«ازيا داۋىسى» تاۋەلسىز قازاقستاننىڭ العاشقى جىلدارىندا ۇلتتىق مۋزىكا ونەرىن باسقا ولشەم, جاڭا دەڭگەيگە كوتەرگەن ساپالى جوبالاردىڭ باستاۋىندا تۇردى. تامىز ايى تۋا سالا تىڭداۋشىسى تاۋعا قاراپ, اۋەلەگەن اسقاق ءان ىزدەپ تۇراتىن بەلگىلى ءان بايقاۋى وسى ۋاقىت ارالىعىندا وتاندىق ونەر برەندى بولىپ قالىپتاسىپ, كوپشىلىكتىڭ كوڭىل تورىنەن ورىن الىپ ۇلگەرگەن ەدى. الايدا سۇلۋ سازدى ساعىنعان تىڭداۋشىسىنا ول بۇرىنعىداي ورىنداۋشىلاردىڭ حالىقارالىق ءان بايقاۋى بولىپ ورالمادى, ۇيىمداستىرۋشىلار شارتاراپتى شارلاعان اڭىز اتىمەن قايتا قاۋىشقان فەستيۆالدى جاڭا لەپپەن جاڭعىرتۋ ماقساتىندا كونتسەرت تۇرىندە ساباقتاستىرۋدى قوش كورىپتى.
28-30 شىلدە ارالىعىندا ءۇش كۇنگە جوسپارلانعان فەستيۆالدىڭ العاشقى كۇنى كورگەن ادامنىڭ كوڭىلىندە ۇزاق ساقتالاتىن درون شوۋىمەن باستالىپ, تاۋ باۋىرىنا توسەلگەن قىزىل كىلەم ۇستىمەن كوپشىلىكتىڭ سۇيىكتى انشىلەرى قول بۇلعاپ ءجۇرىپ ءوتتى. سالتاناتتى ءىس-شارانىڭ بەتاشار ءسوزىن العان قازاقستاننىڭ مادەنيەت جانە سپورت ءمينيسترى اسحات ورالوۆ: «تۇركى ەلدەرىنىڭ مادەنيەت مينيسترلەرى قازىردىڭ وزىندە ماعان تەلەفون شالىپ, «ازيا داۋىسى» حالىقارالىق ورىنداۋشىلار بايقاۋى كەلەسى جىلى قاشان وتەتىنىن سۇراپ جاتىر. بايقاۋعا وزدەرىنىڭ ۇزدىك ارتىستەرىن جىبەرگىسى كەلەتىن نيەتىن ءبىلدىرىپ وتىر. ءبىز بايقاۋعا قولداۋ كورسەتەمىز, ويتكەنى بۇل – تەك مۋزىكالىق ەمەس, سونىمەن قاتار تۋريستىك قادام. الماتىنىڭ جانە ءبىزدىڭ بۇكىل ءوڭىرىمىزدىڭ ءتۋريزمىن دامىتاتىن الەۋەتى بار», دەدى. ءمينيستردىڭ ايتۋىنشا, فەستيۆال الداعى جىلدان باستاپ داستۇرگە ساي بارلىق تالاپ-ەرەجەسىن ساقتاي وتىرىپ, حالىقارالىق ءان بايقاۋى بولىپ قايتا جالعاسادى.
شاھاردىڭ كۇندىزگى اپتاپ ىستىعىنان كەيىن شاتقالدىڭ ماي توڭعىسىز جانعا جاعىمدى قوڭىر سالقىن كەشى ءان سۇيەتىن قاۋىمنىڭ كوڭىل كۇيىن ءبىرتۇتاس تولقىندا تابىستىردى. ونەر مەرەكەسىندەگى بۋىن ساباقتاستىعىن اڭداماي قالۋ مۇمكىن ەمەس. الدىمەن 32 جىلدان بەرى ۋاقىت سىنىنا توزباي, قيىندىق اتاۋلىعا توتەپ بەرىپ, ەلىمىزدەگى ەڭ ۇزاق ۋاقىت كوشىندە كەلە جاتقان ۇلتتىق مۋزىكالىق جوبالاردىڭ ءبىرى «جاس قانات – 2023» جاس ورىنداۋشىلار بايقاۋىنىڭ ءار جىلدارداعى جەڭىمپازدارى ونەر كورسەتتى. ولاردى بايعالي سەركەباەۆتىڭ «دجۋليا» ميۋزيكلىنىڭ ءۇزىندىسى جالعاپ الىپ, «ا-studio» توبىنىڭ اندەرى شىرقالىپ, كورەرمەن الەمدىك حيتتەردى ەسكە الدى. سونداي-اق 19 جىل بويعى ۇزىلىستە «ازيا داۋىسى» فەستيۆالىنىڭ تاريحىنان حابارسىز وسكەن جاس كورەرمەندەر ءۇشىن ارنايى جاسالعان بلوك بولدى. وندا فەستيۆالدى قۇرعان مۇرات ەرعاليەۆ, الەكساندر پونومارەۆ سياقتى ۇيىمداستىرۋشى تۇلعالار جانە سول جىلداردارداعى الماتىنىڭ كەلبەتى كورسەتىلدى.
ءتۇن جارىمىنا دەيىن سوزىلعان ءان مەرەكەسىندە كورەرمەندەرگە بەلگىلى رەجيسسەر, پروديۋسەر فارحات ءشارىپوۆ تۇسىرگەن «سولدات ليۋبۆي» ميۋزيكلىنىڭ تۇسىرىلىمىنە قاتىسۋ مۇمكىندىگى تۋدى. ولار فيلمدەگى باستى كەيىپكەردىڭ جۇلدىزعا اينالىپ, ۇلكەن ساحناعا شىققان كەزىندە باسقان ءىزىن اڭدىپ جۇرەتىن تابىنۋشىسى بولىپ كوپشىلىك ساحناسىندا وينادى. كورەرمەندەر تەلەفون جارىعىن جاعىپ, رەجيسسەردىڭ تاپسىرماسىن مۇلتىكسىز ورىنداپ, ءفيلمنىڭ ماڭىزدى ساحناسىن تاسپالاۋعا كومەكتەستى. وسىلايشا, «ازيا داۋىسىنىڭ» العاشقى كۇنى تاريحقا عانا ەمەس, كينوعا دا ەندى.
ZAQ, RaiM, ەركە ەسماحان, ميراس جۇگىنىسوۆ, مولدانازار, مارحابا ءسابي, «يرينا كايراتوۆنا», V $ XVPRiNCE سياقتى بۇگىنگى ەسترادانىڭ ەڭ تانىمال ارىتىستەرى كوپشىلىكتى ءبىرىنشى كۇننەن-اق باۋراپ, قوسىلا شىرقاعان اننەن تاس ويانىپ, تاۋ جاڭعىرىققانداي, تابيعاتتى اسەم كۇيگە بولەدى. الماتىعا «The Black Eyed Peas» سەكىلدى الەمگە ايگىلى امەريكالىق توپتىڭ كەلۋى – فەستيۆالدىڭ ايتۋلى جاڭالىعى. ال ءان جارمەڭكەسى جابىلاتىن كۇنى «Secret Service», «ياللا» توپتارى قىرىق مينۋتتان ونەر كورسەتىپ, روزا رىمباەۆا مەن ناعيما ەسقاليەۆا, ەركەش شاكەەۆ پەن مەدەۋ ارىنباەۆ باستاعان ەلىمىزدىڭ بەلگىلى مۋزىكا مايتالماندارى انمەن شوۋ-شەرۋ جاسادى.
«ازيا داۋىسى – 2023» فەستيۆالىنىڭ العاش رەت ۇكىمەتتىڭ اقشاسىنا ارقا سۇيەمەي, اتقارۋشى بيلىكتىڭ كومەگىنسىز تەك قارجى ۇيىمدارى مەن وتاندىق بيزنەس سەرىكتەستەردىڭ قولداۋىمەن وتكىزىلىپ وتىرعانىن باسا ايتقانىمىز ءجون. 30 شىلدەگە بيلەت ساتىپ العان كورەرمەندەر ءۇشىن ۇتىس ويىنى ۇيىمداستىرىلىپ, ءساتتى بيلەت بۇيىرعان باقىتتى جاندارعا جەڭىل كولىك, IPhone 14 Pro Max, IPhone 14, Apple Watch سياقتى باعالى سىيلىق تاپسىرىلدى. الماتى قالاسىنىڭ اكىمدىگى تاۋعا اعىلعان كوپشىلىكتى پوليتسيا, جەدەل جاردەم, توتەنشە جاعداي سەكىلدى قاۋىپسىزدىك شارالارىمەن قامتاماسىز ەتىپ, كولىك قوزعالىسىن رەتتەدى.
