شىنى كەرەك, العاشىندا «ونسىز دا تۇرىك جەرىندە جۇرگەنىمىزدى بىلەمىز عوي, تۋلارىن نەگە سونشا كوپ ىلە بەرگەن؟» دەگەن وي دا بولدى. بۇل ءبىر جاعىنان سىرتتان اعىلعان تۋريستەرگە «مەملەكەتتىك ناقىشتاعى ەسكەرتۋلەرى مە ەكەن؟» دەگەن ەكىۇداي سۇراق تا تۋىندادى. بىراق ۋاقىت وتە كەلە جەرگىلىكتى حالىقتىڭ ۇلتتىق تۋعا دەگەن قۇرمەتىن ناقتى سەزىنە الدىق.
قىزىل ءتۇستى «بابامنىڭ قانى», جۇلدىزدى «حالقىمنىڭ جانى» دەپ بىلەتىن تۇرىك حالقى تۋىن بەلدەن تومەن تۇسىرگەن ەمەس. وعان ءوزىمىز دە كۋا بولدىق. كيىمدەرىنىڭ جۇرەك تۇسى مەن ارقالارىنا, باس كيىمدەرىندە بەينەلەنگەن تۋدىڭ تابانعا تاپتالىپ جاتقانىن كورە المايسىڭ. سەبەبى تۇرىكتەر دە قازاقتار سەكىلدى تۋدىڭ قادىر-قاسيەتىن بىلەتىن ەلدىڭ ۇرپاعى. بىزدەر كوك تۋدا عاسىرلار بويى ارمانداعان تاۋەلسىزدىگىمىزدىڭ تاعدىرى مەن ۇلتتىق قۇندىلىعىمىز بايلانعانىن بىلەمىز. ال تۇرىكتەر ءوز تۋلارىندا اتاتۇرىكتىڭ اماناتى مەن تونىكوكتىڭ وسيەتى بار دەپ قادىر تۇتادى. سول سەبەپتى دە بولار تۇركيانىڭ قاي اۋىلى مەن اۋدانىنا, قالاسى مەن ورتالىق الاڭىنا بارساڭىز, الدىڭىزدان ەڭ الدىمەن الىپ ۇلتتىق تۋ قارسى الادى.
بيىل 6 اقپاندا بولعان جەر سىلكىنىسى كەزىندە تۇركيا ەلى 50 مىڭنان استام ازاماتىنان ايىرىلدى. سول كەزدە بۇكىل تۇرىك جۇرتى قارا جامىلىپ, جەتى كۇن بويى تۋلارى تومەندەتىلدى. قارالى اپتادا ەل باسىنا تۇسكەن قاسىرەتتى تىك تۇرىپ باسىنان وتكەرگەن رۋحى مىقتى ەل «تۇركيا عانا ەمەس, بۇكىل الەم جىلاپ تۇر» دەپ جاريالادى. مۇنىڭ سەبەبى دە تۇسىنىكتى. ويتكەنى تۇرىكتەر ءۇشىن تۋدىڭ قۇلاعانى – مەملەكەتتىڭ كۇيرەۋىمەن بىردەي. تۇپتەپ كەلگەندە, كەز كەلگەن ەل ءۇشىن تۋدىڭ جىعىلعانى – جاقسىلىقتىڭ نىشانى ەمەس.
ەستەرىڭىزدە بولسا, وسىدان توعىز جىل بۇرىن باۋىرلاس ەلدە پرەزيدەنت سايلاۋى ءوتتى. تۇركيا تاريحىندا العاش رەت توتە داۋىس بەرۋ جولىمەن ۇيىمداستىرىلعان ساياسي دودادا ەلدىڭ سول كەزدەگى ۇكىمەت باسشىسى, «ادىلەت جانە دامۋ» پارتياسىنىڭ جەتەكشىسى رەجەپ تايپ ەردوعان جەڭىسكە جەتتى. ساياسي ناۋقان كەزىندە پارتيانىڭ «ۇلت بىرلىگى», ياعني «يىلمەيتىن ۇلت» اتتى سايلاۋالدى بەينەبايانى جارىققا شىقتى. بەينەبايانداعى كادر سىرتىنداعى داۋىس – ەلدىڭ قازىرگى پرەزيدەنتىنىڭ داۋسى, مەملەكەت باسشىسى ءوز ەلىنىڭ ءانۇرانىنىڭ ءماتىنىن وقىپ شىققان. بار-جوعى 3 مينۋتتىق ۇگىت-ناسيحات ۆيدەوسىنىڭ ايتار ويى مەن يدەياسى ءبىر فيلمگە ارقاۋ بولا الادى. بەينەباياندا ءبىر كۇشتەردىڭ تۇركيا تۋىن قۇلاتپاق بولعان قارا نيەتى, تومەنگە قۇلديلاعان الىپ تۋدىڭ كولەڭكەسىن كورگەن قارا حالىقتىڭ اۋىزبىرشىلىگى بەينەلەنگەن. قاراپايىم حالىقتىڭ – ەڭبەك ادامدارى مەن جاستاردىڭ, اۋىل تۇرعىندارى مەن ەڭبەكتەگەن بالادان, ەڭكەيگەن كارىگە دەيىنگى ازاماتتىڭ ءوز قولدارىمەن تۇرعىزعان ء«تىرى ساتىسى» تۋدى قۇلاتپايدى. ياعني تۋ تۇبىندە جينالىپ, تۋ استىندا جان بەرەتىنىن تۇسىندىرەدى.
توعىز جىلدا روليكتى 40 ميلليوننان استام ادام كورگەن, ال پارتيانىڭ Facebook الەۋمەتتىك جەلىسىندەگى جاريالانىمىنا 10 مىڭنان استام پىكىر جازىلعان. جەلىدەگى جۇرت روليكتى «مىقتى كادر» دەپ جوعارى باعالاسا, ءبىرى «تۇرىكتەردىڭ وسىنداي تاتۋلىعى تۇرعاندا بۇل جۇرتتى ەشكىم جەر بەتىنەن جويا المايدى» دەگەن ويىن بىلدىرگەن. وسى ەلدىڭ ءبىر ازاماتى «تۋىمىزدىڭ قانشالىقتى قاسيەتتى ەكەنىن سەزىندىم» دەپ اعىنان جارىلسا, تاعى ءبىرى «مەنىڭ وتانىمنىڭ تۋىن تۇسىرگىسى كەلگەندەر قارعىسقا ۇشىراۋى كەرەك. ۇلتىمىز بارىنە مويىنۇسىنادى, بىراق تۋىمىزدى قۇلاتقانداردى ەشقاشان كەشىرمەيدى» دەگەن پىكىرىن قالدىرعان ەكەن.
تۇرىكتىڭ تۋىن نەگە سونشا تاپتىشتەپ دارىپتەپ وتىر دەۋىڭىز مۇمكىن... راس, حالقىمىز دا تۋىمىزدى – تاۋەلسىزدىگىمىزدىڭ تىرەگى دەپ بىلەدى, الەمدەگى ەڭ ادەمى تۋلاردىڭ ءبىرى دەپ قادىر تۇتادى. «تۋ استىندا تۋلاپ ولگەن» (نەسىپبەك ايت ۇلى) قازىمبەتتەي ەر بابالارىمىز بار. تۋى جوق, تۇعىرى جوق ەلدەردى دە كورىپ ءجۇرمىز. بىراق كوك بايراعىمىزدى باۋىرلاس ەلدىڭ جۇرتىنداي ۇلتتىق رۋح, ۇلتتىق سانا دەڭگەيىندە جارنامالاي الىپ ءجۇرمىز بە؟ وسى سۇراققا جاۋاپ ىزدەگەندە ءسال توسىلىپ قالدىم...
