ۇكىلەگەن ءۇمىتتىڭ ۇدەسىنەن شىعىپ, قازاقستان قۇراماسىنىڭ جارتىلاي قورعاۋشىسى باقتيار تۇركيانىڭ «بەشيكتاش» كومانداسى ساپىنداعى العاشقى ويىنىندا ءبىرىنشى گولىن سالدى. بۇل ءارى جەڭىس گولى بولعاندىقتان, باقتيەردىڭ دەبيۋتىن جارقىراتا ءتۇستى.
وسىناۋ تاريحي ساتكە تۇركيالىق كلۋبتىڭ كونفەرەنتسيا ليگاسىنىڭ پلەي-وفف ساتىسىندا ۋكراينانىڭ «دينامو كيەۆ» كومانداسىنا قارسى ويىنىندا كۋا بولدىق. قازاق حالقى ءدال وسى ماتچتان جاقىندا عانا «بەشيكتاش» كلۋبىنا اۋىسقان باقتيار ءزاينۋتدينوۆتىڭ دەبيۋتىن اسىعا كۇتتى. ويىنعا ەكىنشى تايمدا قوسىلعان وتانداسىمىز وزىنە ارتىلعان سەنىمدى تولىقتاي اقتادى. تارازى باسى تەڭەسىپ, قاي جاعىنا اۋارى بەلگىسىز تەڭسەلىپ تۇرعان شاقتا ءزاينۋتدينوۆتىڭ ويىن سوڭىنا تامان سوققان گولىنىڭ سالماعى باسىپ كەتتى. ماتچتىڭ 94-مينۋتىندا باقتيار كوماندالاسى ميلوت راشيتسانىڭ الدىنا قولمەن قويعانداي ادەمى پاس شىعارعان, بىراق ول دوپتى ىرقىنا كوندىرەم دەگەنشە قورعاۋشى الدىن جاۋىپ ۇلگەردى. وسى ساتتە راشيتسا ايىپ الاڭىنا ەنىپ ۇلگەرگەن باقتيارعا پاس بەردى. ال باقتيار دوپتى بىردەن قاقپاعا باعىتتاپ, جەڭىس گولىن جارق ەتكىزدى. وسىلايشا, جارقىن دەبيۋتىمەن قازاق جۇرتىن عانا ەمەس, تۇرىك باۋىرلارىمىزدى دا قۋانىشقا بولەدى.
ەسكە سالا كەتسەك, باقتيار زاينۋتدينوۆ وتكەن اپتادا عانا ماسكەۋلىك تسسكا كلۋبىنان ىستانبۇلدىق «بەشيكتاش» كلۋبىنا اۋىستى. ترانسفەر قۇنى 4,5 ملن ەۋرونى قۇرادى. ال وتانداسىمىزبەن كەلىسىمشارت 4 جىلعا جاسالدى جانە ونىڭ ماۋسىمدىق جالاقىسى 1,2 ملن ەۋرو بولماق.
تاراز فۋتبول مەكتەبىنىڭ تۇلەگى باقتياردىڭ بۇدان بىلاي ەۋروپاداعى ۇزدىك ليگالاردىڭ بىرىندە دوپ تەبەتىنى ءبارىمىزدىڭ كوڭىلىمىزدى ءبىر كوتەرىپ قويدى. ويتكەنى قازاق جاستارىنىڭ ەڭ ۇزدىك كلۋبتاردا ويناعانىن وتانداستارىمىز كوپتەن بەرى ارمانداپ كەلەدى. سوندىقتان باقتياردىڭ دا, باسقا دا ۇلتتىق قۇراما ويىنشىلارىنىڭ دا بولاشاعىنان كۇتەرىمىز كوپ!
