قازاق ءبيشىسى «روبەرتو بوللە جانە دوستارى» اتتى بالەت كەشتەرىندە جاھان جۇرتشىلىعىن حاريزماسىمەن جانە كاسىبي شەبەرلىگىمەن تاڭعالدىردى. ايتا كەتەيىك, اتالعان بالەت كەشتەرى 11-29 شىلدە ارالىعىندا ريم, فلورەنتسيا, ۆەرونا, كازەرتا قالالارىندا ءوتىپ جاتىر. ال 27, 29 شىلدەدە ەلوردالىق تەاتردىڭ جەتەكشى ءسوليسىن گەنۋيا مەن تاورميناداعى سپەكتاكلدەر كۇتەدى.
– بۇل تۋرعا مەنى دوسىم, ەسىمى الەمگە تانىمال, اڭىزعا اينالعان بالەت ءارتىسى روبەرتو بوللە شاقىردى. ونىڭ ءوزىنىڭ «Artedanza» پروديۋسەرلىك ورتالىعى بار, ولارمەن كوپ جىلدان بەرى شىعارماشىلىق بايلانىستامىز. سولاردىڭ شاقىرۋىمەن يتالياعا جىلىنا 4-5 رەت بارىپ تۇرامىن. ەندى وسى جولى كورەرمەننىڭ سۇراۋى بويىنشا جازعى تۋرعا شاقىردى. روبەرتو بوللەنىڭ كونتسەرتتەرىنە قاتىسۋ – ءوز شەبەرلىگىڭدى ۇلكەن اۋديتوريانىڭ الدىندا پاش ەتۋگە جاقسى مۇمكىندىك. الەمگە ايگىلى ءبىر عانا ارەنا دي ۆەرونا كونە امفيتەاترىنىڭ وزىندە ونەرىمدى 15 مىڭنان استام كورەرمەن تاماشالادى. سوندىقتان مەن ءۇشىن بۇل گاسترول تەك قانا ءوز شىعارماشىلىعىمدى عانا ەمەس, جالپى قازاق بالەت ونەرىن تانىستىرۋعا كەرەمەت الاڭ ەكەنى انىق. ءبىر بايقاعانىم, مۇنداعى كورەرمەن ۇناتقان ارتىستەرى تۋرالى بارلىق مالىمەتتى مۇقيات زەرتتەيدى ەكەن: قاي جەردەن ەكەندەرىن, قايدا جۇمىس ىستەيتىندەرىن بىلگىلەرى كەلەدى. مەنىڭ يتاليالىق جانكۇيەرلەرىم الەۋمەتتىك جەلىلەردەگى پاراقشالارىما جازىلىپ, سوندا وزدەرىنىڭ جىلى لەبىزدەرىن قالدىرىپ جاتىر. وسىناۋ تاماشا ەلدە شىعارماشىلىعىمدى باعالاپ, كونتسەرتتەرىمە 4 جىلدان بەرى كەلىپ جۇرگەن جاندار بار. سونىمەن قاتار ونەرىمدى بۇكىل ەۋروپا, اۋستراليا, وڭتۇستىك امەريكا, جاپونيا جانە باسقا دا ەلدەردەگى اسقاق ونەر جانكۇيەرلەرى باقىلاپ وتىرادى, – دەيدى باقتيار ادامجان.
روبەرتو بوللە ءوزىنىڭ گالا-كەشتەرىنە تەك جوعارى دەڭگەيدەگى ورىنداۋشىلاردى شاقىراتىنىن اتاپ ءوتۋىمىز قاجەت. وسى رەتتە «استانا وپەرا» پرەمەرى باقتيار ادامجاننىڭ روبەرتو بوللەنىڭ كونتسەرتتەرىنە جىل سايىن قاتىسىپ كەلە جاتقانى جەتەكشى ءسوليستىڭ الەمدىك بالەت ونەرىندە لايىقتى ورىن العانىن تاعى ءبىر دالەلدەي تۇسەدى.
11-13 شىلدە ارالىعىندا ريمدەگى كاراكاللا تەرمالارىندا وتكەن مۋزىكالىق فەستيۆالدە ءبيشى ل.مينكۋستىڭ «دون كيحوت» جانە ا.اداننىڭ «كورسار» بالەتتەرىنەن پا-دە-دەنى ورىندادى. اراعا ەكى كۇن سالىپ, فلورەنتسياداعى ايگىلى «Piazza della Santissima Annunziata» الاڭىندا سەنكينگتىڭ مۋزىكاسىنا حورەوگراف يسيان چجاننىڭ «In the wake» زاماناۋي ءنومىرى مەن «دون كيحوت» بالەتىنەن پا-دە-دەنى ۇسىندى. ونىڭ 19 شىلدەدە ارەنا دي ۆەرونا امفيتەاترىنداعى, 22 شىلدەدە رەدجيا دي كازەرتاداعى ونەر كورسەتۋلەرى دە جاقسى اسەرمەن ءوتتى.
ايتا كەتەيىك, يتالياداعى گاسترول وسى ايدىڭ سوڭىنا دەيىن جالعاسادى. 27 شىلدەدە وتانداسىمىزدىڭ قاتىسۋىمەن گەنۋياداعى ۆيللا گريمالدي الاڭىندا, 29 شىلدەدە تاورميناداعى كونە تەاتردا بالەت كەشتەرى وتەدى. باقتيار وندا جوعارىدا اتالعان نومىرلەرمەن قاتار تسەزار ءپۋنيدىڭ «ەسمەرالدا» بالەتىنەن «ديانا جانە اكتەون» پا-دە-دەسىن ۇسىنادى.
– كەيدە شەتەلدە كونتسەرتتەر مەن سپەكتاكلدەرگە قاتىسۋ تۋرالى ۇسىنىستاردان باس تارتۋعا تۋرا كەلەتىن كەزدەر بولادى. سەبەبى «استانا وپەرادا» مەنى تاعاتسىزدانا كۇتەتىن سۇيىكتى كورەرمەنىمنىڭ الدىندا ونەر كورسەتكىم كەلەدى. بۇل مەن ءۇشىن زور قۋانىش ءارى جاۋاپكەرشىلىك. وسى رەتتە قىزمەتىمە ۇنەمى قولداۋ ءبىلدىرىپ جۇرگەن تەاتر باسشىلىعىنا, اسىرەسە بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆاعا العىسىمدى ايتقىم كەلەدى, – دەدى ءبيشى.
«استانا وپەرانىڭ» جەتەكشى ءسوليسى ەلىمىزدە عانا ەمەس, الەمدىك بالەت ونەرىندە تانىمال ەكەنى بارشاعا ايان. ونىڭ ونەر كورسەتۋلەر كەستەسى الداعى بىرنەشە ايعا جازىلىپ قويادى. ماسەلەن, سوليست تامىزدا Ballet International Gala ۇيىمداستىرۋشىلارىنىڭ شاقىرۋىمەن وسىمەن ءتورتىنشى مارتە اۋسترالياعا اتتانباقشى. وندا باقتيار ساحناداعى جۇبى شۇعىلا ادەپحانمەن بىرگە ونەر كورسەتەدى. ال كۇزدە بالەت جۇلدىزى وڭتۇستىك كورەيا استاناسى سەۋلدە Star Gala-دا, اقش-تىڭ سان-فرانتسيسكو قالاسىندا «Petipa Awards» ماراپاتىن تابىستاۋ راسىمىندە, سونىمەن قاتار كيپر مەن شۆەيتساريا سەكىلدى باسقا دا ەلدەردە ساحناعا شىعادى.
