قازىر قازالى اۋدانىندا 23 907 جاس بار ەكەن. وسىلاردىڭ 95,5 پايىزى اۋىلدا تۇرادى. جىل باسىنان بەرى اۋدانداعى «جاستار رەسۋرستىق ورتالىعى» كمم قاتارلاستارىنىڭ قاتىسۋىمەن 180-نەن استام ءىس-شارا وتكىزىپتى. ورتالىق باستاماسىمەن ۇيىمداستىرىلعان «جاڭا ءداۋىر – جاڭا قازاقستان» فەستيۆالى ناتيجەسىندە عىلىمي جوبالار باعىتى بويىنشا ۇزدىك دەپ تانىلعاندارعا قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ وقۋ گرانتى جانە 50, 25 پايىز جەڭىلدىكپەن وقيتىن سەرتيفيكاتتار تابىستالعان. باسقا باعىتتار بويىنشا ۇزدىكتەرگە قارجىلاي دا سىياقى بەرىلگەن. جاستاردىڭ ءۇمىتىن وياتقان بۇل ءىس-شارا الداعى ۋاقىتتا دا جالعاسىن تابادى.
ەرىكتىلەر ۇيىمداستىراتىن «جاستار كەرۋەنى» اتتى جاستار جوباسى بيىل جاڭا فورماتتا ءوتتى. سالت-ءداستۇر ساباقتارىنان باستاپ, تاريحي ورىنداردى ارالاۋ, سپورتتىق ءىس-شارالار, جاس وتباسىلار, اكەلەر, انالار سايىستارىنا جالعاسقان جوبا اياسىندا گالا-كونتسەرت قويىلادى. جوبا كەزىندە اۋدانداعى ءتيىستى بولىمدەر ماماندارى مەملەكەتتىك باعدارلامالار بويىنشا كەڭەس بەرەدى. وتباسى قۇندىلىعىن ارتتىرىپ, بالا تاربيەسى مەن جاس جۇپتاردىڭ شاڭىراعىن بەكەم قىلۋدى كوزدەگەن «ماحاببات مارافونى» جۇپتىق جۇگىرۋ سايىسى دا وسى رەسۋرستىق ورتالىقتىڭ يگى باستاماسى. حالىقارالىق وتباسى كۇنىنە وراي وتكىزىلگەن سايىسقا قازالى قالاسى جانە اۋدانعا قاراستى اۋىلدىق وكرۋگتەردەن 50-گە جۋىق وتباسى قاتىسىپ, باقتارىن سىنادى.
ورتالىق باستاماسىمەن «جاستار جارمەڭكەسى» ۇيىمداستىرىلىپ, العاشقى جۇمىس ورنى بويىنشا – 7, جاستار پراكتيكاسى ارقىلى – 17, قوعامدىق نەگىزدە 8 جاس جۇمىسپەن قامتىلدى.
ء«بىز باستاعان تاعى ءبىر جوبا – «شەت ەلدەردەگى Qazalylyqtar». وسى اۋداندا تۋىپ-ءوسىپ, ءبىلىم الىپ, قازىرگى كۇنى الەمنىڭ الدىڭعى قاتارلى مەملەكەتتەرىندە وقىپ نەمەسە جۇمىس ىستەپ جۇرگەن جاستارمەن مەكتەپتەردە ونلاين, وفلاين فورماتتا كەزدەسۋلەر وتكىزىلدى. «مىڭ رەت ەستىگەننەن, ءبىر رەت كورگەننىڭ ارتىق ەكەنىن» ءبارىمىز بىلەمىز. شەتەلدە العان بىلىمدەرىن ەل بولاشاعى ءۇشىن جۇمسايتىن جاستارمەن جۇزدەسۋ تالايلاردىڭ ارمانىن ۇشتاعانى انىق», دەيدى اۋداندىق «جاستار رەسۋرستىق ورتالىعى» كمم ديرەكتورى نۇربەك اقپانبەتوۆ.
بارلىق اۋداندا بار وسىنداي ورتالىقتاردىڭ اراسىندا سىرداريالىقتاردىڭ دا تاجىريبەسى ەرەكشە. سىرداريا اۋداندىق جاستار رەسۋرستىق ورتالىعىنىڭ شىركەيلى, ايدارلى, ا.توقماعانبەتوۆ, امانگەلدى, بەسارىق, جەتىكول اۋىلدىق وكرۋگتەرىنەن جاستار بريگادالارى قايتا قۇرىلىپ, ولاردىڭ قاتارىنا جۇمىسسىز, Nەەت ساناتىنداعى جانە پروباتسيا ەسەبىندە تۇراتىندار قوسىلدى. بيىلعى ەگىن ناۋقانىندا وسى بريگادالارداعى 200-گە تارتا جاس ەڭبەك ەتەدى. ورتالىق ىقپالىمەن امانگەلدى, ا.توقماعانبەتوۆ اۋىلدىق وكرۋگتەرى جاستارى جاڭاقورعان اۋدانىنداعى جايىلما اۋىلدىق وكرۋگىنە تاجىريبە الماسۋعا جىبەرىلدى. بۇرىن قولى بوس جاستار بيىل 60 گەكتار اۋماققا باقشا, كارتوپ ەگىپ جاتىر.
«بۇل تاجىريبەنى قولعا العانداعى باستى كوزدەگەنىمىز – اۋدان جاستارى اراسىنداعى جۇمىسسىزدىق دەڭگەيىن تومەندەتۋ, – دەيدى اۋداندىق جاستار رەسۋرستىق ورتالىعىنىڭ باسشىسى نۇرمان ابدراسيلوۆ. – ءبىز قاتارلاستارىمىزدىڭ ەڭبەك ەتىپ, تابىس تاپقانىن قالايمىز. وسىنداي نيەتپەن قۇرىلعان «شىركەيلى» جاستار بريگاداسىنداعى 30 جاس قازىر قۇرىلىس ماتەريالدارىن شىعارىپ جاتىر. وزگە بريگاداداعىلار اۋداندىق, وبلىستىق كورمەلەرگە, جارمەڭكەلەرگە ءوز ونىمدەرىن اپارىپ, ساتۋدى جوسپارلاپ وتىر. بىلتىرعى قورىتىندى فورۋمدا «ايدارلى» جاستار بريگاداسىنىڭ بريگاديرى زەينوللا ءجۇسىپوۆ اۋدان اكىمىنىڭ ارنايى جۇلدەسىنە يە بولىپ, 100 مىڭ تەڭگە سىياقى يەلەندى. مەملەكەت باسشىسى «ەڭبەكقور ادام, كاسىبي مامان ەڭ سىيلى ادام بولۋعا ءتيىس» دەدى. ەڭبەك ەتەتىن جاستاردى كوتەرمەلەۋ بيىل دا جوسپارلانىپ وتىر. لايىقتى جۇمىس ىستەگەن جاستار جىل سوڭىندا ارنايى سىيلىقتارعا يە بولادى.
قازىر اۋدان جاستارىندا بوس ۋاقىت جوق. ءتۇرلى باعىتتاعى جىلجىمالى جارمەڭكەلەر اياسىندا ولارعا ءىس باستاۋعا قاجەتتى كەڭەس بەرىلىپ, بوس جۇمىس ورىندارى ۇسىنىلادى. اۋداندىق جاستار رەسۋرستىق ورتالىعىنىڭ ۇيىمداستىرۋىمەن اۋدان جاستارىنا سالاماتتى ءومىر سالتىن ناسيحاتتاپ, سپورتپەن جۇيەلى تۇردە اينالىسۋعا شاقىراتىن «جەڭىمپاز بول!» دەنساۋلىق فەستيۆالى ءوتتى. الدا ۇلتتىق سپورتتى دامىتۋ ماقساتىندا جاستار اراسىندا كوكپار ۇيىمداستىرىپ, «سىرداريا بارىسى» سايىسىن, «اسكەري قىزمەت – ابىرويلى مىندەت» اسكەري-پاتريوتتىق فورۋمىن وتكىزۋ جوسپارلانىپ وتىر.
جاقسىلىققا ۇمتىلعان جاستار باستاماشى بولعان يگىلىكتى ىستەر اياسى جىل سايىن كەڭەيىپ كەلەدى.
قىزىلوردا وبلىسى
