پرەزيدەنت قاسىم-جومارت توقاەۆ سولتۇستىك ەۋروپانىڭ بىرقاتار مەملەكەتىندە بولعان قۇراندى ورتەۋ اكتىلەرىن قازىرگى الەمدەگى جاعدايدى شيەلەنىستىرۋگە, حالىقتار مەن مەملەكەتتەر اراسىنداعى سەنىمگە نۇقسان كەلتىرۋگە باعىتتالعان ارانداتۋشىلىق ارەكەت دەپ سانايدى.
قازاقستان – الەمدىك جانە ءداستۇرلى دىندەر كوشباسشىلارىنىڭ سەزدەرىن وتكىزۋگە باستاماشى بولعان مەملەكەت. بۇل فورۋم ءداستۇرلى دىندەر مەن كونفەسسيالاردىڭ كورنەكتى وكىلدەرى اراسىنداعى ءتيىمدى ءارى تابىستى ديالوگ الاڭىنا اينالدى.
جۋىردا پرەزيدەنت قاسىم-جومارت توقاەۆ الەمدە جيىلەپ كەتكەن ءدىني ۆانداليزم, سونىڭ ىشىندە قۇران كىتابىن ورتەۋگە قاتىستى پىكىر بىلدىرگەن ەدى. مەملەكەت باسشىسىنىڭ پىكىرىنشە, مۇنداي جاۋاپسىز ارەكەتتەر الەم مەملەكەتتەرى مەن دىندەردىڭ بەيبىت قاتار ءومىر سۇرۋىنە كەرى اسەرىن تيگىزەدى.
«بۇل جالپىعا ورتاق نورمالارعا قايشى كەلەتىن اكتسيالار رەتىندە ءبىراۋىزدان ايىپتالۋعا ءتيىس. بۇۇ باس اسسامبلەياسى دا بۇل ماسەلەگە قاتىستى ءوز ۇستانىمىن ءبىلدىرۋى كەرەك», دەلىنگەن قاسىم-جومارت كەمەل ۇلىنىڭ پىكىرىندە.
وسى تۇستا بىرىككەن ۇلتتار ۇيىمىنىڭ باس اسسامبلەياسى كونفەسسياارالىق ديالوگتى دامىتۋعا جانە وشپەندىلىك تىلمەن كۇرەسۋگە باعىتتالعان قاراردى قابىلدادى.
قابىلدانعان قاراردا ءدىن نەمەسە نانىم-سەنىمىنە بايلانىستى ادامدارعا قارسى زورلىق-زومبىلىق ارەكەتتەردىڭ بارلىق تۇرلەرى ايىپتالاتىنى جازىلعان. سونىمەن قاتار قۇجاتتا ءدىني رامىزدەرگە, قاسيەتتى كىتاپتارعا, تۇرعىن ۇيلەرگە, جۇمىس ورىندارىنا, م ۇلىكتەرگە, مەكتەپتەرگە, مادەنيەت ۇيلەرى مەن عيبادات ورىندارىنا قارسى باعىتتالعان كەز كەلگەن ارەكەتتەر دە ايىپتالاتىنىنا نازار اۋدارىلدى.
اتالمىش قۇجات ەۋروپانىڭ بىرقاتار ەلدەرىندە قاسيەتتى قۇران كىتابىن ورتەپ, ونى قورلاۋ وقيعالارىنىڭ تىزبەگى اياسىندا قابىلداندى.
ايتا كەتسەك, قازاقستان بۇۇ-عا مۇشە باسقا 47 ەلمەن بىرگە بۇل قاراردىڭ تەڭاۆتورى بولدى.
