بۇرناعى كۇنى ەلوردالىق كوماندا سىرت الاڭدا UEFA كونفەرەنتسيا ليگاسىنىڭ پلەي-وفف كەزەڭى اياسىندا البانيانىڭ «پارتيزاني» كلۋبىمەن قارىمتا ويىن وتكىزدى. العاشقى مينۋتتان البانيالىق فۋتبولشىلار شابۋىلداۋمەن بولدى. وعان سەبەپ تە جوق ەمەس ەدى. ويتكەنى البانيالىق كوماندا ءبىر اپتا بۇرىن العاشقى كەزدەسۋدە «استانادان» 0:1 ەسەبىمەن جەڭىلگەن ەدى. ناتيجەسىندە, «ەلباساني» ستاديونىنا جينالعان 6 مىڭ جانكۇيەردىڭ الدىندا الاڭ قوجايىندارى 25-مينۋتتا ەسەپ اشتى. بۇرىشتامادان اۋەلەتە بەرىلگەن دوپتى باسپەن قاقپاعا ەنگىزگەن – اركانج بينتسۋكا.
بىراق «استانا» ويىنشىلارى ءبىر اپتا بۇرىنعى العاشقى كەزدەسۋدە وتە بەلسەندى ويناپ, قارىمتا كەزدەسۋدە بارىن سالاتىنىنا ءوزىمىز دە كۋا بولعان ەدىك. جانكۇيەرلەر كۇتكەندەي, گريگوري بابايان شاكىرتتەرى سىرت الاڭدا بارىن سالدى. اسىرەسە ەكىنشى كەزەڭدە. تۇرىك تورەشىسى ابدۋلقادىر بىتىگەننىڭ ىسقىرىعى ەستىلە سالا ەلوردالىق كوماندا ويىندى بەلسەندى باستادى. وسىنداي بەلسەندىلىك 46-مينۋتتا مارين توماسوۆ تارازى باسىن تەڭەستىرۋگە مۇمكىندىك تۋعىزدى. ەسەپ – 1:1. قالعان ۋاقىتتا قوس كوماندا قانشا مارتە شابۋىلداعانىمەن, ەسەپ وزگەرىسسىز قالدى.
ەكى ويىننىڭ ناتيجەسىمەن «استانا» كونفەرەنتسيا ليگاسى توپتىق ساتىسىنا جولداما الدى.
– «استانا» ءتورت جىلدان كەيىن ەۋروكۋبوكتىڭ توپتىق كەزەڭىنە ورالدى. ەندى قازاقستاندىق جانكۇيەرلەر ەلوردالىق كلۋبتىڭ ويىنشىلارى مەن جاتتىقتىرۋشىلار شتابىمەن ماقتانا الادى. فۋتبولشىلار ءوز ناتيجەلەرىمەن كونفەرەنتسيا ليگاسىنىڭ توپتىق كەزەڭىندە ويناۋعا لايىقتى ەكەندىگىن دالەلدەدى. كوماندانىڭ باس باپكەرى گريگوري باباياندى قۇتتىقتايمىن, ول قازاقستاندىق كلۋبتى ەۋروكۋبوك توبىنا شىعارىپ قانا قويماي, ءوز ناتيجەسىن قايتالاي الاتىن جالعىز وتاندىق مامان. بۇل ناتيجە قازاقستاندىق فۋتبولعا ودان ءارى سەرپىن بەرەتىنىنە سەنىمدىمىن, – دەدى «استانا» فۋتبول كلۋبى باس ديرەكتورىنىڭ كەڭەسشىسى سايان حاميتجانوۆ.
سوڭعى رەت «استانا» 2019 جىلى ەۋروپا ليگاسى توپتىق كەزەڭىندە «مانچەستەر يۋنايتەدپەن» كەزدەسىپ, 2:1 ەسەبىمەن جەڭىسكە جەتكەن ەدى.
ءبىر قىزىعى, «استانا» چەمپيوندار ليگاسى, ەۋروپا ليگاسى جانە كونفەرەنتسيا ليگاسىنىڭ توپتىق كەزەڭىنە جولداما العان تۇڭعىش وتاندىق كوماندا بولىپ وتىر.
اتالعان كۇنى, وكىنىشكە قاراي, قوستانايلىق «توبىل» كونفەرەنتسيا ليگاسى پلەي-وفف ساتىسىندا جارىس جولىن اياقتادى. چەحيانىڭ «ۆيكتوريا پلزەن» كومانداسىنا قارسى ويناعان قوستانايلىقتار سىرت الاڭدا 0:3 ەسەبىمەن جەڭىلىس تاپتى. ءبىر اپتا بۇرىن ەلىمىزدە «توبىل» 1:2 ەسەبىمەن ەسە جىبەرگەن بولاتىن. ايتا كەتسەك, قازاقستاندىق «ورداباسى» جانە «اقتوبە» كونفەرەنتسيا ليگاسى ءۇشىنشى ىرىكتەۋ ساتىسىندا جارىس جولىنان شىعىپ قالعان ەدى.
كەشە كەشكىسىن UEFA كونفەرەنتسيا ليگاسى توپتىق ساتىسىنىڭ جەرەبەسى فرانتسيانىڭ موناكو قالاسىندا ءوتتى.
ناتيجەسىندە, س توبىنا تۇسكەن «استانا» حورۆاتيالىق «دينامو» زاگرەبپەن, چەحيالىق «ۆيكتوريا پلزەنمەن» جانە كوسوۆالىق «بالكانيمەن» جاسىل الاڭدا كەزدەسەدى.
