جاقىندا وسى باقتى اۋىلىنا جول ءتۇستى. اۋىل اكىمى الماس چۋشەكوۆتىڭ ايتۋىنشا, قازىر مۇندا الماتى, سەمەي قالالارىنان كوشىپ كەلىپ, كاسىبىن دوڭگەلەتە باستاعاندار دا بار. 650 شاڭىراقتاعى 2 500 ادامنىڭ بارلىعى دا ماقانشىنىڭ جەكە اۋدان بولاتىنىن ەستىگەلى بەرى بولاشاققا سەنىمى كۇشەيە تۇسكەن. ەڭ باستىسى اۋىلدى جارىقتاندىرۋعا جانە كوشەلەرىن اسفالتتاۋعا باسا كوڭىل ءبولىنىپ وتىر.
– راسىن ايتۋ كەرەك, كەزىندە ءارتۇرلى سەبەپتەرمەن اۋىلدان كوشىپ كەتكەندەر قازىر باقتى اۋىلىنا قايتادان قونىس اۋدارىپ جاتىر. قىتاي مەن رەسەي اراسىندا تاۋار تاسىمالىن نىعايتۋدا ماڭىزى ايرىقشا باقتى كەدەن بەكەتى دە – وسىندا. ەكى ەلدىڭ اراسىنداعى ساۋدا-ەكونوميكالىق بايلانىستاردىڭ ارتقانىنىڭ ءبىر دالەلىن اۋىل ۇستىمەن اعىلىپ جاتقان كولىكتەردىڭ جىل ون ەكى اي بويى ۇزىلمەيتىنىنەن كورۋگە بولادى. قازىر اباي وبلىسىن دامىتۋ جوسپارىنداعى «اياگوز – باقتى» تەمىرجولىن سالۋ جۇمىستارىنىڭ قالاي جۇرگىزىلەتىنى جونىندە حالىققا ءتۇسىندىرۋ ماقساتىمەن قوعامدىق تىڭداۋ وتكىزۋگە ازىرلەنىپ جاتىرمىز. ياعني تەمىرجول تارتىلعاندا 500 ادامنىڭ جۇمىسپەن قامتىلاتىنى, ستانسالاردىڭ قاي جەرلەرگە سالىناتىنى سياقتى ماڭىزدى ىستەر جايىنان حابارلار ەتپەكپىز. بيىل «اۋىل – ەل بەسىگى» مەملەكەتتىك باعدارلاماسى بويىنشا, جارىقتاندىرۋعا 25 ملن كوشەلەردى اعىمداعى جوندەۋ ماقساتىنا 116 ملن 658 360 تەڭگە قاراجات ءبولىنىپ, يگەرىلىپ جاتىر. امانشىلىق بولسا, قىركۇيەك ايىنا دەيىن بۇل جۇمىستار اياقتالادى, – دەيدى اۋىل اكىمى الماس احمەت ۇلى.
اۋىلدى ارالاي ءجۇرىپ بايقاعانىمىز, حالىقتىڭ يگىلىگىنە قاجەتتى ىستەردىڭ بارلىعى دا جۇيەلى, ورتاق تارتىپپەن جۇزەگە اسىپ جاتىر. اۋىل شەتىندەگى يپپودرومعا كورىك بەرىپ تۇرعان «Baqty Arena» الىستان كوز تارتادى. كەلگەندەر دامىلداپ, سايالايتىن كيىز ءۇي فورماسىنداعى ارنايى ورىندى 1983 جىلى تۋعان اۋىل تۇلەكتەرى تارتۋ ەتىپتى. جالپى, باقتىلىقتاردىڭ ءوز اۋىلىنا قۇرمەتپەن قارايتىنىنىڭ ءبىر كورىنىسى وسى بولسا كەرەك.
بۇل كۇندە «اۋىلدا تۇرىپ كاسىپ اشسام, حالىققا قاجەتتى ىسپەن اينالىسسام» دەگەن جانعا مەملەكەت تاراپىنان قارجىلاي قولداۋ بار ەكەنىن قانشا ناسيحاتتاساق تا ارتىقتىق ەتپەيدى. وتكەن جىلدىڭ مامىر ايىندا ويلاستىرعان جوباسىن ءساتتى قورعاي بىلگەن ەلناز نۇرمۇحامەتوۆا قايتارىمسىز گرانت الىپ, ءتاتتى تاعامدار تاعى دا باسقا اس پىسىرەتىن شاعىن ءدامحانا اشىپتى.
– نەگىزى ءوز ماماندىعىم بويىنشا جۇمىسىم بار ەدى. بىراق مۇمكىندىگى شەكتەۋلى بالا تاربيەلەپ وتىرعان وتباسىلارعا مەملەكەت تاراپىنان كومەك بەرىلەتىن ارنايى باعدارلاما بارىن بىلدىك. ەسەسىنە, ونىڭ ماڭىزىن تۇسىنە بىلگەن ادام ءوزىنىڭ جەكە كاسىبىن اشۋىنا بولادى. جولداسىم ادىلبەك ەكەۋمىز ويلاسا كەلە وسى ماقساتىمىزعا قول جەتكىزدىك. ياعني ءۇرجار اۋداندىق جۇمىسپەن قامتۋ ورتالىعى ارقىلى 1 ملن 380 مىڭ تەڭگە كولەمىندە قايتارىمسىز گرانت الىپ, ناتيجەسىندە وسىنداي حالىق تۇتىناتىن ءدامحانا اشتىق. العاشىندا تورتتاردى ۇيدە ءپىسىرىپ, تاپسىرىس ورىندايتىنبىز. باقتى اۋىلى جول ۇستىندە ورنالاسقانىمەن, نەگىزىنەن جەرگىلىكتى تۇرعىندارعا قىزمەت كورسەتەمىز. قازىر حالىق جاقسى ءبىلىپ قالدى. اۋىلداستارىمىز ۇنەمى كەلىپ تۇرادى. دايىنداعان تاعامدارىمىز ەرتەڭگە قالىپ كورگەن ەمەس. كۇندەلىكتى جۇمىس اتقارامىز. العاشىندا ەكى ادام ىستەيتىن ەدىك, قازىر ءوزىمدى قوسقاندا بەس ادام ىستەپ وتىرمىز. بولاشاقتا بۇرىن دۇكەن بولعان, ءوز قارجىمىزعا ساتىپ العان وسى عيماراتتى كەڭەيتۋدى جوسپارلادىق. باستى ايتايىن دەگەنىم, جاس وتباسىلار بولسىن, قانداي انالار بولسىن, كاسىپ اشۋدى قالاسا, وعان مەملەكەت تاراپىنان گرانت بولىنەتىن قايتارىمسىز قارجىلاي قولداۋ بار. تەك بيزنەس جوباڭدى اۋىل قاجەتتىلىگىمەن بايلانىستىرىپ, ءساتتى قورعاي بىلسەڭ بولعانى, – دەيدى ەلناز.
«ۇقساتا بىلگەن ۇتادى» دەگەندەي, وسىلايشا مەملەكەتتىك قولداۋ قاراجاتىن ەل يگىلىگىنە ۇستاي بىلگەن ادىلبەك پەن ەلناز كەلەشەكتە بالالاردىڭ ويىن الاڭىن اشۋدى دا جوسپارلاپ وتىر. «جاس كەلسە, ىسكە» دەگەن – وسى. اۋىل حالقىنا ادال قىزمەت كورسەتىپ, كاسىبىن شيراتا باستاعان جاس وتباسىعا ساتتىلىك تىلەدىك.
