ۇكىمەتتە پرەمەر-ءمينيستردىڭ ورىنباسارى – ۇكىمەت اپپاراتىنىڭ باسشىسى عالىمجان قويشىباەۆتىڭ توراعالىعىمەن وسى جىلعى 6 ايداعى جاڭا تسيفرلىق باستامالاردى ىسكە اسىرۋ جونىندەگى جۇمىستىڭ قورىتىندىلارى تالقىلاندى.
ماسەلەن, قورعانىس مينيسترلىگىنىڭ اسكەرگە شاقىرۋ بويىنشا تىركەۋ ناۋقانىن پرواكتيۆتى فورماتقا اۋىستىرۋ جونىندەگى جوباسى ىسكە اسىرىلدى. بۇل ازاماتتاردى اسكەري كوميسسارياتتارعا بارۋ, مەديتسينالىق كۋالاندىرۋدان ءوتۋ جانە جەكە ءىس ءۇشىن قۇجات جيناۋ قاجەتتىلىگىنەن بوساتادى. سونداي-اق شاقىرۋ ۋچاسكەلەرىنە تىركەلۋ تۋرالى كۋالىك الۋ قاجەت بولمايدى. دەرەكتەر بازاسىن ينتەگراتسيالاۋ ەل اۋماعىندا تۇرعىلىقتى جەردى وزگەرتۋگە بايلانىستى اسكەري كوميسسارياتقا جۇگىنۋ قاجەتتىگىنەن بوساتادى.
قارجى مينيسترلىگى شەكاراداعى وتكىزۋ بەكەتتەرىندە ەلەكتروندى كەزەك جۇيەسىن ەنگىزدى, «E-Salyq Azamat» ءموبيلدى قوسىمشاسىندا «جەكە تۇلعالار ءۇشىن كەدەندىك دەكلاراتسيالاۋ» قىزمەتى ىسكە قوسىلدى.
ادىلەت مينيسترلىگى سەنىمحات راسىمدەۋگە جانە ونلاين-فورماتتا نوتاريۋس كەڭەسىن الۋعا مۇمكىندىك بەرەتىن «ە-نوتاريات» پلاتفورماسىن ءساتتى ىسكە قوستى.
ديپلومنىڭ تۇپنۇسقا ەكەنىن تەكسەرۋ ماقساتىندا وقۋ-اعارتۋ مينيسترلىگى تەحنيكالىق, كاسىپتىك جانە ورتا بىلىمنەن كەيىنگى ءبىلىم تۋرالى ديپلومدارعا QR-كودتار ەنگىزدى.
كەڭەس قورىتىندىسى بويىنشا ع. قويشىباەۆ ازاماتتاردىڭ ۇسىنىستارى مەن ەسكەرتۋلەرىن ەسكەرە وتىرىپ, كەيبىر ونلاين-سەرۆيستەردى ءارى قاراي پىسىقتاۋ قاجەتتىگىن اتاپ ءوتتى. وعان قوسا سالالىق مينيسترلىكتەر جىل سوڭىنا دەيىن بىرقاتار تسيفرلىق سەرۆيس ەنگىزەتىن بولادى.
جۇمىستىڭ ماڭىزىن ەسكەرە وتىرىپ, توتەنشە جاعدايلار مينيسترلىگىنە جەدەل اقپارات الۋ ءۇشىن اپاتتاردى باقىلاۋ جانە بولجاۋ پلاتفورماسىن ىسكە قوسۋ تاپسىرىلدى.
دەنساۋلىق ساقتاۋ مينيسترلىگى وسى جىلدىڭ سوڭىنا دەيىن ءمامس پروتسەستەرىن تسيفرلاندىرۋ, ەڭبەككە جارامسىزدىق پاراعىنىڭ قاعازداعى نۇسقاسىنان باس تارتۋ, 075/ۋ فورماسىنداعى انىقتامانى تسيفرلىق فورماتقا كوشىرۋ, سكرينينگتەن ءوتۋ قاجەتتىگى تۋرالى پرواكتيۆتى حابارلاپ وتىرۋ قىزمەتىن ىسكە قوسۋ, مەكەنجاي وزگەرگەن كەزدە مەديتسينالىق مەكەمەگە اۆتوماتتى تۇردە تىركەۋ قىزمەتىن ەنگىزۋ جانە ت.ب. بويىنشا پيلوتتىق رەجيمدە جۇمىس جۇرگىزەدى.
ادىلەت مينيسترلىگى اتقارۋشىلىق ءىس جۇرگىزۋ ءۇشىن ءموبيلدى قوسىمشا ازىرلەۋدى جوسپارلاپ وتىر.
ءوز كەزەگىندە قارجى مينيسترلىگى سالىق ەسەبىن قابىلداۋ فورماسىن جەڭىلدەتىپ, بۇعاتتالعان شوتتاردى ونلاين اشۋ بويىنشا سەرۆيستى ىسكە قوسپاق.
ەڭبەك جانە حالىقتى الەۋمەتتىك قورعاۋ مينيسترلىگى ەڭبەك شارتتارىن ونلاين رەجيمدە جاساسۋ مۇمكىندىگىن ازىرلەپ جاتىر.
يندۋستريا جانە ينفراقۇرىلىمدىق دامۋ مينيسترلىگى حالىققا قىزمەت كورسەتۋ ساپاسىن ارتتىرۋ ءۇشىن كوممۋنالدىق قىزمەتتەر كورسەتۋ بويىنشا بىرىڭعاي ستاندارتتارعا كوشۋ ماسەلەسىن پىسىقتاۋدا.
«مەملەكەت باسشىسى ءبىزدىڭ تاسىلدەردى قولدادى. مۇنىمەن توقتاپ قالماي, ىلگەرىلەۋ كەرەك. مەملەكەتتىك قىزمەتتەردى تسيفرلاندىرۋ, پرواكتيۆتى فورماتتارعا كوشۋ – ۇكىمەت جۇمىسىنىڭ باسىمدىقتارىنىڭ ءبىرى. ءاربىر ازامات تسيفرلاندىرۋدىڭ ناقتى اسەرىن سەزىنۋگە ءتيىس», دەدى ع. قويشىباەۆ.
