپ جەرگىلىكتى بيۋدجەت جانە جەكە ينۆەستيتسيا ەسەبىنەن سالىندى. بۇعان قوسا «جايلى مەكتەپ» ۇلتتىق جوباسى جۇزەگە اسىرىلىپ جاتىر. اتالعان جوبانىڭ اياسىندا 740 مىڭ وقۋشىعا ارنالعان 369 مەكتەپ سالۋ جوسپارلانعان.
– بيىل 130 مىڭنان استام وقۋشى سۋ جاڭا مەكتەپتە وقۋدى باستايدى. اۋىلدىق جەرلەردەگى ءبىلىم دەڭگەيىن دامىتۋعا دا ەرەكشە كوڭىل ءبولىنىپ وتىر. وسى جىلى 1 مىڭ اۋىل مەكتەبى قايتا جاڭعىرتىلىپ, پاندىك كابينەتتەر اشىلادى, كىتاپحانالار مەن اسحانالارى, جيھازدارى جاڭارتىلادى. العاش رەت اۋىل مەكتەپتەرى اراسىندا رەسپۋبليكالىق وليمپيادا ۇيىمداستىرىلادى. مۇنىڭ ءبارى وتاندىق ءبىلىم ساپاسىن ارتتىرۋ ءۇشىن, بالالارعا قاۋىپسىز ءارى قولايلى جاعداي جاساۋ ماقساتىندا قولعا الىندى, – دەدى قوسشى قالاسىنداعى مەكتەپ-گيمنازيانىڭ اشىلۋىنا قاتىسقان وقۋ-اعارتۋ ءمينيسترى عاني بەيسەمباەۆ.
مينيسترلىكتىڭ اقپاراتىنا سۇيەنسەك, ەلىمىزدە جاڭادان سالىنىپ, ءبىلىم مەرەكەسىندە پايدالانۋعا بەرىلگەن 39 مەكتەپكە قوسىمشا تاعى 194 ءبىلىم بەرۋ ۇيىمىندا كۇردەلى جوندەۋ جۇمىسى اياقتالدى. مەملەكەت باسشىسىنىڭ تاپسىرماسى بويىنشا جىل سوڭىنا دەيىن شاعىن قالالاردا, اۋدان ورتالىقتارىندا, اۋىلداردا ورنالاسقان 1 000 مەكتەپ التى باعىت بويىنشا جاڭعىرتۋدان وتەدى. ياعني كۇردەلى جوندەۋ, ءپان كابينەتتەرىن جابدىقتاۋ, مەكتەپ جيھازدارىن, كىتاپحانالاردى, اسحانالاردى جاڭارتۋ, سونداي-اق بالالاردىڭ قاۋىپسىزدىگىن قامتاماسىز ەتۋ جۇمىستارى جۇرگىزىلەدى. 1 000 پاندىك كابينەت اشىلماق, سونىمەن قاتار تاعى 749 پاندىك كابينەت ساتىپ الىنادى.
ايتا كەتەرلىگى, مەملەكەت جىل سايىن مەكتەپتەردىڭ قۇرىلىسى مەن جاڭعىرتۋ جۇمىستارىنا قارجى ءبولىپ كەلەدى. سوڭعى ءۇش جىل ىشىندە 340 مىڭ ورىندىق 626 مەكتەپ پايدالانۋعا بەرىلدى.
