كورمەگە سۋرەتشىنىڭ سوڭعى جىلدارداعى اتاۋلى كەسكىندەمەلىك پەيزاجدارىنان تۇراتىن ون التى جۇمىسى قويىلعان. تيان-شان تاۋلارىنداعى كورىكتى جەردىڭ قارىس قادامىن دا نازاردان قاعىس قالدىرماي, قىلقالام شەبەرىنىڭ اسقان ماحابباتپەن قامتىعانى بايقالادى. سۋرەتشىنىڭ قانداي ءادىستى قولدانعانى بەلگىسىز, ءبىر قىزىعى, قاراعان ادام تاۋلارعا تەرەزەدەن كوز تاستاپ تۇرعانداي كۇي كەشەدى.
تابيعات – الۋان ءتۇرلى ەرەكشەلىككە باي سۇلۋ جاراتىلىس. اسىرەسە تاۋلاردىڭ اسەم كورىنىسى ادام جانىن تەبىرەنتەتىن قۇبىلىس. تاۋلاردىڭ الىپ قويتاستارى, قىراتتارى, بيىك قارلى شىڭدارى كەسكىندەمەلىك ادىستەرسىز-اق كوركەم. سوندىقتان دا بولات احمەتوۆتىڭ گيپەر رەاليستىك تاۋلى پەيزاجدارى تابيعاتتىڭ وزىندىك كوركەمدىگىنە ارتىق نارسەنىڭ كەرەكسىزدىگىن دالەلدەيدى. ول وسى سەريالىق جۇمىستارىندا تيان-شان مۇزدىقتارى مەن شىڭدارىن جازعان. بەينەلەۋ ونەرىنىڭ نەگىزگى قاعيداسى – سۇلۋلىققا ۇمتىلۋ. ال تاۋلاردىڭ ەڭ سۇلۋ جەرلەرى – بيىك شىڭدارى بولسا كەرەك. قىسقاشا ايتقاندا, تاۋ شىڭىنا ۇمتىلۋ – سۇلۋلىققا ۇمتىلۋمەن بىردەي.
«سۋرەتشىنىڭ تۋىندىلارىندا الدىڭعى پلانداعى بەلگىلى ءبىر شىڭنىڭ تۋرا بەينەسى تاماشالاۋعا ىڭعايلى دەڭگەيىندە ورىندالىپ, ەرەكشە بۇلتتارمەن ۇيلەسىم تاپقان. كوكجيەكسىز كوك اسپانمەن ارالاسىپ, ۇلىلىق سەزىمىن ۇيالاتادى. تۋىندىلارعا ءبىر كوز تاستاعاندا, قىراتتى شىڭنىڭ تۇستەر ءتۇزىلىمى ناقتى, قايتالانباس پىشىندەر, قاتاڭ بۇرىشتار جانە ويناڭقى جارىق-كولەڭكەنى كورۋگە بولادى. مىسالى, «وزەرنىي شىڭى» كارتيناسىندا ءدال ورتادا سۋىق اق-قوڭىر ءتۇستى شىڭنىڭ باستى بەينەسىن جانە دە اينالاسى قالىڭ قارلى تاۋلارمەن جالعاسىپ, جوعارعى جاعى اسپانمەن تالاسىپ تۇرعانداي اسەر بەرەدى. كۇنگە شاعىلىسقان قاردىڭ سۋىق ءتۇسىن قوڭىر تاستى شىڭدارمەن ۇيلەستىرىپ جازعان. تاۋلى شىڭنىڭ اۋا كەڭىستىگى ۇيلەسىمدىلىكتى ساقتاپ تۇرادى», دەيدى كورمە جەتەكشىسى دارىن جيەنباەۆ.
اقيىق تاۋلاردىڭ الىپتىعى, جان-جاعىمەن ۇيلەسىمى, ارتىق-كەمسىز سالتاناتى كورگەن ادامدى باۋراماي قويماس. بۇل تەك تابيعي تۇرعىدان عانا ەمەس, تۇلعالىق تۇرعىدان دا تاقىرىپتىق سيپاتقا ۇمتىلىستىڭ كورىنىسى. مۇزدىقتاردى جازۋداعى گيپەررەاليستىك ءتاسىلدى ۇتىمدى تاڭداعان بىرەگەي سۋرەتشىنىڭ دۇنيەدەن وتكەنىنە, مىنە, بيىل ءبىر جىل تولدى. تاۋ مەن شىڭدى, بيىكتىك پەن سۇلۋلىقتى اڭساۋدان تۋعان «بولاتتى كەسكىندەمە» اتتى كورمە قايتالانباس بىرەگەي قىلقالام يەسىن ەسكە الۋعا ارنالادى.
