اتالعان ەلدىڭ بوكس فەدەراتسياسىنىڭ اتقارۋشى ديرەكتورى ماركو لاينەنىڭ ايتۋىنشا, فينليانديا جاڭادان قۇرىلعان World Boxing ۇيىمىنا قوسىلادى.
– حالىقارالىق بوكس قاۋىمداستىعى 2019 جىلدان بەرى وليمپيالىق ويىندارعا ىرىكتەۋ ءتۋرنيرىن وتكىزۋ قۇقىعىنان ايىرىلعان. ال بيىلدان باستاپ حالىقارالىق وليمپيالىق كوميتەت IBA-نى مۇلدەم مويىندامايتىنىن مالىمدەدى. وليمپياداعا بوكسشىلاردى ىرىكتەۋمەن ەندى حوك-تىڭ ءوزى اينالىسادى. ال ءبىز وليمپياداعا قاتىسقىمىز كەلەدى. سوندىقتان World Boxing ۇيىمى ارقىلى تورتجىلدىقتىڭ باستى جارىسىنا قاتىسۋدى ماقسات ەتىپ وتىرمىز, – دەدى ول.
بيىل World Boxing ۇيىمى قۇرىلعان. ازىرشە ونى حوك-تىڭ ءوزى مويىنداعان جوق. حوك World Boxing ۇيىمىنا قاتىستى شەشىمدى حالىقارالىق بوكس قاۋىمداستىعىنىڭ ءىسىن تەكسەرگەننەن كەيىن قابىلدايدى.
قازىر جاڭادان قۇرىلعان بوكس ۇيىمىنا اقش, اۋستراليا, انگليا, ۇلىبريتانيا, نيدەرلاند, جاڭا زەلانديا, كانادا, برازيليا, ارگەنتينا, گەرمانيا, گوندۋراس جانە شۆەتسيا ەلدەرىنىڭ بوكس فەدەراتسيالارى مۇشە. ال قازاقستان بوكس فەدەراتسياسى حالىقارالىق بوكس قاۋىمداستىعىنىڭ قۇرامىندا.
