ءبىرىنشى كۇنى بالالار بىتىمگەرلىك وپەراتسيالار ورتالىعىنىڭ اسكەري قىزمەتشىلەرى دايىنداعان قىزىققا تولى باعدارلاماسىن تاماشالاۋعا «بىتىمگەر» وقۋ-جاتتىعۋ ورتالىعىنا باردى. ولارعا اسكەري تەحنيكا مەن قارۋ-جاراق ۇلگىلەرى, سونداي-اق بايلانىس قۇرالدارى كورسەتىلدى. كەيىن جاسوسپىرىمدەر جاتتىعۋ گراناتالارىن لاقتىرۋ, اتىس قارۋىن بولشەكتەۋ جانە قۇراستىرۋ, ارميا نورماتيۆتەرىن ورىنداۋ بويىنشا جىلدامدىق كۇش جانە شەبەرلىك جاعىنان ءوزارا باسەكەگە ءتۇستى. سوڭىندا بالالارعا پنەۆماتيكالىق مىلتىق اتۋ مۇمكىندىگى بەرىلدى.
كۇننىڭ اپتاپ ىستىعىنا قاراماستان, بولاشاق ەل قورعاۋشىلارى جاۋىنگەرلىك دايىندىق باعدارلاماسىندا قاراستىرىلعان بارلىق جاتتىعۋدى ۇلكەن قۇلشىنىسپەن جانە مۇقيات ورىندادى. «بۇگىنگى اسكەري جاتتىعۋلارىمىز كەرەمەت ءوتتى. ەندى ءبىز ءىس جۇزىندە اسكەري قىزمەتشى بولۋدىڭ وڭاي ەمەس ەكەنىن بىلەمىز. اكەمنىڭ جۇمىسى قيىن, جاۋاپتى جانە وتە قىزىقتى ەكەنىن ۇقتىم», دەيدى بىتىمگەرلىك وپەراتسيالار ورتالىعى اسكەري قىزمەتشىسىنىڭ ۇلى ءىلياس تاجىباەۆ.
بەلسەندى وتكەن سايىستان كەيىن بىتىمگەرلەردىڭ بالالارى ناعىز سارباز بوتقاسىنىڭ ءدامىن تاتىپ كوردى. «بۇل بالالارىمىزعا اكەلەرىنىڭ نە ىستەپ جاتقانىن بىلۋگە جانە كورۋگە تاماشا مۇمكىندىك بولدى», دەيدى اتا-انالاردىڭ ءبىرى ايجامال بازار. – بىتىمگەرلىك وپەراتسيالار ورتالىعىنا بارعان بالالارىمىز تاماشا اسەر الدى, سىزدەرگە ريزامىز».
«جاس بىتىمگەر» لاگەرى ءبىر اپتاعا سوزىلماق. كەلەسى كۇندەرى بالالار مادەني-دەمالىس, سپورتتىق ءىس-شارالار مەن جورىقتاردى قامتيتىن قىزىقتى باعدارلامالارعا قاتىستى. سونىمەن بىرگە دەلفيناريگە, حايۋاناتتار باعىنا, «مەدەۋ» مۇز ايدىنىنا بارىپ, اسپالى جولمەن ءجۇردى. ودان بولەك, قورعانىس مينيسترلىگى ۇلتتىق اسكەري-پاتريوتتىق ورتالىعىنىڭ مۋزەيىنە جانە «داڭق مەموريالى» كەشەنىنە ەكسكۋرسيالار جوسپارلانعان.
تاۋ دايىندىعى ورتالىعىنا بارۋ دا جوسپاردا بار, مۇندا تاجىريبەلى نۇسقاۋشىلار بالالارعا تاۋ جاعدايىندا ءومىر ءسۇرۋ ەرەكشەلىكتەرىن ايتىپ, كورسەتىپ, ولارعا وزدەرىن ناعىز اسكەري الپينيستەر سياقتى سەزىنۋگە مۇمكىندىك بەرەدى. «بىتىمگەرلىك وپەراتسيالار ورتالىعى اسكەري قىزمەتشىلەرىنىڭ بالالارى ءۇشىن بۇل اپتا ۇمىتىلماس اسەر بەرىپ قانا قويماي, فيزيكالىق تۇرعىدان شىنىعىپ, شىمىر بولۋعا, پايدالى ءبىلىم, پراكتيكالىق داعدىلار الۋعا جانە ارينە, جاڭا دوستار تابۋعا مۇمكىندىك بەرەتىنىنە سەنىمدىمىن», دەيدى ورتالىقتىڭ اعا وفيتسەرى ءانۋار ارىنعازيەۆ.
