كورمەگە بۇقار جىراۋ, قارقابات انا ەسكەرتكىشتەرىنىڭ اۆتورى, سۋرەتشىلەر وداعىنىڭ مۇشەسى بەيبىت مۇستافين باستاعان قىلقالام شەبەرلەرىنىڭ تۋىندىلارى قويىلدى. قالا تۇرعىندارى قالا كەلبەتىنەن بولەك, تاريحي تۇلعالاردىڭ دا پورترەتتەرىن تاماشالادى. مايلى كەنەپپەن دە, قاراپايىم قارىنداشپەن دە سالىنعان سۋرەتتەر بار. دارىندى سۋرەتشىلەر جاڭابەك جۇمابەكوۆ, ماريانا ماكەەۆا, ءجاميلا وسپانوۆا, شامشىراق سەرىك كەش قىزىعىن تاماشالاۋعا كەلگەن كورەرمەندەردىڭ پورترەتىن سالىپ بەردى. ەرسىن تەمىرعاليەۆ ساياباققا كوشپەلى شەبەرحاناسىمەن كەلىپ, قىشتان قۇمىرا جاسادى.
بەلگىلى شەبەر بەيبىت ءمۇستافيننىڭ ايتۋىنشا, مۇنداي كورمەلەر ءجيى ءوتۋى كەرەك. ويتكەنى مۋزەيگە ەلدىڭ كوبى بارا بەرمەيدى.
«مۇنداي شارالار حالىق مادەنيەتىن وسىرۋگە اسا قاجەت. ادام سۋرەتتەن ەستەتيكالىق ءلاززات الادى. ال ونەردى ءتۇسىنىپ, باعالايتىنداردىڭ جۇرەگى ارقاشان وياۋ», دەيدى بەيبىت مۇستافين.
كورمەدەن بولەك «Jastar fest» اياسىندا ساحنادا جاس اقىندار ولەڭ وقىپ, انشىلەر ءان شىرقادى.
«بۇل شارانى تاماشالاۋعا كەلگەندەردىڭ قاراسى قالىڭ. وسىعان قاراپ, قاراعاندى-
لىقتاردىڭ ونەرگە دەگەن سۇيىسپەنشىلىگىن بايقاۋعا بولادى. كورەرمەننىڭ تالعامى بيىك. سۋرەتشىلەر قىلقالاممەن, اقىندار سوزبەن, انشىلەر اۋەنمەن سۋرەت سالادى. سول ونەر وكىلدەرىنىڭ باسىن قوسۋ – وتە جاقسى يدەيا», دەيدى جاس اقىن ماعجان اسقار.
انشىلەر اسەم ءان شىرقاپ, كورەرمەنگە كەرەمەت كوڭىل كۇي سىيلادى. تالعامى بيىك تىڭدارماننىڭ كوڭىلىنەن ورىن العان كلاسسيكالىق اۋەندەر دە ورىندالدى.
مۇنداي فورماتتاعى كەش قاراعاندىدا ءبىرىنشى رەت ۇيىمداستىرىلىپ وتىرعان جوق. وسىعان دەيىن دە اقىندار مەن انشىلەر ورتالىق ساياباقتىڭ ساحناسىندا ادەبي-سازدى كەشتەر وتكىزگەن. مۇنىڭ ءبارى – قازاقستان جازۋشىلار وداعى مەن قالا اكىمدىگىنىڭ بىرلەسە جۇزەگە اسىرعان جوبالارى.
قاسىمحان عالىم,
«Egemen Qazaqstan»
