كوپ ۇزاماي «روساۆياتسيا» بۇل اقپاراتتى راستادى. بيزنەس-دجەت جولاۋشىلارىنىڭ قاتارىندا ەۆگەني پريگوجين ەسىمدى ازامات بولعان كورىنەدى. سونىمەن قاتار قازا تاپقاندار قاتارىندا دميتري ۋتكين ەسىمدى جولاۋشى دا بار ەكەن. بۇقارالىق اقپارات قۇرالدارىنىڭ جازۋىنشا, ول – «ۆاگنەر» كومانديرى. ءالى كۇنگە دەيىن ە.پريگوجيننىڭ ءولىمى رەسمي راستالعان جوق. دەگەنمەن رەسەي پرەزيدەنتى ۆلاديمير پۋتين اپاتتان قازا تاپقانداردىڭ تۋىستارى مەن جاقىندارىنا كوڭىل ايتىپ ۇلگەردى. «العاشقى دەرەكتەر ۇشاقتا «ۆاگنەر» كومپانياسىنىڭ قىزمەتكەرلەرى بولعانىن كورسەتەدى», دەدى كرەمل باسشىسى.
اپاتقا ۇشىراعان «Embraer Legacy 600» ۇشاعى, شىن مانىندە, ە.پريگوجينگە تيەسىلى. ترانسپوندەر سيگنالدارى ارقىلى تەمىرقاناتتى كولىكتەردىڭ ۇشۋىن باقىلايتىن «Flightradar24» قىزمەتى RA-02795 تىركەۋ ءنومىرى بار «Embraer Legacy 600» رەيسىن بولعانىن راستايدى. ول ماسكەۋ ۋاقىتىمەن 17.59-دان 18.11-گە دەيىن ۇشقان. دەرەكتەرگە سۇيەنسەك, ۇشاق ترانسپوندەردى اۋەدە قوسقان. سول كەزدە اۋە كەمەسى ماسكەۋ تۇبىندەگى زەلەنوگراد قالاسىنىڭ ماڭىندا 3,7 شاقىرىم بيىكتىكتە, ساعاتىنا 585 شاقىرىم جىلدامدىقپەن بيىكتىككە كوتەرىلىپ بارا جاتقان. ال شەرنەۆو اۋىلىنىڭ ماڭىندا ترانسپوندەر سيگنال بەرۋدى توقتاتقان كورىنەدى. ۇشاق كۋجەنكينو اۋىلى ماڭىندا قۇلاعان. ەكى ەلدى مەكەننىڭ اراسى جارتى كيلومەترگە جۋىق.
ازىرگە اپاتقا نە سەبەپ بولعانى ناقتى ايتىلعان جوق. بىراق بۇقارالىق اقپارات قۇرالدارى بىرقاتار تەوريا جاساپ ۇلگەردى. سونىڭ ىشىندەگى ەڭ تانىمالى – اۋە كەمەسىنىڭ بورتىندا بومبا قويىلۋى مۇمكىن نە ونى اۋە قورعانىس قۇرالدارى اتىپ قۇلاتۋى ىقتيمال. اپاتتان كەيىن كەشكە ربك اگەنتتىگى قۇقىق قورعاۋ ورگاندارىنداعى دەرەككوزگە سىلتەمە جاساپ, تەرگەۋشىلەر ۇشقىش قاتەسى, تەحنيكالىق اقاۋ جانە سىرتقى ىقپال سەكىلدى نۇسقالاردى قاراستىرىپ جاتقانىن حابارلادى.
ادەتتە, ءار اۆياتسيالىق وقيعادان كەيىن تەرگەۋشىلەر بىرنەشە نۇسقانى تەكسەرەدى. بۇل – ستاندارتتى ءۇردىس. نەگىزىنەن اۋە كەمەسى ەكيپاجدىڭ نەمەسە تەحنيكالىق پەرسونالدىڭ قاتەلىگىنەن, جابدىقتىڭ دۇرىس جۇمىس ىستەمەۋىنەن, سىرتقى سەبەپتەن اپاتقا ۇشىرايدى.
الەۋمەتتىك جەلىلەردە تاراعان ۆيدەولارعا سۇيەنسەك, ۇشاق قۇلاپ بارا جاتقاندا ودان ءتۇتىن شىعىپ جاتقانى كورىنەدى. وعان قوسا, تەمىر قۇستىڭ قالدىعى بىرنەشە شاقىرىمعا شاشىلعان. مۇنىڭ ءبارى ءتۇرلى قاستاندىق جاسالدى دەۋشىلەردىڭ كۇدىگىن قالىڭداتا ءتۇستى. دەگەنمەن تەرگەۋ امالدارى اياقتالمايىنشا ناقتى كەسىپ-ءپىشىپ ايتۋ قيىن.
كەڭ تاراعان نۇسقانىڭ, اسىرەسە «ۆاگنەر» كومپانياسىنا تيەسىلى تەلەگرام كانالدار ءجيى كەلتىرەتىن سەبەپتىڭ ءبىرى – ۇشاق بورتىنداعى جارىلىس. بۇعان دالەل رەتىندە ولار اۋە كەمەسىنىڭ اسپاندا قۇلاپ كەلە جاتقاندا-اق بىرنەشە بولىككە بولىنگەنىن العا تارتادى. «بازا» ارناسى دەرەككوزدەرگە سىلتەمە جاساي وتىرىپ, بومبا ۇشاقتىڭ اجەتحاناسىنا قويىلۋى مۇمكىن دەپ حابارلادى.
«Financial Times» گازەتىنىڭ حابارلاۋىنشا, ۇشاقتى اۋە قورعانىس قۇرالدارى اتىپ تۇسىرگەن. بىراق جاسىرىن دەرەككوزگە سۇيەنگەنىمەن, باسىلىم بۇعان ناقتى دالەل كەلتىرمەيدى. سونداي-اق وسىنداي پىكىردى ۇستاناتىن «ۆاگنەر» كومپانياسىنا جاقىن تەلەگرام كانالدار بار. بۇل نۇسقا دا نەگىزسىز ەمەس. بىرىنشىدەن, اۋە كەمەسى قۇلاپ كەلە جاتقان ۆيدەودا ۇشاقتىڭ ماڭىنان سوزىلا جالعاسقان اق ءتۇتىن بايقالادى. بۇل – راكەتادان قالعان بولۋى ىقتيمال.
ەكىنشىدەن, كۋاگەرلەر كەمىندە ەكى جارىلىستى ەستىگەنىن ايتادى. وعان قوسا, فوتولاردا قۇلاعان ۇشاقتىڭ فيۋزەلياجىنان بىرنەشە كىشىگىرىم تەسىكتەر كورىنەدى. ياعني راكەتا تيگەن دەگەن پىكىرگە سەنەتىندەر مۇنى دا العا تارتادى. بىراق بۇل نۇسقانىڭ دا كەمشىلىگى جەتەرلىك. «Embraer Legacy 600» راداردان وشكەن كەزدە شامامەن 8,5 شاقىرىم بيىكتە ۇشىپ بارا جاتقان. ونى اتىپ قۇلاتۋ ءۇشىن وتە قۋاتتى اۋە قورعانىس كەشەنى كەرەك. قاراپايىم زەنيتتىك قۇرىلعىمەن مۇنداي قاشىقتاعى ۇشاقتى اتىپ قۇلاتۋ قيىن. ال «بۋك» سەكىلدى كەشەندەردىڭ راكەتاسى وتە ۇلكەن. الدا-جالدا اۋە كەمەسىن «بۋكپەن» اتىپ قۇلاتسا, وندا فيۋزەلياجدا ۇلكەن تەسىكتەر قالۋعا ءتيىس.
بۇدان بولەك, بىرنەشە نۇسقا دا بۇقارالىق اقپارات قۇرالدارى بەتىندە تالقىلاندى. ولاردىڭ قاتارىندا ۇشاقتاعى تەحنيكالىق اقاۋ, پيلوتتىڭ قاتەلىگى, تابيعي اپات سەكىلدى سەبەپتەر بار. الايدا «Embraer» كومپانياسى وتە بەدەلدى, ال قۇلاعان «Legacy 600» بيزنەس-دجەتى وتە قاۋىپسىز تەمىر قۇستىڭ قاتارىندا. بۇعان دەيىن وسى ساناتتاعى اۋە كەمەسى ءبىر-اق مارتە اپاتقا ۇشىراعان. ونىڭ وزىندە, پيلوتتىڭ قاتەلىگىنەن ەكىنشى ۇشاقپەن سوعىسقان.
اپاتتان كەيىن الەمدىك مەديا رەسۋرستار جاڭالىقتى جارىسا جازدى. اسىرەسە كوپشىلىگى وسىدان ەكى اي بۇرىنعى قارۋلى كوتەرىلىستى مىسالعا كەلتىرەدى. ماسەلەن, «Daily Star» تابلويدى «پريگوجيننىڭ ءولىمى ەشكىمدى تاڭعالدىرمايدى» دەپ جازدى. «Daily Express» باسىلىمى «تاڭعالارلىعى جوق. سودىرلاردىڭ باسشىسى جانە ءپۋتيننىڭ قارسىلاسى ۇشاق اپاتىنان قازا تاپتى» دەپ حابارلادى. ال «Daily Mirror» وقيعانى ء«پۋتيننىڭ كەك الۋى» دەپ سيپاتتادى. ءدال وسىنداي تاقىرىپپەن «The Sun» گازەتى دە ماقالا جاريالادى.
ەستەرىڭىزدە بولسا, وسىدان ەكى اي بۇرىن «ۆاگنەر» توبىنىڭ جەتەكشىسى ەۆگەني پريگوجين كوتەرىلىس ۇيىمداستىرىپ, روستوۆ قالاسىنىڭ اكىمشىلىك عيماراتتارىن باسىپ الىپ, ماسكەۋگە بەتتەگەن. ەل استاناسىنا جۇزدەگەن شاقىرىم قالعاندا اۋىر تەحنيكالاردان قۇرالعان كولوننا توقتاپ, كرەمل باسشىسى ۆ.پۋتينمەن كەلىسسوز جۇرگىزدى. ناتيجەسىندە, ە.پريگوجين رايىنان قايتىپ, بەلارۋسكە كەتتى.
