فوتو: Akorda.kz
«بيىلعى جولداۋدىڭ ءمانى مەن مازمۇنى پرەزيدەنت رەفورمالارىنىڭ لوگيكاسىنا تولىقتاي سايكەس كەلەدى. قاسىم-جومارت توقاەۆ ەكونوميكا, ساياسات جانە يدەولوگيا سالالارىن ءبىر-بىرىنەن بولمەي رەفورمالاۋعا نەگىزدەلگەن ستراتەگيالىق باعىتتى جۇيەلى تۇردە ىسكە اسىرىپ كەلەدى», دەپ جازدى ەرلان قارين ءوزىنىڭ Telegram ارناسىندا.
ونىڭ ايتۋىنشا, پرەزيدەنت ورتاعا سالعان باستامالار اتقارۋشى بيلىك جۇيەسىنە ەلەۋلى ءارى ءماندى وزگەرىس ەنگىزۋگە مۇمكىندىك بەرەدى.
«جولداۋدا قازاقستان ەكونوميكاسىن دامىتۋدىڭ الداعى ستراتەگياسى بەلگىلەندى. بۇدان بولەك پرەزيدەنت باستامالارى ەكونوميكانىڭ بىرقاتار سالاسىنىڭ جاڭا ەرەجەلەرىن ۇسىنىپ وتىر. سونىڭ ارقاسىندا اتقارۋشى بيلىك جۇيەسى, ورتالىق پەن وڭىرلەر اراسىنداعى قارىم-قاتىناس وزگەرەدى, سالىقتىق ىنتالاندىرۋدىڭ, نورماتيۆتىك-قۇقىقتىق رەتتەۋدىڭ, ينۆەستورلارمەن ءوزارا ءىس-قيمىلدىڭ جاڭا شارالارى ەنەدى. جاڭا جولداۋ ەكونوميكالىق ماسەلەلەردى شەشۋگە باعىتتالسا دا, وندا الەۋمەتتىك سيپاتتاعى ماڭىزدى باستامالار بار. اتاپ ايتقاندا, جالاقىنى كوتەرۋ, جۇمىسپەن قامتۋ, بالالار قاۋىپسىزدىگى, ءبىلىم الۋداعى تەڭدىك جانە ت.ب», دەپ جازدى مەملەكەتتىك كەڭەسشى.
ەرلان قارين اتاپ وتكەندەي, مەملەكەت باسشىسىنىڭ قوعامدا قىزۋ تالقىلانىپ جاتقان اەس سالۋعا قاتىستى ماسەلەنى رەسپۋبليكالىق رەفەرەندۋمعا شىعارۋ تۋرالى ۇسىنىسىنا ەرەكشە نازار اۋدارۋ قاجەت. سەبەبى بۇل پرەزيدەنتتىڭ «حالىق ۇنىنە قۇلاق اساتىن مەملەكەت» جانە «ادىلەتتى قازاقستان» پرينتسيپتەرىن بەرىك ۇستانىپ وتىرعانىن كورسەتەدى.
«جالپى, بۇگىنگى جولداۋدا كوپتەگەن باعىتتاردى قامتيتىن جانە الەۋمەتتىك-ەكونوميكالىق رەفورمالاردىڭ بىرىڭعاي جۇيەسىن قۇرايتىن جۇزدەن استام ءتۇرلى يدەيالار مەن ۇسىنىستار ايتىلدى», دەپ ويىن قورىتىندىلادى ەرلان قارين.
