دەنساۋلىق ساقتاۋ ءمينيسترى اجار عينيات الداعى ەكى جىلدا اۋىلداردا جاڭا 655 العاشقى مەديتسينالىق-سانيتارلىق كومەك كورسەتۋ نىساندارىن سالۋ بويىنشا جۇرگىزىلىپ جاتقان جۇمىستار تۋرالى باياندادى. ولاردىڭ قاتارىندا فيزيوتەراپيا كابينەتى مەن ءدارىحانانى, فەلدشەرلىك-اكۋشەرلىك بەكەتتەردى (اقپاراتتاندىرۋ كابينەتى قوسىلدى) جانە دارىگەرلىك امبۋلاتوريالاردى (ەدش زالى قوسىلدى) قامتيتىن زاماناۋي مەديتسينالىق بەكەتتەر بار.
فيزيوتەراپيا كابينەتتەرى ەلەكتروتەراپيا, ماگنيتوتەراپيا, ۋلترادىبىستىق تەراپيا, فوتوتەراپيا, ۋلتراكۇلگىن تەراپياسى, ينگالياتورلار جانە باسقا دا قۇرىلعىلارمەن جابدىقتالاتىنى اتاپ ءوتىلدى. ەشد زالىندا ۇساق موتوريكانى قالپىنا كەلتىرۋ مەن دامىتۋعا ارنالعان ءتۇرلى ترەناجەرلار, ەرگوتەراپياعا ارنالعان ستەندتەر, شۆەد قابىرعاسى, كينەزوتەراپياعا ارنالعان جابدىقتار قاراستىرىلعان. سونىمەن قاتار بارلىق جاڭا مساك نىساندارى تەلەمەديتسينانى ۇيىمداستىرۋ ءۇشىن كومپيۋتەرلىك جانە مەديتسينالىق جابدىقتارمەن قامتاماسىز ەتىلگەن.
ۇلتتىق جوبا شەڭبەرىندە ينسۋلت جانە كارديولوگيالىق ورتالىقتار, وڭالتۋ, تراۆماتولوگيا جانە ورتوپەديا, حيرۋرگيا, رەانيماتسيا, قارقىندى تەراپيا بولىمشەلەرى اشىلىپ, كوپبەيىندى ورتالىق اۋداندىق 32 اۋرۋحانانى جاڭعىرتۋ جانە كۇردەلى جوندەۋ, سونداي-اق زاماناۋي مەديتسينالىق جابدىقتارمەن جاراقتاندىرۋ جۇمىستارى جۇرگىزىلەدى.
سونىمەن قاتار اۋىلدىق دەنساۋلىق ساقتاۋ مەكەمەلەرى ءۇشىن 1100 مەديتسينا قىزمەتكەرىن دايارلاۋ جوسپارلانۋدا, ولاردىڭ اراسىندا دارىگەرلەر, مەدبيكەلەر, فەلدشەرلەر مەن اكۋشەرلەر بار.
يندۋستريا جانە ينفراقۇرىلىمدىق دامۋ ءمينيسترى مارات قاراباەۆ جاڭا مەديتسينالىق نىسانداردىڭ ۇلگىلىك جوبالارىن جەرگىلىكتى جاعدايعا بەيىمدەۋ جۇمىستارى تۋرالى ايتتى.
ۇلتتىق جوبانىڭ وڭىرلەردە جۇزەگە اسىرىلۋ بارىسى تۋرالى اتىراۋ وبلىسىنىڭ اكىمى سەرىك شاپكەنوۆ, قوستاناي وبلىسىنىڭ اكىمى قۇمار اقساقالوۆ, ماڭعىستاۋ وبلىسىنىڭ اكىمى نۇرلان نوعاەۆ جانە قاراعاندى وبلىسىنىڭ اكىمى ەرماعانبەت بولەكپاەۆ باياندادى.
ۇكىمەت باسشىسى جيىندى قورىتىندىلاي كەلە, ۇلگىلىك جوبالاردى جەرگىلىكتى جاعدايمەن بايلانىستىرۋ, سونداي-اق قۇرىلىس الاڭدارىنا ينجەنەرلىك كوممۋنيكاتسيالار مەن جول تارتۋ جۇمىستارىن جەدەلدەتۋدى تالاپ ەتتى.
سونىمەن قاتار ءاليحان سمايىلوۆ دەنساۋلىق ساقتاۋ مينيسترلىگى ۇلتتىق جوبانى ۇيلەستىرۋ مەن باقىلاۋدى كۇشەيتۋى قاجەت ەكەنىن اتاپ ءوتتى.
