قىتايلىق ينتەرنەت-دۇكەندەر ارقىلى ەلەكترونيكا مەن كيىمنەن باستاپ تۇرمىستىق تەحنيكا مەن اكسەسسۋارلارعا دەيىن ءارتۇرلى ساناتتاعى ونىمدەرگە قول جەتكىزۋگە بولادى.
جالپى, قازاقستان مەن قىتاي اراسىنداعى ساۋدا اينالىمى 2022 جىلى 31 ملرد دوللاردى قۇراعان ەدى. مەملەكەت باسشىسى قاسىم-جومارت توقاەۆ قازاقستان مەن قىتاي اراسىنداعى ساۋدا اينالىمى 40 ملرد دوللارعا جەتەدى دەپ مەجەلەگەن ەدى. وسىنىڭ ىشىندە ەلەكتروندى ساۋدانىڭ ۇلەسى زور. وسى ورايدا ەلدەر اراسىنداعى ساۋدا-ساتتىقتى ورىستەتۋگە سەبەپ بولىپ تۇرعان تانىمال ماركەتپلەيستەرگە توقتالىپ وتكەنىمىز ءجون بولار.
AliExpress. قىتايدان بولشەك ساۋدا ءۇشىن ەڭ تانىمال ماركەتپلەيستەردىڭ ءبىرى بولىپ قالا بەرەدى. بۇل پلاتفورمادان كوتەرمە جانە بولشەك ساۋدادا ساتىپ الۋعا بولاتىن ءتۇرلى ساناتتاعى تاۋارلاردىڭ كەڭ اسسورتيمەنتىن تابۋعا بولادى.
Taobao. ەڭ الدىمەن قىتايدىڭ ىشكى نارىعىنا باعىتتالعان تانىمال ماركەتپلەيس. Taobao پايدالاناتىن ءبىزدىڭ ازاماتتار ونداعى تاۋارلاردى ساتىپ الۋ جانە جەتكىزۋ ءۇشىن دەلدالدىق كومپانيالار كومەگىنە جۇگىنەدى.
JD.com. تاۋارلاردىڭ كەڭ تاڭداۋى بار تاعى ءبىر ءىرى قىتايلىق ونلاين نارىق. ەڭ ءىرى ينتەرنەت-دۇكەن بولعاندىقتان, ول جەردەن سەنىمدى ساتۋشىلاردىڭ جوعارى ساپالى ونىمدەرىن تابۋعا بولادى. جاقىندا وسى سايتتا قازاقستاندىق ونىمدەردىڭ توپتاما پاۆيلونى اشىلدى.
Alibaba.com. كوتەرمە ساۋداداعى ەڭ ۇلكەن جانە تانىمال ماركەتپلەيس.
Dhgate. قىتايدان كوتەرمە جانە بولشەك ساۋدا جاساۋعا ارنالعان تانىمال ماركەتپلەيس.
1688.com. Alibaba Group-قا تيەسىلى بۇل قىتايلىق ماركەتپلەيس وتاندىق كاسىپكەرلەر اراسىندا تاۋارلاردى كوتەرمە ساتىپ الۋعا بولاتىندىعىمەن تانىمال.
Pinduoduo.com. ەلەكتروندى كوممەرتسيا بويىنشا ءىرى قىتاي كاسىپورنى. الەمنىڭ ەڭ ءىرى ونلاين-ديسكۋانتەر جانە ماركەتپلەيسى. قولدانىسى جاعىنان جەڭىل بولعان سوڭ, قازىرگى ۋاقىتتا ەلىمىزدە كەڭىنەن تانىمال.
جوعارىدا كەيبىر قىتايلىق ماركەتپلەيستەردى پايدالانۋ ءۇشىن دەلدال كومپانيالار كومەگىنە جۇگىنۋ قاجەت بولاتىنىن ايتتىق. Taobao-دان بولەك,
1688.com-نان تاۋار الۋ ءۇشىن دەلدال كومپانيا ىزدەۋگە تۋرا كەلەدى. ونى ەل اراسىندا «كارگو» دەپ اتاپ كەتكەن. «كارگو» تاۋارلاردى قىتايلىق سايتتاردان ساتىپ الىپ, ولاردى قازاقستانعا جونەلتكەن كەزدە اۋە پوشتاسى, تەڭىز كونتەينەرلەرى نەمەسە حالىقارالىق كۋرەرلىك قىزمەتتەر سياقتى ءارتۇرلى جۇك ادىستەرىن پايدالانادى. قايسى ماركەتپلەيستىڭ دە جەتكىزۋ مەرزىمى شامامەن بىردەي – ءبىر اپتادان ءبىر ايعا دەيىنگى ارالىقتا تاپسىرىس بەرگەن تاۋارىڭىز كەلىپ جەتەدى.
«مەن Pinduoduo سايتىنان تاۋار الىپ-ساتۋمەن ءبىر جارىم جىلدان بەرى اينالىسىپ كەلەمىن. تاۋاردىڭ كەلۋى «كارگوعا» بايلانىستى, دەگەنمەن ءوزىم 8-10 كۇن ارالىعىندا تاپسىرىسىمدى الامىن. وتە ارزان جانە ساپالى زاتتار ساتىپ الۋعا مۇمكىندىك بار. سونىڭ ناتيجەسىندە قىتايدان شار ساتىپ الىپ, الماتىدا ءارتۇرلى فوتوايماق, شارلار, ءتۇرلى مەرەكەلىك دەكوراتسيا جاساۋمەن اينالىسىپ ءجۇرمىن», دەيدى ماركەتپلەيستەر يگىلىگىن كورگەن كاسىپكەر جاننا قاناتقىزى.
ارۋجان ماۋلەنباي,
ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ 4-كۋرس ستۋدەنتى
